KOLOSSE Bindu 3
Bindu 3
Angka na di ginjang i do sijalahan 1-11.
Holong ni roha i do siparangehononhon 12-17.
Sipaingot tu ina, ama, dakdanak dohot anak somang 18-25.
I. 1Asa molo naung rap hamu dipahehe dohot Kristus, jalahi hamu ma angka na di ginjang; ai disi do Kristus, hundul di siamun ni Debata. #Kol 2:12 2Angka na di ginjang i ma parrohahon hamu, unang ma angka na di tano on! #Mat 6:33 3Ai nunga mate hamu, jala buni do ngolumuna raphon Kristus di bagasan Debata. #Rom 6:2 4Alai ia dung gabe patar sogot Kristus, hangoluanta i, disi ma gabe patar nang hamu raphon Ibana di bagasan hasangapon. #1Kor 15:43; Plp 1:21 5Antong, bunu hamu ma ruasmuna, angka na di tano on: parmainanon, hahodaron, riting ni roha, hisaphisap na roa, ro di pangahution, i ma pardebataon na leban. #Rom 6:6, 8:13 6Ala ni angka i do lalu rimas ni Debata. #Eps 5:6 7Diulahon hamu do angka i najolo, tagan di bagasan i ngolumuna. 8Alai anggo nuaeng, bolongkon hamu ma saluhutna i: Rimas, muruk, hajahaton, panginsahion hata barangsi sian pamanganmuna! #Eps 4:29, 31 9Unang ma masigabusan hamu, ai nunga ditanggal hamu jolma na buruk i rap dohot angka parulaonna, #Sak 8:16; Eps 4:22, 25 10jala nunga disolukkon hamu na imbaru i, na pinaimbaru, asa tandaonna rupa ni na tumompa ibana. #1Mus 1:27; Eps 4:24 11Ndang mardiaimbar disi Junani manang Jahudi, na marsunat manang na so marsunat, bangso na leban manang bangso na so maju dope, hatoban manang anak mata; Kristus i do tahe saluhutna jala di bagasan saluhutna. #Gal 3:28
II. 12Onpe, hamu angka naung pinillit ni Debata, angka na badia jala hinaholongan, solukkon hamu ma parasirohaon situtu, habasaron, haserepon, lambok dohot lambas ni roha! #1Ptr 2:9 13Masipauneunean jala masisesaan dosa ma hamu, jumpa marpangkurangi na sada dompak donganna; songon panesa ni Kristus di hamu, songon i ma nang hamu! #Mat 6:14; Eps 4:2, 32 14Alai diginjang ni saluhutna i: I ma haholongon ni roha i; ai i do rahutrahut ni nasa harimpason. #Rom 13:8, 10 15Jala dame ni Kristus i ma mangarajai di bagasan rohamuna, ai tusi do hamu dijou di bagasan sada daging. Gabe parroha mauliate ma hamu! #1Kor 12:13, 27; Plp 4:7 16Gugun ma hata ni Kristus maringanan di tongatongamuna; mardongan sandok hapistaran ma hamu masiajaran jala masipaingotan marhitehite angka ende psalmen, endeende pujipujian dohot ende partondion; endehon hamu ma Debata di bagasan rohamuna marroha hamauliateon! #Eps 5:19 17Jala na siulaon, manang di hata, manang di pambahenan, saluhutna i ma marhitehite Goar ni Tuhan Jesus, huhut mandok mauliate tu Debata Ama marhitehite Ibana. #1Kor 10:31
III. 18Hamu angka parompuan, oloi hamu ma hata ni hamulianmuna be, songon na tama di roha ni Tuhan i. #Eps 5:22-24 19Hamu angka baoa, haholongi hamu ma pardihutamuna be, jala unang ma jungking hamu maradophon nasida! #1Ptr 3:7 20Hamu angka dakdanak, sandok pangoloi ma hamu di natorasmuna, ai i do dihalomohon Tuhan i! #Eps 6:1 21Hamu angka amaama, unang gintali hamu angka anakkonmuna, asa unang mandele! 22Hamu angka anak somang, oloi hamu ma angka indukmuna na di tano on di na saluhutna; unang ma pangoloi di mata hamu, songon na mambuat roha ni jolma, marbulus ni roha ma, sian biar ni roha mida Tuhan i! #Eps 6:5-8 23Sian rohamuna ma ula hamu nasa sibahenonmuna; songon na tu Tuhan i, ndada tu jolma! 24Ingot hamu ma: Sian Tuhan i do jaloonmuna siteanon i, balos ni i Tuhan Kristus i ma oloi hamu! 25Ai na mangulahon hageduhon, porsanonna do na niulana i, so adong masa parnidanidaon di bohi. #Rom 2:11
Currently Selected:
KOLOSSE Bindu 3: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.