2 TESSALONIK Bindu 3
Bindu 3
Angka sipaingot: unang tadingkon hamu ruhut na denggan! 1-18.
1Angkup ni i, tangiangkon hamu ma hami, ale angka dongan, asa marlojong hata ni Tuhan i jala marsangap songon na di hamu, #Kol 4:3 2anggiat malua hami sian halak na jengkel jala na jahat i; ai ndang saluhutna olo porsea. 3Alai haposan do Tuhan i: Patoguonna do rohamu jala ramotanna do hamu maralohon na jahat i. #1Tes 5:24 4Na pos do rohanami mida hamu di bagasan Tuhan i, sai patupaonmuna do na hupodahon hami tu hamu, nang nuaeng, nang tu joloan on. #2Kor 7:16; Gal 5:10 5Sai ditogutogu Tuhan i ma rohamuna tu holong ni roha ni Debata dohot tu habengeton ni kristus i! 6Alai mangasahon Goar ni Tuhanta Jesus kristus: Hupaingot hami ma hamu, ale angka dongan: Sumurut ma hamu sian ganup dongan, na so maradat di parange, na so mangihuthon poda na jinalona sian hami! #Mat 18:17; Rom 16:17 7Ai diboto hamu do, manang songon dia patut tiruonmuna hami, ai ndada songon na so maradat hami di tongatongamuna; #1Tes 1:6 8ai ndada songon tamue sorang hami di manang ise hamu; loja do hami tahe jala ngalutan mulaulaon borngin dohot arian, unang sorat hamu hubahen. #1Kor 4:12 9Ndada na so marsahala hami nian, alai naeng pajongjongonnami dirinami tiruan di hamu, asa diihuthon hamu hami. #Mat 10:10; 1Kor 4:16 10Ai nang andorang di tongatongamuna hami, nunga hurodihon hami tu hamu: Na so ra mangula, unang ma ibana mangan! #1Mus 3:19 11Ai tarbege do tu hami, adong do deba sian hamuna na so maradat parangena, angka na so mulaulaon, na so siulaon do tahe dijama. 12Tu angka sisongon i hupatikkon jala hurodihon hami mangasahon Tuhan Jesus Kristus: Bulus ma nasida mulaulaon, asa na niomona be dihangoluhon. #1Tes 4:11 13Alai anggo hamu, ale angka dongan, unang ma marnaloja hamu mambahen na denggan! #Gal 6:9 14Alai ia so olo deba tumangihon hatanami na tarsurat on, patanda hamu ma i; unang ma marparsaoran hamu dohot ibana, asa tarila ibana. #1Kor 5:9, 11; 2Tes 3:6 15Jala unang ma nian rajumi hamu ibana songon musu, pasingot hamu ma ibana tahe songon dongan! 16Alai manongtong jala mangimpas ma damena dilehon Tuhan Sipardame i tu hamuna! Didongani Tuhan i ma hamu sudena! 17On ma tabingku sian ahu, si Paulus, na sinurat ni tanganku. Songon i do somal tandatanganku di nasa surathu. #1Kor 16:21 18Didongani asi ni roha ni Tuhanta Jesus Kristus ma hamu sudena!
Currently Selected:
2 TESSALONIK Bindu 3: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.