2 RAJARAJA Bindu 24
Bindu 24
Harajaon ni si Joiakim dohot si Joiakin 1-9.
Habubuang ni Juda parjolo tu Babel binahen ni raja Nebukadnesar 10-16.
Si Sedekia raja di Juda 17-20.
(Patud. 2Kron 36:6-13)
I. 1Uju di tingki ni si Joiakim, nangkok ma si Nebukadnesar, raja sian Babel, jadi mangoloi patu si Joiakim tu ibana tolu taon lelengna dung i marbalik ibana muse jala mangalo dompak si Nebukadnesar. 2Dung i disuru Jahowa ma angka parduaan ni parangan sian halak Kasdim, Ram, Moab dohot Amon mangalo ibana, disuru nasida asa solaonna Juda jala agoonna, hombar tu hata ni Jahowa naung nilumbahonna hian marhite sian angka panurirang, naposona i. #2Raj 21:10; Jer 20:4-5, 22:13 3Masa pe songon i tu halak Juda, hombar tu hata ni Jahowa hian, asa paholangonna nasida sian adopan ni bohina, ala ni angka dosa ni si Manasse, hombar tu sude na niulana i. #2Raj 21:10-16, 23:26-27 4Dohot ala ni mudar na so marpipot na ni durushonna, pola gok mudar na so marpipot Jerusalemi dibahen, dibahen i ndang olo be marpamuati roha ni Jahowa. #Ps 116:15 5Jamita na tinggal i dope sian si Joiakim ro di sandok na niulana, nda tarsurat do i di bagasan buku jamita ni angka raja sian Juda? 6Dung i monding ma si Joiakim gabe top dohot angka ompuna, jala si Joiakin anakna i bangkit raja singkatna. #Jer 22:18-19, 36:30 7Jadi olat ni ndang be morot raja ni Misir sian tanona, ai nunga dipapatu raja sian Babel saluhut tano na masuk tu gomgoman ni raja sian Misir na sai laon, olat ni sunge Misir sahat tu sunge Euprat. #1Raj 8:65; 2Raj 23:29; Jer 37:5, 7, 46:2 8Marumur sampulu ualu taon si Joiakin di na bangkit raja, jala tolu bulan lelengna ibana mangarajai di Jerusalem; ia goar ni inana i ma Nehusta, boru ni si Elnatan, sian Jerusalem. 9Jala diulahon ibana do sogo ni roha ni Jahowa, sandok songon na binahen ni amana. #2Raj 23:37
II. 10Di tingki uju i nangkok ma angka parangan ni si Nebukadnesar raja sian Babel dompak Jerusalem, laos dihubu ma huta i. #Dan 1:1 11Ro huhut si Nebukadnesar sandiri, raja sian Babel marporang dompak huta i, naung tinungkum ni angka paranganna hian. 12Dung i ruar ma si Joiakin, raja sian Juda mandapothon raja sian Babel rap dohot inana dohot angka parhaladona dohot angka partogi ni paranganna dohot angka siramoti bagasna; laos diboan raja sian Babel ma ibana paualu taonhon hinarajaonna i. #2Raj 18:31, 24:8, 15; Jer 21:9 13Diboan huhut sian i saluhut arta na di joro ni Jahowa dohot arta angka na di bagas ni rajai, jala dilongkangi sere i sian saluhut ulaula angka na pinauli ni si Salomo, raja sian Israel di bagasan joro ni Jahowa, songon naung nilumbahon ni Jahowa hian. #1Raj 7:48-50, 14:26, 15:18; 2Raj 20:17, 25:15 14Jala diboan tu habuangan sandok isi ni Jerusalem dohot sude angka induk dohot sude halak na marhuaso, sampulu ribu halak tarbuang, tole sude angka tungkang hau dohot tungkang bosi, ndang adong tinggal nanggo sahalak, nda holan halak na so mardihadiha sian bangso ni luat i. #1Sam 13:19; 2Raj 25:12; Jer 24:1 15Jadi dibuangkon ma si Joiakin tu Babel rap dohot ina ni rajai dohot angka jolma ni rajai ro di sude siramoti bagasna dohot halak na marhuaso di luat i, tarboan sian Jerusalem tu Babel. #2Raj 25:27; Jer 22:26, 24:1; Hes 17:13 16Dohot sude halak sialo musu, pitu ribu halak toropna, tole angka tungkang hau dohot tungkang bosi, saribu halak toropna ro di sude angka ulubalang na gogo, saluhutna i diboan raja sian Babel mambuangkon tu Babel. #Est 2:5-6; Jes 3:2; Hes 1:1-2
III. 17Dung i dipabangkit raja sian Babel ma si Matania, amangudana i gabe raja singkatna, jala dipauba goarna gabe Sedekia. #2Raj 23:34; Jer 37:1 18Marumur duapulu sada taon si Sedekia di na bangkit raja ibana, jala sampulu sada taon lelengna ibana mangarajai di Jerusalem; ia goar ni inana, i ma si Humuntal, boru ni si Jeremia, sian Libna. #2Raj 23:31; Jer 52:1-3 19Jala diulahon ibana do sogo ni roha ni Jahowa, sandok songon na binahen ni si Joiakim. #2Raj 23:37 20Ai ala rimas ni Jahowa umbahen masa songon i di Jerusalem dohot di Juda, paima ambolongkononna nasida sian adopan ni Bohina. Dung i marbalik ma si Sedekia mangalo dompak raja sian Babel. #2Raj 23:27; Jer 52:3; Hes 17:15
Currently Selected:
2 RAJARAJA Bindu 24: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.