2 KORINT Bindu 6
Bindu 6
Tiruan do parange ni apostel i 1-10.
Unang ma hamu saor tu portibi on 11-18.
I. 1Na mangapoi do hami, angka dongan pangula, asa unang magopo panjaloonmuna di asi ni roha ni Debata. #2Kor 1:24, 5:20 2Ai didok do: “Di tingki parasian do ho hutangihon, jala di ari haluaon do ho huurupi. Nuaeng ma tongon tingki parasian; nuaeng ma ari haluaon i!” #Jes 49:8; Luk 4:19, 21 3Ndang mangalehon partuktuhan hami di agia aha pe, asa unang hasurahan tohonannami. 4Di na saluhut hupatuduhon hami dirinami songon angka naposo ni Debata: Di bagasan habengeton godang, di bagasan angka haporsuhon, hasusaan dohot hagogotan; #2Kor 4:2 5di na hona pungkul, di na tarhurung, di bagasan hagunturon, di halojaon, di mangkar ni mata, di parpuasaon; #2Kor 11:23-27 6di bagasan hatomanon, di bagasan parbinotoan, lambas ni roha dohot habasaron, di bagasan Tondi Parbadia, di bagasan holong ni roha na so marpangansi; #1Tim 4:12 7di bagasan hata hasintongan, di bagasan hagogoon ni Debata, marhitehite sinjata hatigoran di siamun dohot hambirang; #1Kor 2:4 8mamolus sian hasangapon dohot haleaon, sian barita na roa dohot barita na denggan; songon angka na mangaliluhon, hape parsintong do; 9songon angka na so tinanda, hape na tinanda do; songon na naeng mate, hape na mangolu; songon angka na binunu, alai ndada na mate; #Ps 118:18; 2Kor 4:10-11 10songon angka na marsak, alai tongtong do parroha na las; songon angka na pogos, alai torop do dipamora; songon na so paradongan, hape saluhut do digomgom. #Plp 4:12-13
II. 11Buas do pandoknami tu hamu, halak Korint; ungkap do rohanami. 12Ndang mangingking rohanami maradophon hamu; rohamuna do na mangingking i. 13Songon na tu anakkonku ma hatangkon: Palambas hamu ma nang rohamuna, balos ni i! #1Kor 4:14 14Unang saauga hamu dohot angka na so porsea! Ai aha ma pardomuan ni hatigoran dohot na so uhum; jala aha do hasaoran ni hatiuron dohot haholomon? #Eps 5:11 15Beha ma domu Kristus dohot Belial; aha ma hatopan ni na porsea dohot na so porsea? 16Tung olo ma mardomu joro ni Debata dohot angka ajiajian? Ai joro ni Debata na mangolu i do hita, songon na nidok ni Debata: “Naeng di tongatonganasida do Ahu maringanan jala mardalani, gabe Debatanasida do Ahu, jala nasida gabe bangsongku.” #3Mus 26:12; 1Kor 3:16 17“Dibahen i, ruar ma hamu sian tongatonganasida jala paholang hamu ma dirimuna, ninna Tuhan i; unang ma jama hamu na ramun, asa hujangkon hamu!” #Jes 52:11; Pgk 18:4 18“Jala gabe Ama ma Ahu di hamu, jala hamu gabe anak dohot boru di Ahu, ninna Tuhan, Sigomgom parluhutan.” #Jer 31:9, 32:38
Currently Selected:
2 KORINT Bindu 6: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.