2 KORINT Bindu 3
Bindu 3
Surung ni tohonan di parjanjian na imbaru, martimbangkon padan na robi 1-18.
1Na mangulahi do hami mamujimuji dirinami? Manang na ringkot marsurat panindangion hami mandapothon hamu manang manjalo sian hamu, songon binahen ni na deba? #2Kor 5:12 2Hamu do suratnami, naung sinurathon tubagasan rohanami, na tinanda jala jinaha ni saluhut jolma. #1Kor 9:2 3Ai tanda do hamu surat ni Kristus na hupature hami, sinurat so dohot tinta, marhite sian Tondi ni Debata na mangolu, i do; ndada tu panuratan batu, alai di panuratan daging, i ma ateate. #2Mus 24:12 4Pos do rohanami taringot tusi tu Debata, marhitehite Kristus. 5Ndada tau hami sian dirinami, anggo tung mamingkiri agia aha sian dirinami; sandok sian Debata do hatauonnami. #2Kor 2:16 6Ibana do patauhon hami, gabe parhalado di padan na imbaru, na marhite sian Tondi i; ndada marhite sian surat, ai na mambunu do surat, Tondi i do pangoluhon. #Jer 31:31; Joh 6:63 7Alai gari parhaladoon hamatean, na marsurat, na niuhir tubagasan batu, gari marhasangapon do, pola so tarbahen anak Israel mamereng bohi ni si Musa, dibahen sangap na olo salpu i, na di bohina i: #2Mus 34:30 8Lam beha ma sangap ni parhaladoon ni Tondi i! #Gal 3:2, 5 9Ai marhasangapon do parhaladoon na tu uhum; nda lam sumurung ma hasangapon ni parhaladoon na tu hatigoran! #5Mus 27:26; Rom 1:17, 3:21 10Ai hira so marhasangapon be dohonon na marsangap disi, dibahen hasusurung ni hasangapon on. 11Ai molo sangap na olo salpu i, nda dao lumobi hasangapon ni na manongtong on! 12Marhiras ni roha situtu do hami, antong, mangasahon pangkirimon na sai balga. 13Ndang hutiru hami be si Musa, na mangkungkupi bohina, asa unang dibereng halak Israel ujung ni na olo salpu i. #2Mus 34:33, 35 14Alai gabe tangkang do rohanasida, ai ro di sadari on tong do tartutup parjanjian lama, jumpa dijaha i; laos so diungkap dope, ala holan di bagasan Kristus dipasohot i. #Rom 11:25 15Olo tahe, ro di sadari on peak do pangkuphupi i diatas rohanasida, uju dijaha surat ni si Musa. 16Alai disi mulak rohanasida mandapothon Tuhan i, buatonna ma pangkuphupi i. #Rom 11:23, 26 17Tuhan i do Tondi i; jala ia disi Tondi ni Tuhan i, disi do haluaon. 18Alai anggo hita saluhutna, angka na sinondangan ni hasangapon ni Tuhan i, so hungkup bohinta, paubaonna ma hita, gabe tudos tu rupana, mandapothon ragam ni hasangapon, marguru tu Tuhan ni Tondi i.
Currently Selected:
2 KORINT Bindu 3: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.