2 KRONIKA Bindu 19
Bindu 19
Panurirang Jehu manolsoli raja Josapat 1-3.
Dipabangkit rajai angka panguhum mangkajongjongkon uhum hasintongan 4-11.
I. 1Alai anggo si Josapat, raja sian Juda, mulak do mardamedame tu jabuna di Jerusalem. #2Kron 18:27 2Dung i ruar ma manjumpangkon ibana panurirang Jehu, anak ni si Hanani, jala ninna ma tu raja Josapat: Tung na jadi ma di roham tolongan halak parjahat manang haholongan halak na hinagigihon ni Jahowa? Marmuruk situtu Jahowa ala ni mida ho. #2Kron 16:7, 18:3, 20:35; Ps 101:3, 139:21 3Alai adong dope tahe jumpang ruhut na denggan sian ho, ala naung disiaphon ho angka sombaon Asera sian tano i jala nunga dipadiri ho roham, naeng mangalului Debata. #2Kron 12:12, 17:3-6
II. 4Dung i maringan di Jerusalem ma si Josapat; alai diulahi muse borhat maningkir bangso i sian Berseba sahat ro di dolok Epraim, jala mulak nasida ditogihon tu Jahowa, Debata ni ompunasida i. #2Kron 17:7 5Dung i dipabangkit ma angka panguhum di luat i, di bagasan saluhut huta ni Juda angka na gonting i, tung diganupi do huta i sadasada. #5Mus 16:18; 1Kron 26:32 6Dung i didok rajai ma tu angka panguhumi: Manat timbangi hamu na binahenmuna! Ai ndada di jolma hamu mandabu uhum, di Jahowa do, di lambungmuna do Ibana uju mandok uhum hamu. #5Mus 1:17; Ps 82:1 7Nuaeng pe sai songgop ma tu hamu biar mida Jahowa, sai ramoti hamu dirimuna, jala torang ulahon hamu! Ai ndang masa anggo di Jahowa Debatanta i uhum hageduhon, manang marmiak ni bohi, manang panjaloon sisip. #2Mus 18:21; 5Mus 10:17 8Nang di huta Jerusalem dipabangkit si Josapat deba sian halak Lepi dohot angka malim dohot sian angka induk marompuompu di Israel mangaradoti uhum ni Jahowa dohot paputus parbadaan; alai sai mulak nasida tu Jerusalem. #5Mus 17:8-9, 19:17; Ps 122:5 9Dung i gogo ma rajai mandok tu nasida: Ingkon songon i bahenonmuna di bagasan biar mida Jahowa, di bagasan hasintongan dohot sian roha sisangunjur. 10Nasa parbadaan tahe na tarboan tu jolomuna sian hahaanggimuna, angka na maringan di hutanasida be taringot tu mudar na durus, taringot tu partorang ni patik, tona, angka aturan dohot uhum, ingkon ajaranmuna nasida, asa unang marsala nasida tu Jahowa, gabe songgop maon rimasna tu hamu dohot tu hahaanggimuna i. Antong bahen hamu ma songon i, asa unang marsala hamu. #5Mus 17:8 11Jala ida ma, sintua ni malim Amasia do jujunganmuna taringot tu saluhut hata tu Jahowa; jala si Sebadia, anak ni Ismael, jujungan di pinompar ni Juda taringot tu sude hata tu rajai; tole muse halak Lepi bahen panuturi di jolomuna. Antong pir ma tondimuna laho mangulahon songon i! Jala sai donganan ni Jahowa do panguhum na denggan marroha! #5Mus 16:18
Currently Selected:
2 KRONIKA Bindu 19: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.