1 TIMOTEUS Bindu 5
Bindu 5
Siingoton ni si Timoteus maradophon na tuatua dohot na mabalu 1-16.
Maradophon angka sintua 17-25.
I. 1Unang songgahi na tuatua; alai apoi ma ibana songon ama, angka na poso i songon anggi; #3Mus 19:32 2angka parompuan na tuatua songon ina, angka na umposo songon iboto; alai marhatomanon situtu. 3Parompuan na mabalu parsangapi, anggo na mabalu na tutu. #1Tim 5:5 4Alai anggo maranakkon manang marpahompu ina na mabalu i, nasida ma jumolo sumarihon donganna sabagas i di bagasan hadaulaton, mambahen pamaloson tu natuatuana, ai i do dihalomohon Debata. 5Alai anggo na mabalu na tutu, na so mardihadiha, mangkirim ma tu Debata, jala manongtong mangido dohot martangiang arian dohot borngin. #Luk 2:37 6Alai anggo diulahon hisaphisap, naung mate do i, nang mangolu dope. 7I ma patikkon, asa so hasurahan nasida. 8Alai na so sumarihon donganna, haputusan donganna sabagas, naung mansoadahon haporseaon do i; jumahat do i sian halak na so porsea. 9Ndang sipilliton ina na mabalu, ia so gok onompulu taon umurna, naung sahali marhamulian. 10Ingkon denggan do ulaonna dihatindangkon halak: Anggo dipagodanggodang anakkonna, las rohana martamue, diburi pat ni angka na badia, diurupi angka na di bagasan haporsuhon, dieahi nasa ulaon na denggan. #Heb 13:2 11Alai pasiding ma angka boruboru na mabalu na poso; ai ia dung garang rohanasida maralohon Kristus, naeng ma marhamulian nasida. 12Sisaritaon do nasida, ala nunga ditadingkon haburjuonnasida di mulana. 13Angkup ni i, marlanggelangge do nasida; diringkoti na merbaserbas tu bagas ni halak; alai tamba ni parlanggelanggeon i: Na gabe sihapodea do nasida, angka na juit, sihatahon na so marguna. 14Onpe, dipangido rohangku: Marhamulian ma angka na sopot mabalu, asa tubutubuan, patureturehon bagasna, unang dilehon tu alo i parbonsiran, laho manginsahi. #1Kor 7:9 15Ai nunga sanga marbalik deba mangihuthon sibolis i. 16Alai molo adong na mabalu, na marsolhothon na porsea, i ma patureturehon nasida, asa tarpatureture huria i na mabalu na tutu.
II. 17Silompit do jujuron hasangapon ni sintua, na burju mangula hasintuaon, gumodang ma tu angka na mangulahon hata dohot poda. #Rom 12:8 18Ai didok Surat i: “Ndang jadi huntamonmu baba ni horbo na mardege!” dohot: “Na tama do di pangula upana!” #5Mus 25:4; Luk 10:7; 1Kor 9:9 19Unang jalo pangaluan dompak sintua, ia so di jolo ni dua manang tolu sitindangi. #5Mus 19:15; 2Kor 13:1 20Angka na mardosa i pinsang di jolo ni saluhutna, asa mabiar nang angka dongan. #Gal 2:14 21Humangmangi ho di jolo ni Debata dohot Kristus Jesus, nang di jolo ni surusuruan ni Debata, angka na tarpillit: Unang maralangalang roham mangaradoti angka ondeng, unang ma mardingkandingkan! 22Unang hapogani mangampehon tanganmu tu halak; unang saor ho tu dosa ni na leban. Ramoti dirim, asa ias ho! #1Tim 4:14 23Unang sai minum aek ho; pangke ma anggur sasaotik, daon ni butuha, ai jotjot do ho gale. 24Di na deba halak patar hian do dosana, tagan so songgop dope uhum; ia di na deba mangihut sian pudi nama. 25Suang songon i: Patar do angka ulaon na denggan; jala nang pe asing, tong ndang tarbahensa buni!
Currently Selected:
1 TIMOTEUS Bindu 5: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.