1 TESSALONIK Bindu 5
Bindu 5
Dungo ma hamu managam ari haroro ni Kristus! 1-11.
Angka sipaingot 12-28.
I. 1Alai ndang pola suraton tu hamu, ale angka dongan, taringot tu tingkina dohot sadiharina. #Mat 24:36 2Ai diboto hamu do tangkas, na songon panangko borngin do haroro ni ari ni Tuhan i. #Mat 24:42-44; 2Ptr 3:10; Pgk 3:3, 16:15 3Ai molo didok halak, dame do jala mora so adong, disi ma tompu tahop tu nasida hamagoan i, songon pambebeon tu na gabegabean, jala ndang adong haporusannasida. #Jer 6:14; Mat 24:39 4Alai hamu, ale angka dongan, ndang di bagasan na holom hamu: So tung hatiuran ari hamu songon panangko! 5Ai saluhutna do hamu anak hatiuron jala anak arian; ndang sian borngin hita manang sian haholomon. #Rom 13:12; Eps 5:9 6Antong, sai unang ma tarpodom hita, songon angka na leban; sai dungo ma hita jala marroha na torang! 7Ai borngin i do tarpodom angka na modom i, jala borngin i do mabuk angka na mabuk i. 8Alai anggo hita na sian arian, marroha na torang ma hita, tasolukkon ma haporseaon dohot haholongon songon baju partahanan jala tajujung ma pangkirimon ni roha di haluaon! #Eps 6:14-17 9Ai ndang dipadiri Debata hita bahen sirimasan; alai naeng ma dapotan haluahon hita marhite sian Tuhanta Jesus Kristus, 10naung mate humongkop hita, asa sandok mangolu hita rap dohot Ibana, manang na dungo (mangolu) dope hita, manang naung modom pe. #Rom 14:8-9; 1Tes 4:14 11Dibahen i, sai masipaingotan ma hamu jala masipauliulian, songon naung binahenmuna. #Jud 1:20
II. 12Huelehelek hami ma hamu, ale angka dongan, tanda hamu ma angka na mangkalojahon hamu, angka na manguluhon hamu marhitehite Tuhan i, ro di angka na paingothon hamu! #1Kor 16:18 13Sangap situtu ma rajumi hamu nasida mardongan holong ni roha ala ni ulaonnasida! Sai mardame ma hamu sama hamu! 14Alai huapoi hami ma hamu, ale angka dongan, sai paingot hamu ma angka na so maradat, apuli hamu ma angka siotik roha, anju hamu ma angka na gale, lambas ma rohamuna dompak saluhutna! #2Tes 3:15 15Matamatahon hamu ma, asa unang dibaloshon manang ise na roa balos ni na roa; na denggan ma pareahi hamu tongtong, nang sama hamu, nang tu saluhut halak. #Poda 20:22; Rom 12:17; 1Ptr 3:9 16Tongtong ma hamu marlas ni roha! #Plp 4:4 17Unang mansadi hamu martangiang! #Luk 18:1; Rom 12:12; Kol 4:2 18Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus. #Eps 5:20 19Unang intopi hamu tondi i! #1Kor 14:30, 39 20Unang lea rohamuna di panurirangon! #1Kor 14:1 21Tangkasi hamu ma saluhutna; na denggan i ma tiop hamu! #1Kor 14:29; 1Joh 4:1 22Pasiding hamu ma nasa rumang ni na roa! 23Diparbadiai Debata pardame i ma hamu gabe sun denggan, jala diramoti ma tondimuna, nang roha, nang daging, asa ias, so hasurahan di haroro ni Tuhanta Jesus Kristus! 24Haposan do Ibana na manjou hamu; sai pasautonna do i. #1Kor 1:9; 2Tes 3:3 25Ale angka dongan, tangiangkon hamu ma hami! 26Mandok tabi ma hamu tu saluhut dongan mardongan umma na badia i! #Rom 16:16; 1Kor 16:20; 2Kor 13:12 27Huelehelek ma hamu di jolo ni Tuhan i, asa dipajahahon hamu surat on tu saluhut dongan. 28Didongani asi ni roha ni Tuhanta Jesus Kristus ma hamuna!
Currently Selected:
1 TESSALONIK Bindu 5: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.