1 JOHANNES Bindu 5
Bindu 5
Taringot tu haporseaon, haojahanta i 1-13.
Taringot tu partangiangon dohot parsaoran tu Debata, di bagasan Tuhan Jesus 14-21.
I. 1Ganup na porsea, Jesus do Kristus, i do naung tubu sian Debata, jala ganup na mangkaholongi Ibana na manubuhon, haholongan ni i do nang na tubu sian Ibana. #1Joh 4:15-16 2Sian on do taboto, naung holong rohanta di angka anak ni Debata: Molo tahaholongi Debata jala taradoti patikna. 3Ai on do holong ni roha di Debata; molo taradoti patikna. Ndada na dokdok patikna i. #Mat 11:30; Joh 14:15, 23; 1Joh 2:5 4Ai nasa na tubu sian Debata do manaluhon portibi on. Haporseaonta i do naung monang manaluhon portibi on. #Joh 16:33 5Ise do na manaluhon portibi on, ia so na porsea di Jesus Kristus, Anak ni Debata? #1Joh 4:4 6Ibana do i, naung ro marhitehite aek dohot mudar, Jesus Kristus; ndada holan di bagasan aek i, di bagasan aek dohot mudar, i do! Jala Tondi i do na mangkatindangkon, ai hasintongan do Tondi i. #Joh 19:34-35 7Ai tolu do na mangkatindangkon. 8I ma Tondi i, aek i dohot mudar i; jala sada do na tolu i. 9Ia panindangion sian jolma tajalo do; alai sumurung do panindangion na sian Debata, ai panindangion na sian Debata do on, na hinatindangkonna taringot tu Anakna i. 10Na porsea di Anak ni Debata, ditiop do panindangion i. Na so porsea di Debata, i ma mambahen Ibana pargabus, ala so porsea ibana di na hinatindangkon ni Debata taringot tu Anakna i. #Rom 8:16 11Jala on do panindangion i: Naung dibasabasahon Debata do tu hita hangoluan salelenglelengna, jala di bagasan Anakna do hangoluan i. 12Ia di ibana Anak i, di ibana do hangoluan i; ia so di ibana Anak ni Debata, ndang di ibana hangoluan i. #Joh 3:36, 14:6 13Umbahen na husurat angka i tu hamu, angka na porsea di Goar ni Anak ni Debata: Naeng botoonmuna, naung di hamu do hangoluan na salelenglelengna!
II. 14On do hiras ni rohanta maradophon Ibana: Molo tapangido manang aha marguru tu lomo ni rohana, tangihononna do hita. #Joh 14:13, 16:23; 1Joh 3:21-22 15Jala molo taboto, tangihononna do hita di nasa na tapangido, gabe taboto, saut ma di hita angka na tapangido i sian Ibana. 16Ia diida halak donganna, mangulahon dosa na so marhapatean tu hamatean, martangiang ma ibana, dung i basabasahononna ma tu ibana hangoluan; i ma di angka na mardosa na so marhapatean tu hamatean. Adong do dosa na marhapatean tu hamatean; ndang hudok, tangiangkononhon anggo i. #Mat 12:31; Heb 6:4-6 17Dosa do nasa hageduhon, jala adong do dosa na so marhapatean tu hamatean. 18Taboto do, na so mardosa nasa naung tubu sian Debata; alai na marsihohot tu Debata do halak, naung tubu sian Ibana, jala ndang tarhahua parjahat i ibana. #1Joh 3:9 19Taboto, na sian Debata do hita, jala di bagasan hajahaton do nasa portibi on. #Gal 1:4; 1Joh 4:4 20Alai taboto do, naung ro Anak ni Debata jala dilehon roha tu hita, asa tatanda Parsintong i. Di bagasan Parsintong i do hita, di bagasan Anakna Jesus Kristus. Ibana do Debata na sintong dohot hangoluan salelenglelengna. #Joh 17:3; Rom 9:5 21Hamu angka anaha, jaga hamu ma dirimuna maralohon debata sileban! #1Kor 10:14
Currently Selected:
1 JOHANNES Bindu 5: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.