1 KORINT Bindu 3
Bindu 3
Pangula ni Kristus do angka parbarita na uli 1-9.
Kristus i do ojahan ni huria i 10-15.
Joro ni Debata do huria i 16-23.
I. 1Ahu pe, ale angka dongan, ndang tarbahen ahu mangkatai tu hamu uju i songon na tu angka partondi, sandok songon na tu angka pardaging do jala posoposo di bagasan Kristus. #Joh 16:12 2Susu do hupainumhon tu hamu, ndada sipanganon hian, ai ndang tarjalo hamu i uju i; gari nuaeng, gari so tarjalo hamu dope! #Heb 5:12-13; 1Ptr 2:2 3Ai tong dope hamu pardaging. Ai anggo masa di hamu pangiburuon dohot parsalisian, nda pardaging hamu jala mamarangehon ruhut hajolmaon? #1Kor 1:10-11, 11:18 4Ai nda parroha hajolmaon hamu, molo adong na mandok: Sisean ni Paulus do ahu, jala na sada an: Sisean ni Apollos do anggo ahu? #1Kor 1:12 5Ai ise Apollos; ise Paulus? Parhalado do nasida, parhiteanmuna gabe porsea, jala ganup hombar tu pangalehon ni Tuhan i di ibana. #Ul 18:24, 27 6Ahu do manuan, Apollos do pabornokkon; alai Debata do patubuhon. #Ul 18:4, 11 7Asa ndada rajuman na manuan manang na pabornokkon; Debata na patubuhon, i do! 8Dos do na manuan dohot na pabornokkonsa; alai ganup do manjalo upana, hombar tu pangulaonna be. #1Kor 4:5 9Ai dongan pangula ni Debata do hami; hauma ni Debata, bagas ni Debata do anggo hamu. #Mat 13:3-9; Eps 2:20
II. 10Hombar tu asi ni roha ni Debata na nilehonna i tu ahu, hupauli ojahan i, songon binahen ni pande bagas na bisuk; na asing do muse pajongjong bagas i. Alai ganup ma mamatahon, manang beha pangulaonna disi. #1Kor 15:10 11Ai ndang tarpauli ojahan na asing, dungkon ni naung ojak i, i ma Jesus Kristus i. #1Ptr 2:4-6 12Asa molo dipauli diatas ojahan i manang sere, perak, batu na arga, hau, lamlam manang durame: 13Gabe patar do na niula ni ganup. Ari sogot i do paullophonsa, ai papataron ni api ma i; asa api i do mangunjuni, manang beha ulaon ni ganup. #1Kor 4:5 14Molo hot ulaon na pinaulina i, jaloonna do upa. 15Molo soksohanna niulana i, luangan ma ibana; malua do nian anggo ibana, alai songon na nienet sian api nama.
III. 16Ndang diboto hamu: Joro ni Debata hamu, jala Tondi ni Debata maringanan di bagasan hamu? #1Kor 6:19; 2Kor 6:16 17Agohonon ni Debata do na mangagohon joro ni Debata, ai na badia do joro ni Debata; i ma hamu. 18Unang adong na paotootohon dirina. Molo adong dietong na bisuk di tongatongamuna di portibi on, gabe na oto ma ibana jolo, anggiat gabe na bisuk muse. #Pgk 3:17-18 19Ai anggo di jolo ni Debata haotoon do habisuhon ni portibi on, ai tarsurat do: “Ditangkup do angka na bisuk di bagasan angkalnasida.” #Job 5:12-13 20Jala muse: “Diboto Tuhan i do, na so marniula pingkiran ni angka na bisuk!” #Ps 94:11 21Asa unang ma adong na manenganengahon jolma, ai sasudena i di hamu do. 22Manang Paulus, Apollos, Kepas, hasiangan on, hangoluan, hamatean, na masa nuaeng dohot na songgop sogot pe, saluhutna do di hamu. #1Kor 1:12 23Alai di Kristus do hamu, jala di Debata do anggo Kristus. #1Kor 11:3
Currently Selected:
1 KORINT Bindu 3: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.