1 KRONIKA Bindu 5
Bindu 5
Partuturan dohot jamita ni marga Ruben 1-10.
Marga Gad 11-17.
Hamusuon ni na tolu margai dompak halak Hagar i 18-22.
Angka induk ni marga Manasse 23-24.
Habubuangnasida tu Assur 25-41.
I. 1Ia angka anak ni si Ruben, buhabaju ni si Israel; ai ibana do tutu buhabajuna, alai ala na niramunanna i podoman ni amana i, gabe bali sahalana sihahaan tu angka anak ni si Josep, anak ni Israel; alai tahe ndang tarjujur tu ibana sahala sihahaan. #1Mus 35:22, 49:4 2Ai si Juda nian na sumangap sian angka hahaanggina, gabe sahat tu ibana jujungan partogion, alai anggo sahala sihahaan tu si Josep do. #1Mus 49:8, 10, 22; 5Mus 33:7, 13-17 3Ia angka anak ni si Ruben, buhabaju ni Israel i ma: Si Hanok, si Pallu, si Hesron dohot si Karmi. #2Mus 6:14 4Ia angka anak ni si Joel i ma: Si Semaya, na manubuhon si Gog, anak ni muse si Simei. 5Anak ni si Simei do si Mika, anak ni muse si Reia, anak ni muse si Baal. 6Anak ni muse si Beera, na binoan ni si Tiglat Pelesar, raja sian Assur tu habuangan; ibana do sada induk di halak Ruben. #1Kron 5:26 7Alai anggo hahaanggina marompuompu mangihuthon aturan ni sundutsundutnasida marihutan do tu si Jeiel dohot si Sakaria. 8Tole muse si Bela, anak ni si Asas, anak ni si Sema, anak ni si Joel, maringan do ibana di Aroer sahat ro di Nebo dohot Baal-Meon. 9Dung i maringan ibana tungkan habinsaran, sahat tu partalpahan ni halongonan na mardonokkon Euprat, ai mansai sinur do dorbianasida di tano Gilead. 10Jala uju di tingki ni si Saul marporang do nasida dompak halak Hagar i, gabe marragean nasida dibahen, laos disoluk do undungundungnasida di sandok partalpahanna tungkan habinsaran sian Gilead.
II. 11Maringan huhut patondong dohot nasida halak Gad, di tano Basan sahat ro di Salka. 12Si Joel do jujunganna parjolo, jala si Sapam paidua tole muse si Janai dohot si Sapat di Basan. 13Jala hahaangginasida mangihuthon pinompar ni ompuna be i ma: Si Mikhael, si Mesulam, si Seba, si Jorai, si Jakan, si Sia dohot si Heber, na pitu i do. 14On do angka anak ni si Abihail, anak ni si Huri, anak ni si Jaroa, anak ni si Gilead, anak ni si Mikhael, anak ni si Jesisai, anak ni si Jahdo, anak ni si Bus. 15Tole muse si Ahi anak ni si Abdiel, anak ni si Guni, i ma partogi ni pinompar ni ompuna. 16Jala maringan nasida di Gilead di Basan dohot di bagasan angka sosorna dohot di saluhut luat humaliang Saron sahat ro di partalpahanna. 17Luhutna i tarbilang do uju di tingki ni si Jotam, raja sian Juda dohot uju di tingki ni si Jerobeam, raja sian Israel. #2Raj 14:23, 15:32
III. 18Ia angka pinompar ni si Ruben, si Gad dohot satonga marga Manasse, nasa baoa sialo musu, angka na manandang hujur dohot podang, jala angka sisintak sior dohot angka na somal marmusu, opatpulu opat ribu pitu ratus onompulu halak toropna, angka na borhat tu parporangan. 19Jadi saut ma nasida marporang dompak halak Hagar i, Jetur, Napis dohot Nodab. 20Jadi dapotan pangurupion ma nasida, gabe sahat ma halak Hagar i tu tangannasida ro di saluhut halak na hinaranasida; ai joujou do nasida tu Debata di tongtangan jala dioloi Ibana do pangidoannasida, ala marhaposan tu Ibana do nasida. 21Jadi tarboan ma dohot dorbianasida, limapulu ribu unto jala dua ratus limapulu ribu birubiru, jala dua ribu halode angkup ni saratus ribu jolma na mangolu. 22Ai mansai torop jolma marragean dibunu, ala sian Debata parporangan i; laos disoluk nasida inganannasida i sahat ro di tingki habubuangnasida.
IV. 23Ia pinompar ni satonga marga Manasse, maringan do di tano olat ni Basan sahat ro di Baal Hermon dohot Senir ro di dolok Hermon, ai torop do nasida. #5Mus 3:9 24Jala angka on do jujungan ni pinomparna marompuompu: Si Eper, si Isai, si Eliel, si Asriel, si Jeremia, si Hodapia, si Jahdiel, luhut do halak ulubalang angka na tarbarita, jala jujungan di pinompar ni ompunasida i.
V. 25Alai dung mardosa nasida dompak Debata ni ompunasida i jala marmainan nasida mangihuthon angka debata ni angka bangso isi ni tano i, angka na niago ni Debata nian maradophon nasida. 26Jadi disunggul Debata ni halak Israel ma tondi ni si Pul, raja sian Assur dohot tondi ni si Tiglat Pelesar, raja sian Assur, asa ibana mambuangkon halak Ruben, Gad dohot satonga marga Manasse, jala diboan nasida tu Hala, Habor dohot Hara dohot tu batang aek Gozan tahe rasirasa sadarion. #2Raj 15:19, 29 27Ia angka anak ni si Lepi on do: Si Gerson, si Kohat dohot si Merari. #1Kron 6:1, 3 28Ia angka anak ni si Kohat: Si Amram, si Ishar, si Hebron dohot si Usiel. #1Kron 23:12-13 29Ia angka anak ni si Amram: Si Aron, si Musa dohot si Miryam. Ia angka anak ni si Aron: Si Nadab dohot si Abihu, si Eleasar dohot si Itamar. #2Mus 6:20, 23, 25; 1Kron 6:35-38 30Si Eleasar manubuhon si Pinehas, na manubuhon si Abisua. 31Si Abisua manubuhon si Bukki, na manubuhon si Usi. 32Si Usi manubuhon si Seraia, na manubuhon si Merayot. 33Si Merayot manubuhon si Amaria, na manubuhon si Ahitub. 34Si Ahitub manubuhon si Sadok, na manubuhon si Ahimas. #2Sam 8:17, 15:27, 36 35Si Ahimas manubuhon si Azaria, na manubuhon si Johanan. 36Si Johanan manubuhon si Azaria, ibana do na mangaradoti hamalimon di bagasan joro, na pinajongjong ni si Salomo di Jerusalem. 37Si Azaria manubuhon si Amaria, na manubuhon si Ahitub. 38Si Ahitub manubuhon si Sadok, na manubuhon si Sallum. 39Si Sallum manubuhon si Hilkia, na manubuhon si Azaria. #2Raj 22:4 40Si Azaria manubuhon si Seraia, na manubuhon si Josadak. #2Raj 25:18; Esr 7:1; Neh 12:26 41Alai anggo si Josadak tarboan do tu habuangan uju na binuangkon ni Jahowa halak Juda dohot Jerusalem marhite sian si Nebukadnesar. #2Raj 25:21
Currently Selected:
1 KRONIKA Bindu 5: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.