1 KRONIKA Bindu 18
Bindu 18
Angka hamonangan ni si Daud maralohon halak Palistim, Moab, Ram dohot Edom 1-13.
Angka parhalado ni si Daud 14-17.
(Patud. 2Sam 8:1-18)
I. 1Jadi dung salpu angka i, ditaluhon si Daud ma halak Palistim, tung tarjepol situtu nasida dibahen, dirampas ibana huhut huta Gat, ro di huta angka na masuk tusi sian tangan ni halak Palistim. 2Ditaluhon muse halak Moab, gabe mangoloi patu nasida tu si Daud jala manggarar sohe. #Pangh 3:14-15; 1Sam 14:11; 1Raj 5:1 3Ditaluhon si Daud huhut Hadateser, raja sian Zoba, di Hemat, uju na laho ibana pahothon gomgomanna di pasir ni batang aek Euprat. #1Sam 14:47; Ps 60:2 4Dung i dilaum si Daud ma sian ibana saribu hureta porang dohot pitu ribu halak parsihundul dohot duapulu ribu halak parhantarhantar; jala ditallik si Daud do doldol ni saluhut hoda sitait hureta, saratus pasang sambing sian i ditinggalhon di ibana. #5Mus 17:16; Jos 11:6, 9 5Alai ro ma halak Ram sian Damaskus naeng manolongi si Hadateser, raja sian Zoba; gabe mate halak Ram i duapulu dua ribu halak, dibunu si Daud. #1Mus 14:15 6Dung i dipajongjong si Daud ma angka benteng di Ram humaliang Damaskus, jadi mangoloi patu ma halak Ram tu si Daud huhut manggarar sohe; ai sai ditumpak Jahowa do si Daud monang manang dompak dia ibana mangalangka. #Jos 1:9; 2Sam 7:9; 1Kron 18:2 7Dung i dibuat si Daud ma lombulombu sere, angka na pinaboanboan ni naposo ni Hadateser, jala ditaruhon angka i tu Jerusalem. #2Sam 8:7; 1Raj 10:16 8Dibuat si Daud huhut sian Teba dohot sian Kun, angka huta ni si Hadateser mansai godang tombaga; sian i dipauli si Salomo muse tobat tombaga ro di tiang na dua i dohot angka ulaula tombaga. #1Mus 22:23; 1Raj 7:15, 23, 27 9Jadi dung dibege si Tou, raja di Hemat, naung ditaluhon si Daud sandok parangan ni si Hadateser, raja sian Zoba. #4Mus 16:21; 1Raj 8:65 10Disuru ibana ma anakna Hadoram manopot raja Daud manangkasi sonangna dohot mamasumasu ibana, ala naung pinorangna Hadateser, jala naung tinaluhonna ibana, ai marmusu tihus hian do si Tou dompak si Hadateser; ditongoshon muse ulaula sere, perak dohot tombaga marragamragam. #2Raj 5:5 11Angka i pe diparbadiai raja Daud do laho pasahathon tu Jahowa rap dohot perak dohot sere naung binuatna sian saluhut bangso parbegu, sian halak Edom, Moab, Amon, Palistim dohot Amalek. #1Kron 29:2 12Angkup ni ditaluhon si Abisai, anak ni Nai Seruia do halak Edom di rura parsiraan, sampulu ualu ribu halak toropna. #2Sam 8:13 13Dung i dipambahen ma angka benteng di Edom, gabe patu saluhut halak Edom dibahen si Daud, ai ditumpak Jahowa do si Daud monang manang dompak dia ibana mangalangka.
II. 14Jadi dirajai si Daud ma sandok halak Israel jala dihajongjongkon uhum dohot hatigoran di sandok bangsona i. #Jer 23:5, 33:15-16 15Alai anggo si Joab, anak ni Nai Seruia manguluhon angka parangan, jala si Josapat, anak ni si Ahilud do panuturi. #1Kron 2:16 16Jala si Sadok, anak ni si Ahitub dohot Abimelek, anak ni si Abiatar, i ma angka malim, jala Sausa do juaratulis. #1Raj 4:3; 1Kron 5:30-34, 24:3, 6, 31 17Jala si Benaia, anak ni si Joiada, panahatan ni angka hupas dohot rundo. Alai anggo angka anak ni si Daud, i ma angka na sumolhot di lambung ni rajai. #1Kron 11:22-25
Currently Selected:
1 KRONIKA Bindu 18: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.