નીતિવચનો 7
7
1મારા દીકરા, મારાં વચનો પાળ,
અને મારી આજ્ઞાઓ
તારી પાસે સંઘરી રાખ.
2મારી આજ્ઞાઓ પાળીને જીવતો રહે;
મારા શિક્ષણનું તારી આંખની કીકીની
જેમ [જતન કર].
3તેઓને તારી આંગળીઓ પર બાંધ;
તેઓને તારા હ્રદયપટ પર લખી રખ.
4જ્ઞાનને કહે, ‘તું મારી બહેન છે;’
અને બુદ્ધિને સગી બહેન
કહીને બોલાવ;
5જેથી તેઓ તને પરસ્ત્રીથી,
પોતાના શબ્દો વડે ખુશામત કરનાર
પરનારીથી બચાવે.
પતિતાનો મોહપાશ
6કેમ કે મેં મારા ઘરની બારી પાસે રહીને
જાળીમાંથી સામી નજર નાખી;
7અને મેં ભોળા જુવાનોને જોયા,
તો તેમાં એક અક્કલહીન જુવાનિયો
મારી નજરે પડ્યો.
8તે તેના ઘર તરફ રસ્તામાં ચાલતો હતો,
અને ચાલતો ચાલતો તેને ઘેર ગયો;
9તે વખતે સાંજ પડી ગઈ હતી,
રાતનું અંધારું ફેલાતું હતું.
10ત્યારે, વેશ્યાનાં વસ્ત્રોમાં
સજ્જ થયેલી,
તથા કપટી મનની
એક સ્ત્રી તેને મળી.
11તે પટપટ બોલનારી તથા સ્વચ્છંદી છે;
તેના પગ પોતાના ઘરમાં ટકતા નથી;
12વખતે તે ગલીઓમાં હોય, અને વખતે
ચોકમાંયે હોય છે,
અને ખૂણે ખૂણે તાકીને જુએ છે.
13હવે તેણે પેલાને પકડીને ચુંબન કર્યું,
અને નિર્લજ્જ મોઢે તેને કહ્યું,
14‘શાંત્યપર્ણો મારી પાસે
[તૈયાર કરેલાં] છે;
આજ મેં મારી માનતાઓ
પૂરી કરી છે.
15તેથી હું તને મળવાને માટે બહાર
નીકળી આવી હતી,
યત્નથી તને શોધવા આવી હતી,
અને તું મને મળ્યો છે.
16મેં મારા પલંગ પર
ભરતકામના ગાલીચા,
તથા મિસરી સૂતરનાં સુંદર વસ્ત્ર
બિછાવ્યાં છે.
17મેં મારું બિછાનું બોળ, અગર તથા
તજથી સુગંધીદાર બનાવ્યું છે.
18ચાલ, આપણે સવાર સુધી પેટપૂર
પ્રેમનો અનુભવ કરીએ;
અને પ્રેમની મઝા ઉડાવીએ.
19કેમ કે ઘરધણી ઘેર નથી,
તે લાંબી મુસાફરીએ ગયો છે;
20તે પોતાની સાથે પૈસાની થેલી
લઈ ગયો છે;
તે પૂનમે ઘેર આવશે.’
21તે પોતાના ઘણા મીઠા બોલોથી
તેને વશ કરે છે,
અને પોતાના હોઠોની ખુશામતથી
તે તેને તાણી જાય છે.
22જેમ બળદ કસાઈવાડે જાય છે,
જેમ [બેડી નખાવીને] મૂર્ખ સજા
ભોગવવા જાય છે, તેમ તે તરત
તેની પાછળ જાય છે;
23આખરે તેનું કલેજું તીરથી વીંધાય છે;
જેમ કોઈ પક્ષી પોતાનો જીવ જશે
એમ જાણ્યા વગર જાળમાં ધસી જાય
છે, તેમ તે [જાય છે].
24હવે મારા દીકરા, સાંભળ,
અને મારા મુખનાં વચનો પર
લક્ષ આપ.
25તારું હ્રદય તેના માર્ગો તરફ
વળવા ન દે,
તેના રસ્તાઓમાં ભટકીને જતો નહિ.
26કેમ કે તેણે ઘણાને ઘાયલ કરીને
પાયમાલ કર્યા છે;
તેનાથી માર્યા ગયેલાઓની સંખ્યા
મોટી ફોજ જેવી છે.
27તેનું ઘર શેઓલનો માર્ગ છે કે,
જે મૃત્યુના ઓરડામાં પહોંચાડે છે.
Currently Selected:
નીતિવચનો 7: GUJOVBSI
Highlight
Copy
Compare
Share
Want to have your highlights saved across all your devices? Sign up or sign in
Gujarati OV Reference Bible - પવિત્ર બાઇબલ
Copyright © Bible Society of India, 2016.
Used by permission. All rights reserved worldwide.
