નીતિવચનો 31
31
1લમુએલ રાજાની માએ જે
ઈશ્વરવાણી તેને શીખવી હતી
તે [આ] છે:
2“મારા દીકરા, હું શું [કહું] ? હે મારા
પેટના દીકરા, શું [કહું] ?
હે મારી માનતાઓના દીકરા,
શું [કહું] ?
3સ્ત્રીઓને તારું બળ,
તથા રાજાઓનો નાશ કરનારાને
તું વશ થતો નહિ.
4હે લમુએલ, દ્રાક્ષારસ પીવો
એ રાજાઓને ઘટારત નથી,
એ રાજાઓને છાજતું નથી;
વળી, મદિરા ક્યાં છે? [એમ કહેવું]
હાકેમોને શોભતું નથી.
5રખેને તેઓ તે પીને નિયમને
વીસરી જાય,
અને કોઈ દુ:ખીનો
ઇનસાફ ઊંઘો વાળે.
6જે મરવાની અણી પર હોય તેને મદિરા,
અને જેનું મન દુ:ખી હોય
તેને દ્રાક્ષારસ આપ;
7ભલે તે પીને પોતાની દરિદ્રતા
ભૂલી જાય,
અને પોતાનું દુ:ખ ફરી કદી
તેને યાદ આવે નહિ.
8મૂંગાઓને ખાતર તથા સર્વ નિરાધાર
માણસોના પક્ષમાં,
તું તારું મુખ ઉઘાડ.
9તારું મુખ ઉઘાડીને અદલ ઇનસાફ કર,
અને ગરીબ તથા દરીદ્રીને
ન્યાય આપ.”
આદર્શ પત્નીની ગુણગાથા
10સદગુણી સ્ત્રી કોને મળે?
કેમ કે તેનું મૂલ્ય તો રત્નો કરતાં
ઘણું જ વધારે છે.
11તેના પતિનું અંત:કરણ તેના પર
ભરોસો રાખે છે,
અને તેને સંપત્તિની ખોટ પડશે નહિ.
12પોતાના આયુષ્યના સર્વ દિવસો પર્યંત,
તે તેનું ભલું જ કરે છે,
અને ભૂંડું કદી નહિ.
13તે ઊન તથા શણ શોધી લાવે છે,
અને રાજીખુશીથી પોતાને
હાથે કામ કરે છે.
14તે વેપારીના વહાણ જેવી છે;
તે દૂર દૂરથી પોતાનું અન્ન લાવે છે.
15વળી હજી તો રાત હોય છે એટલામાં
તો તે ઊઠે છે,
પોતાના ઘરનાંને ખાવાનું આપે છે,
અને પોતાની દાસીઓને
તેમનું કામ નીમી આપે છે.
16તે કોઈ ખેતરનો વિચાર કરીને
તેને ખરીદે છે;
પોતાની કમાણીથી તે
દ્રાક્ષાવાડી રોપે છે.
17તે પોતાની કમરે બળરૂપી
પટો બાંધે છે,
અને પોતાના હાથ બળવાન કરે છે.
18તે સમજી જાય છે કે
મારો વેપાર લાભકારક છે;
તેનો દીવો રાતે હોલવાતો નથી.
19તે પોતાના હાથ રેંટિયાને લગાડે છે,
અને તેના હાથ ત્રાકને પકડે છે.
20તે ગરીબોને ઉદારતાએ આપે છે;
હા, તે પોતાના હાથ લંબાવીને
દરિદ્રીઓને [મદદ કરે છે].
21તેને પોતાના કુટુંબ વિષે
હિમનું ભય નથી;
કેમ કે તેના આખા કુટુંબે [ઊનનાં]
કિરમજી વસ્ત્ર પહેરેલાં છે.
22તે પોતાને વાસ્તે બુટ્ટાદાર
તકિયા બનાવે છે;
તેનાં વસ્ત્ર બારીક શણનાં તથા
જાંબુડા રંગનાં છે.
23તેનો પતિ દેશની ભાગળમાં બેસનાર
આગેવાનોમાં પ્રખ્યાત છે.
24તે શણનાં વસ્ત્ર બનાવીને વેચે છે;
અને વેપારીને કમરબંધ
[બનાવી] આપે છે.
25બળ તથા મોભો એ તેનો પોષાક છે;
અને ભવિષ્યકાળ [ની ચિંતા] ને
તે હસી કાઢે છે.
26તેના મુખમાંથી જ્ઞાનની
વાતો નીકળે છે;
તેની જીભનો નિયમ
માયાળુપણું છે.
27તે પોતાના ઘરનાં માણસોની
ચાલચલણની બરાબર
તપાસ રાખે છે,
તે આળસની રોટલી ખાતી નથી.
28તેનાં છોકરાં ઊઠીને તેને
ધન્યવાદ આપે છે;
અને તેનો પતિ પણ તેનાં
વખાણ કરીને [કહે છે,]
29“સદાચારી સ્ત્રીઓ તો ઘણી
થઈ ગઈ છે,
પણ તું તે સર્વ કરતાં ઉત્તમ છે.”
30લાવણ્ય ઠગારું છે,
અને સૌંદર્ય વ્યર્થ છે;
પણ યહોવાનો ડર રાખનાર
સ્ત્રી વખાણ પામશે.
31તેના હાથની પેદાશમાંથી તેને આપો;
અને તેનાં કામોને માટે ભાગળોમાં
તેની પ્રશંસા થાઓ. ?? ?? ?? ?? 1
Currently Selected:
નીતિવચનો 31: GUJOVBSI
Highlight
Copy
Compare
Share
Want to have your highlights saved across all your devices? Sign up or sign in
Gujarati OV Reference Bible - પવિત્ર બાઇબલ
Copyright © Bible Society of India, 2016.
Used by permission. All rights reserved worldwide.
