ፆኦሲ ማዾ''ም ዳኪንቴዞንሢኮ ማዾ'' 6

ማዾ'' ማዻ ላንካዎ ዲያቆኖኮ ዶኦሪንቲፆ

1ዬካፓ ኪሪስቶሴ ጉሙርቃ ዓሶኮ ፓይዳ'' ሚርጊ ሚርጊ ዓኣዻዛ ጊሪኬ ሙኡጮ ጌስታ ዓይሁዶ ዓሳ ዬሩሳላሜይዳ ናንጋ ዓይሁዶ ዓሶ ዑፆይዳ ጉንዱሞ ዓርቄኔ፤ ዓይጎሮ ጌዔቶ ኬሊ'' ኬሊ'' ሙዖ ባካ ዒንጊንታ ዎዶ''ና ዔያቶኮ ባኣካ'' ዓኒንሢ ሓይቄ ላኣሎ ዬሩሳላሜ ዓይሁዶ ዓሳ ዋላ''ሢሮኬ። 2ዬያሮ ታጶ ላምዖንሢ ኪሪስቶሴ ጉሙርቃ ዓሶ ፔቴ''ይዳ ቡኩሳዖ፦ «ሙኡዚ'' ጊሽኪሢሮ ጌዒ ፆኦሲ ቃኣሎ'' ዔርዚፆ ማዾ'' ኑና ሓሻ''ኒ ኮይሱዋሴ። 3ዓካሪ ታ ዒሾንሦ! ታ ሚሾንሦ! ኮሺ ዒኔና ዓኣያ ማዒ ማዾና ቢያሢ ጋላቲሳያ፥ ዓያና ጌኤሺ ኩሙሢ ዎልቄና ማዻያ ሓሣ ሚርጌ ዔራ ማዔ ላንካይ ዓሲ ዒንሢ ባኣካ''ፓ ዶኦሩዋቴ፤ ዬያቶ ኑኡኒ ሃኖ' ማዾ'' ማዺሻንዳኔ። 4ኑኡኒ ጋዓንቴ ሺኢጲፆንታ ፆኦሲ ቃኣሎ'' ዔርዚፆ ማዾ''ዋ ዶዲ ማዻንዳኔ» ጌዔኔ።

5ዬና ጌኤዛ ቢያሢ ዎዛሴኔ፤ ሓካፓ ሊካ ዓኣ ዓሶዋ ዔያታ ዶኦሬኔ፤ ጉሙርቂሢ ዓኣያ ሓሣ ዓያና ጌኤሺ ቢታንቶ ዴሞ ጌሌ ዒስፂፓኖሴ፥ ፒልጶሴ፥ ጲሮኮሮሴ፥ ኒቃሮና፥ ፂሞና፥ ጴርሜ፥ ዓይሁዴቱዋዖ ዓይሁዴ ማዔ ዓንፆኪያ ዓጮ'' ዓሢ ኒቆላዎሴ ጎዖሢንታኬ። 6ዬንሢ ዔያታ ዳኪንቴዞንሢ ቤርቶ ሺኢሼኔ፤ ዳኪንቴዞንሢያ ሺኢቃዖ ኩጮ ዔያቶ ዑፃ ጌሤኔ።

7ያዺዲ ፆኦሲኮ ቃኣላ'' ዳልጊ ዳልጊ ዓኣዼሢሮ ዬሩሳላሜይዳ ኪሪስቶሴ ጉሙርቃ ዓሶኮ ፓይዳ'' ሚርጊ ሚርጊ ዓኣዼኔ፤ ቄኤሶይዳፓኣ ሚርጌሢ ኪሪስቶሴ ጉሙርቄኔ።

ዒስፂፓኖሴኮ ዓርቂንቲፆ

8ዒስፂፓኖሴ ፆኦሲኮ ኮሹሞ ዒንጊፆ ዔኪ ዎልቄና ማዒ ዲቃሣ ባኣዚ''ንታ ፆኦሲ ዎልቄና ማዺንታ ዓኪ ባኣዚ''ያ ዴሮ'' ባኣካ'' ዬኖ ዎዶ''ና ማዻኔ፤ 9ዒማ''ና «ዱማዺ ኬስኬ ዓሶ ሺኢጲፆ ማኣሮ» ጌይንታ ዓይሁዶ ዓሶኮ ሺኢጲፆ ማኣራፓ ማዔ ዓሳ፥ ቄሬናና ዒስኪንዲሪያ ዓጮ'' ዓሳ፥ ኪልቂያንታ ዒሲያ ዓጮ'' ዓሶንታ ፔቴ''ይዳ ዔቂ ዒስፂፓኖሴ ዒፂ ማርማኔ። 10ጋዓንቴ ዒስፂፓኖሴ ኬኤዛ ዔራቶና ዓያኖና ዔያታ ባሻኒ ዳንዳዒባኣሴ። 11ዒማ''ና፦ «ሓይ ዓሢ ሙሴና ፆኦሲና ጫሽካንቴ ኑ ዋይዜኔ» ጋዓንዳ ዓሲ ዔያታ ዴሚ''ና ጊኢጊሼኔ። 12ዬያይዲ ዴሮ''ንታ ጪሞንታ ሓሣ ሙሴ ዎጎ ዔርዛ ዓሶዋ ዔያታ ዔቂሲ፥ ዒስፂፓኖሴያ ዓይሢሲ ዎጎ ዎጋ ዓሶ ቤርቶ ሺኢሼኔ። 13ዒማ''ና ዒዛ ዑፃ ሉኡዙሞና ማርካዻንዳ ፔቴ'' ፔቴ'' ዓሲያ ዔያታ ዔኪ ሙኬኔ፤ ሉኡዙሞና ማርካዻ ዓሳ ኬኤዛዖ፦ «ሓይ ዓሢ ሓያ ጌኤዦ ማኣሮና ሙሴ ዎጎና ጫሽካኔ። 14ሓሣ ‹ናዚሬቶ ዬሱሴ ሓያ ማኣሮ ሻሃንዳኔ፤ ሙሴ ኑና ዓይሤ ዎጎዋ ላኣማንዳኔ› ጌዒ ኬኤዛንቴ ኑ ዋይዜኔ» ሂዚ ጌዔኔ። 15ዬማና ዎጎ ዎጊፆይዳ ዓኣ ዓሳ ቢያ ዒስፂፓኖሴ ኮሺ'' ዛጋዛ፥ ዓኣፖ ካራ'' ዒዛኮ ፆኦሲ ኪኢታንቻ ዓኣፒ ካራጉዲ ማሊ ጴዼኔ።

Currently Selected:

ፆኦሲ ማዾ''ም ዳኪንቴዞንሢኮ ማዾ'' 6: MNT

Highlight

Copy

Compare