Noo-deh:⧾ 21
21
:Poror' mu :Julu'slehn:
1:Yeh :a gweh-a an-a' wlu kpa-eh 'i, :yee' :a 'kpa 'de 'ni ken-meheh 'di 'weh, 'de :a kpon :gwie: :eh mu-a :gwlor an 'da-dih-a 'Koror 'di ken dih, :a 'si 'o dih. :Yee' :yeh zorn zen-a, :yee' :a mu yobo'-a' dubeh:, an 'da-dih-a 'Wloo ken :ke. :Yeh :a 'wluh-a 'o, :yee' :a mu :gwlor an 'da-dih-a :Pata'la 'di. 2'Do :wor :a :yeh-dih: 'ni ken-meheh: :eh mu-a :Feni'sia-bluhba ken, 'de :a 'kpa 'de eh 'di, :a mu. 3:Yeh :a mu-a, :yee' :a 'ye yobo'-a' dubeh: an 'da-dih-a 'Sapor 'weh. :A po-or 'for 'i 'noror kona bo, 'de :a :mu-dih: 'de 'yluh-a' 'kwla 'wluh-dih: 'da ka, :a mu 'Silia-bluhba ken. :Yeh :a nyni-a 'o 'Taya-gwlor-' :or no-a :dha on :korn on 'ye-a 'ni ken-meheh-a' 'tiei 'di :za-dih:, :yee' :a 'si-: 'zorn. 4'De :a 'bhorn :Yusu'-a' klei' :zi-nyor⧾ dih 'do mor. :Yeh :a 'ye-uh-a, :yee' :a zi 'o on bo 'we :meheh' 'sorn. 'De Nyorsoa-a' :Zulu-a' 'kpih 'di, 'do :wor nyor⧾ :dao', on zela: :Poror' :gwluhuh', on 'dae:, 'Bor :Julu'slehn :mu-eh. 5Jorwor: :yeh :a no-a 'o on bo 'we :meheh' 'sorn :dao', :yee' :a :sorn-' 'weh, 'de :a mu. 'De mo-: an-a'a: 'nynor⧾-: 'dekorn: 'nynuu-: on kpa :a :gwie 'i 'do yobo' worn 'i. 'De :a bla 'koor-dlu⧾ 'yi glu 'do 'kpuhba' 'i, :a :wlu 'de Nyorsoa bo. 6:Yeh :a gweh-a 'i, :yee' :a kpuhba: wlu⧾ dih, 'de :a 'kpa 'de 'ni ken-meheh 'di. 'De on mu on 'bli de.
7:Yeh :a 'wluh-a 'Taya, :yee' :a 'si 'Talehmi dih. 'Do :wor :a 'si-dih: 'bluhbor, :a mu 'Klae :de-di'-boi' :on :ne-a 'de 'ye 'da. 'De :a zi 'o on bo 'we-eh :due'. 8:Yeh zorn zen-a, :yee' :a zi-' :neheh', :a mu 'Sehsali'a-gwlor-'. :Yeh :a 'si-a 'o dih, :yee' 'yu :due' an 'da-dih-a Felor'#21.8 Zlo Noo-deh⧾-a' 'chlee-deh-a' 'dlu⧾ 6.1-6. :or no-a nyor⧾ :on :ne-a :meheh' 'sorn :on :po-eh 'de Nyorsoa 'kwa 'de :Julu'slehn, an-a' nyor :due', 'de :or kpa-a Nyorsoa-a' tubo-wlu⧾ 'jeh deh⧾-' dih. :Yee' 'de or 'bli 'gbu, 'do :wor :a :ko-dih:. 9Felor'-a' 'jeh :dao', or 'wluh 'nynor⧾-kpao'⧾-nynuu :nyieh :on 'see-a nyor-kpalu-dhih yubo. Mo-: :an po Nyorsoa-a' wele-eh. 10'Do :wor :a :ne 'do 'we-bei 'di. 'De Nyorsoa-a' wele-eh: :po-yu :due' an 'da-dih-a :Aga'ba, or-: 'wluh :Judi'a, 'de or 'yle. 11:Yeh or yi-a 'o :a bo, :yee' or 'duo: :Poror'-a' 'behleh 'weh, 'de or san or-a' 'jeh-a' buh⧾-: 'dekorn: son⧾-:. :Yeh or :gweh-a 'i, :yee' or :wlu-', or 'da, Gban 'i :ne :Zulu 'dae:, 'Yu :or :korn-a 'behleh :daa, 'ka :wor :Jueh'-nyor⧾-a mu or-a' san-a' :no 'de :Julu'slehn, 'de on 'ye-or nyor⧾ :on :se-a :Jueh'-nyor⧾ 'nyi.
12:Yeh :a 'worn-a dhih :daa, :yee' :a mor-: 'dekorn: nyor⧾ :on :ne-a 'o-: :a bale: :Poror' 'weh, or :ne-' :Julu'slehn mu. 13:Yeh :a no :ao', :yee' :Poror' dhele: :a dih, or 'da, :Eh no a-uh, 'de a 'vin deh :dao' :eh? A 'bhorn a 'ye 'an :porluh 'zorn po :e? Eh :se san-a' :due', 'on :se-' ken dih 'worn-dih: 'de :Julu'slehn. Jorwor: 'on 'worn-dih-eh ken dih 'weh, 'on 'ye 'meh 'do :Gwlor :baa' :Yusu'-a' dhih bo.
14:Yeh :a :wlu-a 'de or bo or :ne-a' mu, 'de or se-a 'worn, :yee' :a 'tali-or-: dih, 'de :a 'da, :Ka :Gwlor :baa' 'da-a, 'ka-: eh 'ye :ne o.
15:Yeh :a no :ao', :yee' :a po :a-a'a: 'tiei 'kpa, 'de jorwor: :a mu :Julu'slehn. 16:Yee' :Yusu'-a' klei' :zi-nyor:⧾ :noo' :on :ne-a 'Sehsali'a, mo-: kpa :a-uh, 'de on :nynia-dih: :a, 'de 'yu :or :korn-a 'bli 'gbu :a mu-a :ko-dih: an 'da-dih-a 'Nesorn. 'Yu-a' 'jeh :dao', or no 'Sapor-yu:, :or no-a :Yusu'-a' klei' :zi-nyor :dee' see.
:Poror' mu 'Jeen 'ye 'da
17:Yeh :a 'si-a :Julu'slehn dih, :yee' 'Klae :de-di'-boi' :on :ne-a 'de, on :gble-dih: :a 'weh 'de :porluh-a' dih 'pehn ka 'di. 18:Yee' :yeh zorn zen-a, :yee' :a mor-: :Poror'-: :a mu 'Jeen: 'ye 'da. 'Do :wor :a :yeh-dih: 'chore-a' nyor⧾ :klaba'⧾-a' klehkpeh :on :ne-a :Julu'slehn. 19:Yeh on :gble-dih-or, :yee' or zela-uh deh⧾-a' klehkpeh :gwluhuh' 'weh 'tene' :kpeen:, :ka Nyorsoa no-a or-a' :yi-dih-eh, 'de or no-a :koan 'de nyor⧾ :on :se-a :Jueh'-nyor⧾ 'nyne-'. 20:Yeh on 'worn-a dhih or :za-a-', :yee' an 'beh-dih Nyorsoa-a' 'nyne-: 'i. 'De on :wlu 'de or bo, on 'dae:, :A 'be dhih 'jeh-' :po-nyor:. :Gbee'e:. :Jueh'-nyor⧾-a' 'wlu :wlu 'wlu, mo-: po :Yusu'-a' dhih dhih 'jeh-'. 'De an-a' klehkpeh, an-a' :Mose'-a' 'tele' dih :dhe-eh-a' :porluh 'beh 'i :chio'lo:. 21On 'da nyor⧾ zela-uh :gwluhuh' :ka :on :torne:-a :Jueh'-nyor⧾-a' klehkpeh :on 'ti-a 'de nyor⧾ :on :se-a :Jueh'-nyor:⧾ 'bli 'bluhba⧾ ken dih deh, on 'ye-a :Mose'-a' 'tele' dih 'tali:. On 'da :on zela-uh :gwluhuh', :on 'da, An-a' 'dba-:-' an-a'a: 'nynuu :bhlororn'. 'De :on zela-uh :gwluhuh', on :ne 'o :a 'bli-deh⧾ klei' zi. 22:Kaa :a mu :no :naa :eh? An mu-ih 'worn-: :ka :on yi-a 'de o. 23Eh-a' dhih, deh :a 'bhorn-a :on 'ye-a' no, eh-: :on 'ye no. Nyor⧾-kpalu⧾ :nyieh, mo-: :ne :daa, mo-: :zlehn-dih: deh ken 'de Nyorsoa bo. 24Nyor⧾-a' 'jeh :dao', mu :on 'ye-uh' bo 'kpa, a 'ye :kane' dih :za. Deh nyor⧾-a to-a 'o, 'de an no-eh, :on 'ye 'o an-a' neh :to :ke, 'de on 'ye an-a' 'dlu⧾ 'kploror:. :Mor :on no deh :daa, :yee' nyor⧾-a' klehkpeh mu-eh yubo: :ka deh⧾ on :za-a-' 'do :on 'bhun, en :se-a dhih 'jeh. :Yee' an mu-eh yubo: :ka :Mose'-a' 'tele' 'da-a, :a 'ye-a 'kmo-' :ne-eh no, 'de :an no :ao' 'kmo :ne-eh :ke. 25Jorwor: nyor⧾ :on :se-a :Jueh'-nyor:⧾, 'de :on po-a :Yusu'-a' dhih dhih 'jeh-', :a 'chle-uh bo 'weh, :a zela-uh :gwluhuh', on :ne-' dii-deh:⧾ on 'dhu-dih:-a zuu⧾ gban 'i di, 'de on :ne-' nyomor 'na, 'de mor :gwlor-nimi-: 'dekorn: 'kwla-nimi-: nyor⧾ 'dba-a, :en se-a nyomor-' 'wluh, 'de :en :dhe-dih:-a nyomor-' dih, on :ne-' di. :Yee' on :ne-' 'tmeor:⧾ :korn-eh buh 'di po :ke.
26:Yeh on 'da :ao', 'de zorn zen-a, :yee' :Poror' kpa nyor⧾-a' 'jeh :dao' 'weh, 'de on :ne or mu, on :za :kane' dih. :Yeh on no :ao', :yee' on pa 'de Nyorsoa-a' 'sla 'zorn. 'De :Poror' zela: nyor⧾ :on :ne-a 'de :gwluhuh', ti an-a' :kane' dih :za-we: :yih :sie:-a 'o, en mu-a 'dlu-' :jla, 'de nyor⧾ 'ye Nyorsoa gban 'i 'dhu :due' :due' 'do on bo.
On kpon :Poror' 'weh
27:Yeh 'we :meheh' 'sorn :dao', en yi-a 'dlu-' :jla 'da, :yee' :Jueh'-nyor:⧾ :noo' :on 'wluh-a 'de 'Esea-bluhba ken, mo-: 'ye :Poror' 'de Nyorsoa-a' 'sla 'zorn. :Yeh on 'ye-or, :yee' on 'dhu-dih: nyor⧾-a' klehkpeh :on :ne-a 'o worn. 'De on 'wla 'de or ya, 28an po 'geh⧾, an no, A :mor 'Ezlea-nyor:⧾, a 'kpa :a bo. Deh no-eh, 'yu :daa, or-: 'o :or mu deh⧾-' dih, 'de :or :wlu-dih: :a-a'a: nyor⧾-: :Mose'-a' 'tele'-: 'dekorn: :a-a' Nyorsoa-a' 'sla :daa 'bhun dih. :Yeh :daa :a :ne-a ken :naa, or :ya 'de nyor⧾ :on :se-a :Jueh'-nyor:⧾ 'noror Nyorsoa-a' gban 'i :ne-sla: :daa 'zorn, 'de on za-uh gban-'. 29Deh :korn-a dhih, 'de on :za-a deh :daa-', eh-: 'dhu, on 'ye 'yu :due' an 'da-dih-a :Tlofi'ma: :or :se-a :Jueh'-yu:, 'de :or 'wluh-a 'Ehfesor, or-: :Poror'-: :dha :due' dha :gwlor-'. :Yee' :mor on :taa 'ye :dee', on 'da :Poror' kpa-or 'de Nyorsoa-a' 'sla 'zorn 'weh.
30:Yeh on 'da :ao', :yee' gwlor-a' klehkpeh gbua: 'i. 'De nyor⧾-a' klehkpeh, an ple, an 'wluh deh⧾ 'doror: 'dor dih. 'De on kpon :Poror', on 'kla-or dih, 'de on za-or 'de Nyorsoa-a' 'sla 'zorn. :Yeh on 'si-dih-or 'zorn, :yee' 'do :dha :due' :dao', on po 'o Nyorsoa-a' 'sla-a' gba-dih-gba-a' :kpaa' 'weh. 31:Yeh an 'bhorn-a on 'ye-a :Poror' 'dba :blaa'a:, :yee' 'Wloon-nyor⧾-a' :janbe 'worn-ih' :ka :Jueh'-nyor⧾-a' klehkpeh :on :ne-a :Julu'slehn, an vorn-a 'kpunu: 'kpun. 32:Yee' 'do :dha :due' :dao', or 'duo: sorye'-a' nyor⧾ :klaba'⧾ :noo'-: 'dekorn: sorye' :noo'-: 'de on kpa ple-a' 'de :gwlor-nyor:⧾ :dhulu' :dao' bo. :Yeh nyor⧾ :an bla-a :Poror', on 'ye-uh-a, :yee' on 'bor or-a' bla-a' 'weh. 33:Yee' :yeh sorye'-a' :janbe :dao', or 'si-a 'o dih, :yee' or kpon :Poror' 'weh. 'De or zela: or-a'a: sorye' :gwluhuh', on 'ye :Poror'-a' son⧾ 'chen-dubu'⧾ 'sororn' :san-dih:. :Yeh on no :ao', :yee' or dhele-uh-: dih, or 'da, 'Yu :daa, or-a' 'nyne :eh? Deh or no :eh? 34:Yeh or dhele-uh-a dih, :yee' an po 'geh⧾. :Noo'-a za-' dhih 'dor, 'de :noo'-a za dhih 'sluh⧾-'. :Yee' :janbe-a' 'worn deh an za-' dih. Deh no-eh, an-a' :dhlumeh' :dhie: 'i. Eh-: no-eh, 'de or zela: or-a'a: sorye' :gwluhuh', on 'ye :Poror' 'de sorye' 'bli :bale' 'gle kpa. 35:Yeh an kpa-or, 'de on nyni-a 'o :bale' 'gle-gbu-a' 'steheh ken, :yee' nyor⧾ :doru' :dao', nyor se an-a' 'yi :kan-eh 'beh-dih: :neheh'. Eh-: no-eh, 'de sorye' :dao', on 'ble-dih-or 'de :gwle-', on kpa-or. 36'De nyor⧾ :dhulu' :dao' :an zi-a 'o on klei', an po 'geh⧾, an no, A 'dba-or o.
:Poror' :za or-a' 'jeh dhih ken 'do nyor⧾ ybei'
37:Yeh an yi-a :Poror' 'de :bale' 'gle :pa-dih: 'da, :yee' or :wlu-' 'de :janbe :dao' bo, or po 'Glii-wlu:, or 'dae:, :On :korn 'gen, 'an 'bhorn 'on 'ye deh-beh-' :za 'de :on bo.
:Yeh or po-a 'Glii-wlu, :yee' :janbe dhele-or-: dih, or 'da, :An po 'Glii-wlu: :e? 38:Mor 'on :taa 'ye :dee', :yee' 'on 'da :mor 'Iye-yu: :or :bla-dih:-a 'gomla worn, 'de :or kpa-a nyor⧾ 'dba-nyor⧾-a' 'wlu :nyieh 'de :bhehneh'-bluhba ken :dee' :oo'.
39'De :Poror' 'da, 'Kei o. 'Mor :Jueh'-yu: 'o. 'Do 'Tasor-gwlor 'di, 'do :wor 'on 'wluh-dih:, :or :ne-a 'de :Sele'sia-bluhba ken. :Gwlor :dao' :or :korn-a 'di 'on 'wluh-dih:-a, or no :gwlor :or :korn-a 'nyne nyor⧾ yubo:-a. :On :korn 'gen, 'nyi, 'on :wlu 'de nyor⧾ :daa bo.
40:Yeh or 'da :ao', :yee' :janbe 'worn-', or 'ye :wlu. 'De :Poror' :nyna dih 'do 'gbu-a' 'steheh ken, 'De or :to son yai', nyor⧾ 'ye :zleh :po-eh 'bor. :Yeh an-a' klehkpeh :on :ne-a 'o 'zorn, on no-a 'dhuan, :yee' :Poror' po :Hiblu'-wlu:, 'de or :wlu 'de on bo, or 'dae:,
Currently Selected:
Noo-deh:⧾ 21: TCHKR
Highlight
Copy
Compare
Share
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
