Noo-deh:⧾ 13

On :za :Bana'ba-: 'dekorn: :Soror'-: on 'ye Nyorsoa-a' tubo-wlu:⧾ :po 'da mu

1:Yee' 'de 'chore :eh :ne-a 'de 'Antior-gwlor 'di, 'do :wor Nyorsoa-a' wele-eh: :po-nyor⧾-: 'dekorn: nyor⧾ deh :torne-nyor⧾-: on :ne. An-a' 'nyne :wor, :Bana'ba-: 'Simior: an 'da-dih-a Nyor-yle-: 'Lusior: :or 'wluh-a :Sali'na-: 'Manior: :or :ne :Hehlo' :or no-a nyor⧾ wlu 'ken :korn-nyor, on :ku-dih:-a :dha :due'-: 'dekorn: :Soror'-:. 2:Yee' ti an za-a :Gwlor :baa'-a' :weheh', 'de an pa 'suehn-', :yee' Gban 'i :ne :Zulu :wlu-' 'de on bo, on 'dae:, A :za :Bana'ba-: 'dekorn: :Soror'-: 'do 'on bo, on 'ye :koan: :or :korn-a dhih 'on 'da-uh'-a, on 'ye-or' no.

3:Yee' :yeh on gweh-a 'suehn-' :pa-eh 'i, 'de on :wlu-a 'de Nyorsoa bo, :yee' on tba-uh son⧾ ken dih, on 'worn-dih: an-a' dhih, 'de on dbo-uh.

:Soror'-: 'dekorn: :Bana'ba-: on :ne 'Sapor:

4:Yee' Gban 'i :ne :Zulu dbo mo-: :ne-a 'sororn' 'weh, 'de on 'kpa :gwie 'i, on mu :Silu'sia 'de yobo' worn 'i. 'De on chehn 'o :dhie', on 'kpa 'de 'ni ken-meheh 'di, 'de on mu 'Sapor-bluhba ken, :or no-a yobo'-a' dubeh-'. 5:Yeh on 'si-a 'o :gwlor an 'da-dih-a :Sala'mi dih 'do 'Sapor-bluhba ken, :yee' an po Nyorsoa-a' tubo-wlu:⧾ 'de :Jueh'-nyor⧾-a' 'di :gweh-dih-sla⧾ 'zorn. :Jororn' an 'da-dih-a 'Make, or-: :ne on mu, 'de or :za-dih-uh :ke.

6'De on :na 'bluhba-dlu: :dao', or-a' klehkpeh ken dih, on chehn 'o or ken :dhie', 'de on mu 'Pefor. 'Do :wor on :yeh-dih: :Jueh'-yu :due', an 'da-dih-a Ba-Yusu', :or no-a 'ylaa: 'yla⧾, 'de :or no-a sih 'tmo :wele-eh: :po-nyor. 7'Yu-a' 'jeh :dao', or no 'gomla-nyor: :klaba', an 'da-dih-a 'Sorya: 'Palor:, or-a' bo :na-yu :due'. 'Gomla-nyor: :klaba' :dao', or no nyor :or :korn-a :toror'. Or-a' 'jeh :dao', or-: dbo :Bana'ba-: 'dekorn: :Soror'-: wlu bo. Deh no-eh, or 'bhorn or 'ye Nyorsoa-a' wlu 'worn :ke. 8Jorwor: 'yu :dao', :or no-a 'ylaa: 'yla⧾, 'Glii-nyor⧾-a 'da-dih-or :Ehli'mor:, or vorn-eh-: bo, or 'ye-eh' no, 'de 'gomla-yu: :dao', or :sor po :Yusu'-a' dhih dhih 'jeh-'. 9:Yee' :Soror' :or :korn-a 'nyne :nee' 'dhu-a :Poror', or 'yi-dih: Gban 'i :ne :Zulu-: dih, 'de or pobo: :Ehli'mor ya 'dhuan, or :wlu 'de or bo, or 'dae:, 10:Mor 'ku-a' 'yu :oo'. :On 'nyeh deh⧾-a' klehkpeh :en no-a dhih 'jeh-' 'weh. :On 'yi-dih: nyor⧾ dih :bo-dih-eh-: 'dekorn: :bhuli' :doru'-: dih. 'Do ti-a' klehkpeh bo, :an no-eh', :Gwlor :baa'-a' dhih 'jeh 'ye sih-' 'kpa. 11:Yee' 'do eh-a' dha, or mu :on 'ye-:. :An mu 'dor-:, :on :se-' dih 'ye-: i. :On :se-' 'yluh-a' zorn-pli 'ye-: i 'do ti-kpor-bei 'di.

:Yeh :Soror' 'da :ao', :yee' 'do :dha :due' 'jeh :dao', :kule-kpan: or-: :yi-dih: 'o :Ehli'mor 'yli ken. 'De or dua-' dih, or 'bhorn nyor :or 'ye-a or-a' son dih kpon. 12:Yeh 'gomla-yu: :dao', or 'ye-a deh :eh :no-eh, :yee' or po :Yusu'-a' dhih-' dhih 'jeh. Deh no-eh, or-a' :porluh 'ma-', 'de eh :florn-dih-or worn, 'do :Gwlor :baa'-a' dhih an torne-a nyor⧾ bo.

:Poror'-: 'dekorn: :Bana'ba-: on :ne 'Antior: 'de :Pasi'la-bluhba ken

13:Yeh on no :ao', :yee' :Poror'-: 'dekorn: or-a'a: bo :na-nyor⧾-: on 'kpa 'de 'ni ken-meheh 'di 'weh, 'de on 'wluh 'Pefor, 'de jorwor: on mu 'Pehka 'de :Panfi'la-bluhba ken. 'Do :wor :Jororn' an 'da-dih-a 'Make, or sie-uh, 'de jorwor: or mu :Julu'slehn de. 14:Yeh on 'wluh-a 'Pehka, :yee' on zi-' :neheh', on mu 'Antior: 'de :Pasi'la-bluhba ken. :Yeh on 'si-a dih, :yee' on pa 'de :Jueh'-nyor⧾-a' 'di :gweh-dih-sla 'zorn, 'do Nyorsoa-a' :gwlee-we-eh 'di, 'de on :dhe dih 'de mor. 15'De nyor zlo deh 'de :Mose'-a' 'tele'-chlee-deh 'di-: 'dekorn: 'de Nyorsoa-a' wele-eh: :po-nyor⧾-a' 'chlee-deh 'di-:. :Yeh or gweh-a eh-a' zlo-a' 'i, :yee' nyor⧾ :klaba'⧾ :on :korn-a 'de 'di :gweh-dih-sla: :dao', or-a' wlu bo, on 'da :Soror' 'i 'weh, on 'dae:, 'De-di'-boi'-a:, :mor a 'ble tubo-wlu⧾ :en 'ye-a 'de nyor⧾-a' 'kpih po, :yee' a po-ih. 16:Yeh on 'da :ao', :yee' :Poror' :sorn-' 'weh, 'de or :to son yai', 'de or 'kpa 'o :wlu 'da, or 'dae:,

'On 'bli 'Ezlea-nyor⧾-: 'dekorn: a :mor nyor⧾ :on :se-a :Jueh'-nyor⧾-: 'de :an za-a Nyorsoa :weheh', a :to 'on :dou'⧾ bo. 17'Ezlea-nyor⧾-a' Nyorsoa, or-: gan :a :bai'-a' :bai', 'de or no-eh, 'de an-a' dhih 'beh 'i, ti on :ne-a 'Iye-bluhba ken. Or-a' dhih-a' 'i 'beh-kpih:, me-: or no, 'de or za-uh 'de. 18'De or ku 'di dih :chio'lo: 'do an-a' kplen bo, 'do zon⧾ :en 'beh-dih:-a :en 'ye-a :kwlaa :nyieh no 'di, 'de :bhehneh'-bluhba ken. 19Or gba 'dawor'⧾-dlu⧾ :meheh' 'sorn ya de 'Keneh-bluhba ken, 'de or 'nyi or-a'a: nyor⧾ 'bluhba:⧾ :dao', on 'ye-ih' :korn. 20Deh⧾-a' klehkpeh :daa, :en mu-a 'dlu bo, en 'beh-dih: en 'ye :no-eh: 'do zon⧾-a' :kehehn' :nyieh :kwlaa :mm' 'di.

:Yeh deh⧾ :daa, en zi-a, :yee' Nyorsoa 'nyi-uh zabe: :zi-nyor:⧾, mo-: :na-dih-uh 'de jorwor: eh :yeh-dih: or-a' wele-eh: :po-nyor: Sameo'-a' ti ken. 21'Do ti-a' 'jeh :dao' 'i, 'do :wor 'o, 'Ezlea-nyor⧾ 'yba-dih: 'keen. 'De Nyorsoa 'nyi-uh 'keen an 'da-dih-a :Soror', :or 'dhu-a 'Kee-a' 'yu-', :or 'wluh-a 'o 'Behnjemeh-a' 'cheh-dlu 'i. Or-: :na-dih-uh 'do zon⧾-a' :kwlaa :nyieh 'di. 22:Yee' :yeh Nyorsoa :za-a 'o :Soror' 'do kpala' 'i, :yee' or no :Debe' 'keen-'. 'De mor or zela: or-a' dhih bo dih 'weh, or 'da, 'On 'ye-eh' :ka :Debe' :or 'dhu-a 'Jehsi-a'a: 'yu-', 'de or 'dhu-a nyor-' :or no-a 'an :porluh, 'de :or mu-a deh⧾-a' klehkpeh :en :korn-a 'on 'ton :no. 23'De or-a'a: 'nynuu-a' 'nynuu 'nyne :oo', 'do :wor Nyorsoa :za nyor⧾ 'puh-dih-nyor: :Yusu' 'do 'Ezlea-nyor⧾ bo, :ka or no-a eh-a' wlu :dhama'-' :po-eh. 24:Yeh :Yusu' 'ye-a 'de yi, :yee' :Jororn' po Nyorsoa-a' tubo-wlu:⧾ 'de 'Ezlea-nyor⧾-a' klehkpeh bo, on 'ye an-a' deh⧾-zon⧾ dih 'tali:, 'de on 'ye 'de Nyorsoa bo 'bili:, 'de on 'ye 'ni 'dlu :po. 25:Yeh :Jororn'-a' :koan yi-a 'dlu-' :jla 'da, :yee' or dhele-uh-: dih, or 'da, Deh 'i-deh-nyor: a-a' :porluh⧾ 'da, 'on 'dhu-eh:-' :eh? 'On :se nyor :yor a fuo-a 'ken o. Jorwor: nyor-a' 'jeh :dao', or mu 'on ken dih :yi, :or :korn-a :buhbuh⧾-a' dubu'⧾ 'on se-a deh-' 'dhu-eh:, 'on 'ye-a' bhehn-dih: :sloror'.

26'An 'de-di'-boi'-a:. A :mor 'Eble'hehn-a' 'di-: 'dekorn: nyor⧾ :on :se-a :Jueh'-nyor⧾-: :on :ne-a 'noror a 'klu-', :an za-a Nyorsoa :weheh', tubo-wlu:⧾ :daa :en :ya-a: 'de 'puh-a', me-: :dbo-eh: 'noror :a bo. 27Nyor⧾ :on 'ti-a :Julu'slehn-: 'dekorn: an-a'a: nyor⧾ wlu 'ken :korn-nyor⧾-: on se eh-a' 'i yubo-eh :korn nyor :Yusu' 'dhu-eh:-'. Jorwor: on chehn-or wlu 'ken, or 'ye 'meh. :Mor on :taa :ao' no, :yee' Nyorsoa-a' wele-eh: :po-nyor⧾-a' wlu, an zlo-a 'do Nyorsoa-a' :gwlee-we-eh 'di, 'do ti-a' klehkpeh bo, mo-: :oo', an no-eh, :on 'ye dhih 'jeh-' 'kpa. 28Deh :Yusu' no-a, :eh :korn-a dhih on no-a or 'ye-a' 'meh, eh se 'nyne :korn. Jorwor: on zela: Pale' :gwluhuh' 'weh, or 'ye :Yusu'-a' 'meheh'-deh wlu 'ken chehn 'gboror:. 29Deh⧾-a' klehkpeh an mu-a :Yusu' 'bhun :no, :en :korn-a dhih Nyorsoa-a' 'chlee-deh :za-a-', :yeh on no-ih-a, :yee' on za-or 'o tu 'i 'weh, 'de on po-or 'de nma-dih-deh 'di. 30Jorwor: Nyorsoa za-or 'de nma-dih-deh 'di 'weh. 31:Yee' nyor⧾ :ne or 'wluh-a :Galali'i, 'de :an mu-a :Julu'slehn, on 'ye-or' 'do 'we :dhulu' 'di. :Yee' nyor⧾ :dao', mo-: no or-a' dhih ken dih zela-nyor⧾ 'de :a-a'a: nyor⧾ bo :naa. 32:Yee' 'do eh-a' dha, :a :ne :daa 'weh, :a 'ye a Nyorsoa-a' tubo-wlu:⧾ 'jeh :gwluhuh' zela:. Deh :korn-a wlu or po-a :dhama'-' 'de :a :bai'-a' :bai' bo, 33eh-: or no, :eh 'kpa dhih 'jeh-' 'do :a bo, :a :mor 'dhu-a an-a' 'nynuu-'. Deh-a' 'jeh :daa, eh-: 'dhu, :Yusu'-a' nma-dih-deh 'di :za-eh-', :ka eh no-a 'chle-eh 'de :Saan'-a' 'chlee-deh-a' 'dlu⧾ 'sororn' 'di, Nyorsoa no-a,

:Mor no 'an-a: 'Yu.

'De :eh 'wluh-a dha 'zean'-zorn: :daa 'bli, 'mor no :on :Baa'.

34Nyorsoa za-or 'de nma-dih-deh 'di 'weh, 'de mor or :se-' 'meh-: i :neheh', :ka Nyorsoa no-a eh-a' :za-a' :kpeheh:, or no-a,

:Bhorlie' :eh :korn-a wlu 'on po-a :dhama'-' 'de :Debe' bo, :eh no-a :gwlii' :dhe-deh,

eh-: 'an mu a 'nyi-: 'de gban 'i :ne ka 'di.

35'De eh 'chle-eh:-' 'de 'chlee-deh: :ne-a :due' 'di, 'do eh-a' 'for :noror' bo, eh 'da,

:On :se-' 'worn-: i, :an-a' Gban 'i :ne-nyor :se 'de nma-dih-deh 'di 'zorn-dih: i.

36:Debe' no Nyorsoa-a' 'ton :korn-deh 'weh, 'do or-a' ti 'i, 'de or 'meh. 'De on nma-dih-or dih 'do or :bai'-a' :bai' bo. Jorwor: or-a' 'ku 'zorn-'. 37Jorwor: :yor Nyorsoa :za-a: 'de nma-dih-deh 'di, or-a' 'ku :se-' 'zorn. 38:Yee' 'do eh-a' dha, 'an 'de-di'-boi'-a:, 'an 'bhorn a 'ye-eh' yubo: :ka eh 'dhu-a :Yusu'-' :or no-eh, 'de a-a' deh⧾-zon⧾-a' dhih 'ma-dih-eh: bo. Eh-: :a zela a :gwluhuh'. 39A :korn a 'ye-eh' yubo: :ka nyor :yor :or po-a or-a' dhih dhih 'jeh, :yee' or mu-a 'puh-:, or 'ye-a 'o deh⧾-zon⧾ 'zorn 'wluh, :en :korn-a 'zorn :Mose'-a' 'tele' se-a nyor :za-eh 'beh-dih:. 40:Yee' 'do eh-a' dha, a 'wla :gwluhuh' dih, 'de deh Nyorsoa-a' wele-eh: :po-nyor⧾ :za-a-', eh :ne-' :no-eh: 'do a bo, :eh no-a,

41A :gbee'e:, a :mor :or 'wluh-dih-a deh Nyorsoa :za-a-' :goba'-dhih ken dih. 'Nyi eh 'ma-dih: 'de a 'di dih, a 'ye gbe :zie:.

Deh no-eh, 'an mu deh :no 'do a-a' ti 'i,

:yeh a :se-a' dhih 'jeh-' :po i,

nyor-a' :yeh zela: a :gwluhuh' :sloror',

a :se-eh' dhih 'jeh-' :po i.

42:Yeh :Poror'-: 'dekorn: :Bana'ba-: an 'wluh-a 'de 'sla :dao' 'zorn, :yee' nyor⧾ :on :ne-a 'de, on :wlu 'de on bo 'weh, on 'ye deka yi :neheh', 'do Nyorsoa-a' :gwlee-we-eh: :eh mu-a 'de :yi 'di, 'de :Poror' 'i 'ye-uh deh⧾ :daa en-' :nee' on :gwluhuh' zela:. 43:Yeh :gwlor-nyor:⧾ :dao', on :gba-a dih, 'de :Poror'-: 'dekorn: :Bana'ba-: an mu-a, :yee' :Jueh'-nyor⧾-a' :dha :dhulu'-: 'dekorn: nyor⧾ :on 'kpa-a :Jueh'-nyor⧾-a' Nyorsoa-deh-: 'de :on chehn-a 'de eh bo, mo-: zi 'o on klei'. :Yee' nyor⧾ :dao', on :wlu-' 'de on bo, on 'neh-uh ken, on 'ye 'de Nyorsoa-a' mla 'zorn dih :na.

44:Yee' 'do :gwlee-we-eh-a' 'sororn' neh 'di, eh 'beh-dih: eh 'ye :gwlor-nyor⧾-a' klehkpeh :on :ne-a 'o :gwlor :dao' 'di no, mo-: 'kpa :dha :due', on 'ye tubo-wlu:⧾ :en kor-a :Gwlor :baa' 'i 'worn. 45:Yee' :yeh :Jueh'-nyor⧾ 'ye-a :gwlor-nyor:⧾ :dhulu' :dao', :yee' :gwlehehn'-a no-uh, 'de an po 'jlei, an wlu-dih deh :Poror'-a za-a-' 'bhun dih. 46Jorwor: :Poror'-: 'dekorn: :Bana'ba-: on :se-' 'dlu deh 'i 'neh-dih:, 'de on :wlu 'de on bo, on 'dae:, :A :korn :a 'ye Nyorsoa-a' tubo-wlu⧾ po 'de a bo :zai' :gbor :gbor, 'de :a no-eh. Jorwor: :ka a se-ih-a dih kpon, 'de a se-a a-a' 'jeh deh 'da-dih: 'do 'kmo :sie: :febeh'-a' dhih bo, :yee' eh-: :korn dhih :a 'tali a dih, 'de :a 'bili 'de nyor⧾ :on :se-a :Jueh'-nyor⧾ bo. 47:Yee' deh :Gwlor :baa' zela:-a :a :gwluhuh', :a 'ye-a' no, 'de or-a' 'chlee-deh 'di, eh-: :dhe dih,

'On no-eh', 'de :on no zorn-pli 'do nyor⧾ :on :se-a :Jueh'-nyor⧾ bo,

'de 'bluhba-a' klehkpeh 'ye :on-' :yi-dih:, on 'ye 'puh.

48:Yeh nyor⧾ :on :se-a :Jueh'-nyor:⧾, on 'worn-a deh :daa, :yee' an-a' :porluh⧾ 'pehn-: dih, 'de an po :Gwlor :baa'-a' 'nyne ya, 'do tubo-wlu:⧾ :dao', on 'worn-a, en-' dhih bo, 'de nyor⧾ or gan-a :on 'ye-a 'kmo :sie: :febeh' 'ye, mo-: po-eh dhih 'jeh-'.

49:Yee' tubo-wlu:⧾ :en kor-a :Gwlor :baa' 'i, en gweh 'o 'bluhba-a' 'for :dao', or-a' klehkpeh ken-: 'dlu. 50Jorwor: :yeh eh no :ao', :yee' :Jueh'-nyor⧾ 'dhu-dih: 'nynor⧾-kpao'⧾ worn :yuh :on :korn-a 'nyne nyor⧾ yubo:-a, 'de :an za-a Nyorsoa :weheh'-: 'dekorn: nyor⧾ :klaba'⧾ :on :ne-a 'o :gwlor :dao' 'di-:. 'De on 'dhu-dih: nyor⧾ worn, on 'ye :Poror'-: 'dekorn: :Bana'ba-: 'kle 'ye-dih:. 'De on no-uh dih, on za-uh 'o on 'bli 'bluhba ken. 51:Yee' :Poror'-: 'dekorn: :Bana'ba-: :yeh on 'ye-a 'o :gwlor :dao' 'di 'wluh, :yee' on 'gbabo: an-a' :buhbuh⧾ 'zorn-: dih, eh 'ye-uh 'i :to-dih: :ka Nyorsoa :za-a an-a' deh son 'di. :Yeh on no :ao', :yee' on mu :gwlor an 'da-dih-a :Iko'nia 'di. 52:Yee' :Yusu'-a' klei' :zi-nyor:⧾ :on :ne-a 'Antior, 'mona: 'yi-dih-uh-: dih, 'de Gban 'i :ne :Zulu 'yi-dih-uh-: dih :ke.

Currently Selected:

Noo-deh:⧾ 13: TCHKR

Highlight

Copy