Nazefaniya 2
2
Wiihaniya wo nlhatu no ukhoroma uhiya uwonya
1Nthukumaneke, nthukumaneke inyu ilhapo ya attu ahiri ni ishoni, 2nihinaphiya nihuku no urushiya wa Apwiiya Nlhuku, ama ntwarusho na Apwiiya Nlhuku nihinaaya uwa wo nlhatu winyu, nkamwaaveverushiya thoko nanka. 3Mwaavieke Apwiiya Nlhuku, mwaatti attu nneekurusha onkhaye o veelhaponi, mwaatti attu nnorumelhelha malhehero aya. Mwaavieke ikekhiaye, ni wiikurusha, paneepa nnoolhama ukhuma nihuku no urushiya wa Apwiiya Nlhuku.
Urimeelhihiya wa attu o ilhapo chinaatamana ni ilhapo yo Uyuda
4Nansho khaawo ata ntu mmoka nohalha waakavihacha attu o iwaani yo Ugaza. Ni iwaani yo Uashikeloni inookhalha mathalharu. Ni attu o Uashdodi anowoomolhachiya uthana, ni attu o Uekroni anoothamihiya ukhuma wi iwaani chaya. 5Nhothapana inyuva mwaatti attu nnokhalhacha ilhapo cho umbwaani, vamoka ni attu nnokhalha Ukirete. Apwiiya Nlhuku anaahimeriacha attu o Ukaanani ni Ufilisti wiira, anowaarimeelhiha attu onkhaye ni hikhalhe ntu o ukavihani. 6Ni ilhapo yo umbwaani iyo inookhalha phi vakittu vo ulhihera mihuwo, ni vakittu vanothekiya marapatta a ashunga vamoka ni mahilhi o ikhondoro. 7Ni ilhapo yo umbwaani inootawariya ni mahalhahalha o nikosho ni Nayuda, ni wowo anoolhihacha mihuwo chaya. Ni ayo anoorupacha wi inupa cho iwaani yo Uashikeloni. Ukhalhawaya Apwiiya Nlhuku aya anowoopuwelhacha ni waahokolhoshera mpuha aya tho.
8Apwiiya Nlhuku o machiri aneera wiira, “Kiheewa uruwana wa attu o Umoabu, ni ncheche na attu o Uamoni, ahaaruwanakacha attu aka ni woopopihacha wo nlhatu no ilhapo aya. 9Wo ikekheene miyaano phi Nlhuku kiri nkumi, Nlhuku o Uisraeli, iwaani cho Umoabu ni Uamoni chinookhalha thoko iwaani cho Usodoma ni Ugomora. Ni iwaani chaya chinoochara anashombe vamoka ni maakha, ni chinookhalha wo nipohu mahuku o uhimalha. Ni attu aka anohalha uhalhelha ayo anootawara ilhapo chiyo.”
10Ni yayo phi malhivo o itiamaru chaya, ukhalhawaya ahaaruwanakacha ni wiishipa vachulhu wa attu a Apwiiya Nlhuku o machiri. 11Ni attu ayo anowoova Apwiiya Nlhuku, ni anorimeelhihacha milhuku chonkhaye cho veelhaponi. Ni anoothimichiya ni attu onkhaye veelhaponi, ni kila ntu anoothimicha vakittu waya
12Ni inyu attu o Uethiopia nnowiiviya wo uphanga waya.
13Apwiiya Nlhuku wo machiri aya anoweevakacha attu o ilhapo yo Uashuru. Ni iwaani yo Uninawi inookhalha wo nipohu, ni ukhalha ilhapo yuumilhe thoko uthako. 14Ni vanookhalha phi vakittu vo uhuwelha mihuwo chaya, ni kila mwannama o wiithuphini. Ni nrepo ni iyangeyange ni ikorongo anookhalhacha mwommo. Ni achichi anowiipa mmadirishani mwaya, ni anakukhu anowiipa mmikhorani mwaya ukhalhawaya inupa chaya cho miri cho mierezi chinoohalha chiichoru. 15Chittu chonkhaye chilha phi chinohalha ukhumelhelha wa attu o iwaani ilha, Ukhalhawaya attu o iwaani ilha aheeshipa wo wiira, khaawo attu akina naahikhalheke hiyaano. Nansho vano attu ukhuma ilhapo chikina anoowa uphomolhacha iwaani aya iyo! Ni kila ntu nohalha uvira iwaani iyo anookhuwelhacha iwaani iyo. Ni vanookhalha phi iwaani ya ashinnama o wiithuphini.
The Bible Version in Makua @The Word for The World International and Makua Language translators. All rights reserved.