Nazakaria 2
2
Cho wooniya cho neeraru cho ntu o Nkhoyi wo uphimelha
1Nhina mwo cho wooniya chikina, kamwoonilhe ntu avarenlhe nkhoyi wo uphimelha mmathathani mwawe. 2Paahi kahonkoha, “Nnokelha vayi?”
Ni uyo ahaakhulha wo wiira, “Kinokelha uuphimani matayi ni makhuvi o ilhapo yo Uyerusalemu.”
3Nnepa aakulhumana ulhe ahorwaa, ni unkumaana nnepa nkina. 4Paahi nnepa kaamulhumana aka uyo ahomwiirelha nkhunanawe wiira, “Nttaweke nrwee mwanhimerie mmirawo ulhe wiira iwaani yo Uyerusalemu khinothananiya ukhalha ni ishiri, yaahikhalheke chiicho khavanokhalha vakittu vo ukhalha attu vamoka ni mihuwo chinohalha ukhalha nhina mwaya. 5Apwiiya Nlhuku aneera wiira, anene ayo anookhalha phi ishiri yo mooro yo ukhikichera iwaani iyo mipatta chonkhaye, ni ayo anookhalha mwommo wo nchakarimia naya.”
Attu aavariye ni urweehiya ulhetoni anowiihaniya ahokolhie Uwani
6Apwiiya Nlhuku anaahimeria attu aya wiira, “Kahoomwarushelhani mipatta chonkhaye. 7Nansho vano, mwaakuvieke, nthamacheke ukhuma ilhapo Ubabeli, nhokolhiacheke Uyerusalemu. 8Ntu riyoothe nohalha uuvarani mwaattiva, yoyo nookivara niitho naka.”
Paahi Apwiiya Nlhuku ahokiruma mii ni ulha nttenga ulha kirweehe wa attu avanre attu aya. 9Apwiiya Nlhuku anene anoukavihani ukhuma wa amalhaponi inyu.
Ni vavawo phi vanohalha inyu uchuwelha wiira
Apwiiya Nlhuku phi kirumilhe.
10Apwiiya Nlhuku aneera wiira, “Inyuva attu o ilhapo yo Usayuni, mwiipeke ni ushangarara ukhalhawaya kinoowa ni ukhalha vamoka ni inyu.”
11Yeyo ikatema iyo, attu o ilhapo chinchi anowaahokolheelha Apwiiya Nlhuku, ni ayo anookhalha phi attu aya. Ni anookhalha vamoka ni ayo, ni vavawo phi vanohalha aya uchuwelha wiira Apwiiya Nlhuku o machiri phi kirumilhe uwannyu. 12Attu o Uyuda anookhalha tho nhakhu aya Apwiiya Nlhuku wi ilhapo itakatifu, ni iwani yo Uyerusalemu inookhalha phi iwani ithanlhilhe aya.
13Inyu mwaatti, attu onkhaye mmaalhecheke umihoolho wa Apwiiya Nlhuku, ukhalhawaya anoowa ukhuma vanipuroni waya vatakatifu.
The Bible Version in Makua @The Word for The World International and Makua Language translators. All rights reserved.