Alawi 7
7
Malheheriyo makina o isadaka cho ulhivelhihera
1“Alha anottwara alha phi malheheriyo anaacha isadaka yo ulhivelhihera milhatu cho utteka. Yeyo isadaka iyo itakatifu chinene. 2Mwannama o isadaka yo uthamiha utteka noohithiya vakittu vanohithelhiya ashinama o isadaka cho urimeelhipahi aya, ni iphome aya inoohikiya urukureria madhubahu onkhaye. 3Makhura aya onkhaye, anoothamihiya ni upahiya, yaani makhura o mwiilha ni makhura anokhunelha marupo. 4Chiicho athamiheke imphio piilhi ni makhura aya vamoka ni ithayi yoombone ya ahapa. 5Opochera ishaani anoopaha chechiyo chittu chiyo vachulhu madhubahu ukhalha isadaka chinokumihiya wa Apwiiiya Nlhuku wo mooro. Yeyo phi isadaka yo ulhivelhihera milhatu cho utteka. 6Kila nlhopwana munlhokoni mwa achishaana a Naharuni vekha aya phi nothananiya ulhia yeyo isadaka iyo. Phi isadaka itakatifu chinene ni iyo ilhelhiyeke untenjeni, Nihema Nitakatifu.
7“Malheheriyo o isadaka yo ulhivelhihera milhatu cho utteka, ni isadaka yo uthamiha uwonya, mamokaru. Opochera ishaani anopanga ittu yo waathanihiya phi nohalha ukusha inama yo isadaka iyo. 8Opochera ishaani anokumiha isadaka yo upahiya inokumihiya ni ntu riyoothe, akusheke nrapalha no mwannama kumihiye isadaka uyo. 9Isadaka iriyoothe yo choolhia yooshiye viikho ama waapeiya munsufuriyani ama nchikalaangoni inokhalha yawaya opochera ishaani anokumihera ayo. 10Nansho kila isadaka yo choolhia, ihivinre viikho, ikhalhe yo uthakanihiya ni makhura ama yo uhithakanihiya, inookhalha yawaya iyari i Naharuni, ni onkhaye akawelhiyeke rata wo ulhikaana.
Malheheriyo makina o isadaka cho uwiiha mpuha
11“Vano anottwara alha phi malheheriyo anaacha isadaka cho uwiiha mpuha, chinooria awe ntu ukumiha wa Apwiiya Nlhuku. 12Yakhalhaka ntu nookumiha yeyo isadaka iyo unshukuru Nlhuku, paahi, awiiheke isadaka yo mwannama vamoka ni maandazi ahiheliye ihengedure ahikiye makhura o izeituni, ni mikatte cho uvevialha chihikiye makhura ni maandazi o iphepa yo shilhia ithakanihiye ni makhura o izeituni. 13Vamoka ni yeyo isadaka awe yo uwiiha mpuha, yo unshukuru Nlhuku iyo, awiiheke ni maandazi ohelhiya ihengedure. 14Ukhuma wo yayo maandazi o isadaka ayo, akumiheke wa Apwiiya Nlhuku niandazi nimoka ukhuma wo kila isadaka. Yayo maandazi ayo anookhalha awawe opochera ishaani nohika madhubahu iphome yo isadaka cho uwiiha mpuha uyo. 15Inama yo yeyo isadaka yo uwiiha mpuha yo unshukuru Nlhuku iyo ikhuuriyeke nenno nihuku ninokumihiya aya nno, ihihalhihiye ata vakani mpaka wichishu.
16“Nansho yakhalhaka yeyo isadaka yo waathanihiya iyo ishaani wa Nlhuku, ama yo uttuna ntu mwanene, ilhiyeke nenno nihuku ninokumihiya aya nno, ni ikina yahalhaka inowooria ulhiya nihuku no nayelhi. 17Nansho inama iriyoothe yo yeyo isadaka iyo yahalhaka mpaka nihuku no neraru ipahiyeke vamooroni mpaka uvia. 18Yakhalhaka inama iriyoothe yo isadaka yo uwiiha mpuha inookhuuriya nihuku no neraru, yeyo khinorumelhelhiya umihoolho wa Apwiiya Nlhuku. Mena yeyo isadaka iyo khinopocheriya wo mahalha a ntu kumihilhe uyo. Yeyo inama iyo khinolhoka ni ntu nohalha ukhuura nootwarushiya wo uwonya wawe.
19“Inama iriyoothe inovara ittu yo unyalha umihoolho wa Apwiiya Nlhuku, ihikhuuriye, ipahiyeke vamooroni. Nansho attu onkhaye arii atakatifu, anowooria ukhuura yeyo inama ikumihiye isadaka yo waathanihiya wa Apwiiya Nlhuku iyo. 20Nansho ntu riyoothe hinorumelhelhiya wo iphiro cho waalhapelha Apwiiya Nlhuku, akhuuraka yeyo inama iyo, yoyo akhotiyeke ni attu awe. 21Tho, ntu riyoothe novara ittu iriyoothe inyalhihiye, ama ittu yo unyalha yo mwiiruttuni mwa ntu, ama mwannama o unyalha, ama ittu iriyoothe yo unyalha, akhuuraka inama yo isadaka yo uwiiha mpuha ikumihiye wa Apwiiya Nlhuku, yoyo ntu uyo akhotiyeke ni attu awe.”
22Apwiiya Nlhuku nkayeerelha ashinna Musa tho wiira, 23“Mwaahimerieke attu o Israeli wiira, nhilhie makhura o ing'ope ama o ikhondoro ama o ipuri. 24Makhura o mwannama riyoothe khwilhe mwanene ama o mwannama eeviye ni mwannama o mwiithuphini anowooria weeshiya wo upangelhiya ittu ikina, nansho nhilhie mena. 25Ntu riyoothe alhiaka makhura o mwannama kumihiye wa Apwiiya Nlhuku wo mooro, nookhotiya ni attu awe. 26Tho, nhilhie mena iphome iriyoothe, ikhalhe yo mwaanuni ama yo mwannama vakittu variwoothe vanokhalha inyu. 27Ntu riyoothe alhiaka iphome iriyoothe, nookhotiya ni attu aka.”
28Tho, Apwiiya Nlhuku aheerelha ashinna Musa wiira, 29“Mwaahimerieke attu o Israeli wiira, ntu riyoothe nowiiha isadaka yo uwiiha mpuha, nothananiya wiira awiiheke mpatta wo yeyo isadaka iyo, wooniha wo ikekhiaye wiira isadaka ya Apwiiya Nlhuku. 30Aawiihereke wo miono chawe mwanene thoko isadaka yo upahiya wo mooro. Awiiheke makhura o mwannama vamoka ni ikidari inohalha awe upanga ittu yo wooniha wiira nokumiha wa Apwiiya Nlhuku. 31Opochera ishaani apaheke mooro makhura onkhaye vachulhu madhubahu, nansho ikidari iyo inohalha ukhalha i Naharuni ni achishaana aya, opochera ishaani. 32Mweto wo wiimonono wo utulhi wo mwannama o isadaka chinyu cho waathanihiya, mwaavaheke opochera ishaani. 33Yoyo mweto uyo unokhalha wawawe opochera ishaani o iyari i Naharuni novara ntheko wo ukumiha iphome yo isadaka cho uwiiha mpuha ni makhura aya nenno nihuku nno. 34Apwiiya Nlhuku ahaalhehera attu o Israeli wiira yeeshe vathotho ikidari ni mphanja o mwannama o isadaka chaya cho uwiiha mpuha wiira yaavahe opochera ishaani Naharuni ni iyari aya. Ukhalhawaya yeyo yeesheriye yayo opochera ishaani ayo mahuku onkhaye. 35Yoyo phi mpatta weeshiye vathetho wo nlhatu ni Naharuni ni achishaana aya ukhuma isadaka chinaakumihera aya Apwiiya Nlhuku wo mooro, ukhuma nihuku neeshiye aya ukhalha opochera ishaani a Apwiiya Nlhuku.” 36Yoyo phi mpatta wo isadaka waalhehenre aya Apwiiya Nlhuku wa attu o Israeli wiira aavaheke opochera ishaani, ukhalha phi mahalha aya o ntheko waya, nihuku vaahikiye aya makhura. Ni iyo inookhalha phi mahalha aya mahuku onkhaye.
37Paahi yayo phi malheheriyo anaacha isadaka cho upahiya, isadaka yo choolhia, isadaka yo uthamiha uwonya, isadaka cho uthamiha utteka, isadaka cho uttukuriya ni isadaka cho uwiiha mpuha. 38Yayo phi malheheriyo Apwiiya Nlhuku yaavahilhe aya ashinna Musa nihuku naalhehenre aya attu o Israeli umwaakoni Usinai nne, wiira yawiihere isadaka chaya uthakoni Usinai.
Currently Selected:
Alawi 7: MOT
Highlight
Share
Copy
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
