Alawi 19
19
Malheheriyo makina o upanga chittu cho rera
1Apwiiya Nlhuku yaheerelha ashinna Musa, 2“Mwaahimerie nlhoko wonkhaye wa attu o Israeli cho, anothananiya wiira, nkhalhe atakatifu ukhalhawaya mii Apwiiya Nlhuku inyu, ki ntakatifu.
3“Kila mmoka inyu nothananiya wiira aathimiche anumwanawe ni athumwanawe, ni uvara Nihuku no Wiittuwa, mii phi Apwiiya Nlhuku inyu.
4“Nhikihiye mii nkamwaarukunuwelha isinyago cho milhuku, mena nhihane isinyago cho milhuku. Mii phi Apwiiya Nlhuku inyu.
5“Vanokikumihera inyu isadaka mii Apwiiya Nlhuku cho ukhalha wo mpuha ni Apwiiya Nlhuku, nkikumihereke thoko chinothananiya aya wiira irumelhelhiye wo nlhatu winyu. 6Inama cho isadaka iyo chikhuuriyeke nenno nihuku nikumihiye aya nno ama waashelhe waya. Iriyoothe inohalha mpaka nihuku no neraru ipahiyeke mooro. 7Yakhalhaka inama ihanlhe inookhuuriya nihuku no neraru, yeyo ittu iyo phi yo urushiha, ni yeyo isadaka iyo khinorumelhelhiya. 8Ni ntu nohalha ukhuura yeyo inama iyo nothananiya wiira atwarushiye utteka wawe, ukhalhawaya honanariha ittu itakatifu ya Apwiiya Nlhuku. Yoyo ntu uyo hilhohiye ni attu awe.
9“Vanohalha inyu ukhungura choolhia cho mmatani mwinyu, nhikungure chonkhaye mpaka mmwiinanoni imata inyu, mena nhihokolhie utulhi urokottaniha chihanlhe. 10Nhihokolhelhe urokottaniha izabibu chihalhehanlhe ama urokotta chaamonre, mwaahiyereke amashikini ni alheto. Mii phi Apwiiya Nlhuku inyu.
11“Nhiiye, nhithepiache mena uhimiacha cho woothachiya. 12Nhilhupelhe nchina naka wo woothacha, mweeraka chiicho nnoonanariha nchina na Nlhuku inyu. Mii phi Apwiiya Nlhuku.
13“Nhimwaakhe namwaatamana inyu wala umwiiyera. Malhivo a attu anovara ntheko inyu ahikhalhe uwannyu ashelhelhihaka mpaka wichishu. 14Nhinruwane ntu ohiiwa wala nhitiyelhelhe uhoolho ntu ohoona, nansho munthimicheke Nlhuku. Mii phi Apwiiya Nlhuku.
15“Vanohukumulha inyu mwaanyulheke wo ikekhiaye. Nhimmwehe ntu wiitho wala umwoova, akhalhe mmashikini ama ntu rii ni ikuru. Nansho nnothananiya wiira mwaanyulheke milhatu cho amwaatamana inyu wo ikekhiaye. 16Nhivirevire mwootheriaka manyaalhoko inyu. Nhinhelhe namwaatamana inyu ntatakoni, nkeeviya wo nlhatu no malhove inyu. Mii phi Apwiiya Nlhuku.
17“Nhinvenge nlhoko inyu, nansho mwaathaneke ikatema chonkhaye ni amwaatamana inyu wiira nhiwe mwaawonya. 18Nhiilhivelhelhihe ama nhaathunalhelhe attu o iyari inyu, nansho munttuneke namwaatamana inyu thoko chineettuna inyu mwanene. Mii phi Apwiiya Nlhuku inyu.
19“Nvarechesheke malheheriyo aka.
“Nhihiye mihuwo chinyu chiwelhiye ni ashinama o nikosho nikina.
“Nhaalhe imbeyu cho makosho meelhi mmamatani mwinyu.
“Ni mena nhiware ikuwo chittaviye wo makosho meelhi o ikuwo.
20“Nlhopwana arupaka ni nthiyana ipotta thelhiye ni nlhopwana nkina, nansho khanaaya woopolhiya wala uvahiya uneethi, nthiyana ni nlhopwana nrupanne uyo oyeelhi atwarushiyeke, nansho ahiiviye ukhalhawaya yoyo nthiyana uyo aari hinaaya uvahiya uneethi. 21Yoyo nlhopwana uyo awiiheke uhoolho wo Nihema Nitakatifu isadaka awe yo ikhondoro ilhopwana yo uthamiha uwonya ni ukikumihera Mii Apwiiya Nlhuku. 22Opochera ishaani anompangelha ittu yo waathanihiya wa Apwiiya Nlhuku wo yeyo ikhondoro iyo, uwonya upangilhe awe. Ni uyo noohiyereriya uwonya upangilhe awe uwo.
23“Vanohalha inyu uphiya ilhapo yo Ukanaani ni waalha makosho onkhaye o miiri cho maphepu, nhilhie yayo maphepu ayo iyaakha ttaaru. 24Iyaakha yo neecheshe maphepu aya onkhaye anookhalha matakatifu, akumihiyeke isadaka yo waatotopelha Apwiiya Nlhuku. 25Nansho mmweeke mwaalhia maphepu iyaakha yo nethanu, ni choolhia chinyu chinowunchereria. Mii phi Apwiiya Nlhuku inyu.
26“Nhikhuure inama iriyoothe irii ni iphome.
“Nhimoope nttiti, mena nhilhwee.
27“Nhuuwulhe ikharari chinyu cho nthotho mmuruni mwinyu mena nhuuwulhe irori chinyu cho nthotho vairorini winyu.
28“Nhiittume inepo iriyoothe mwiiruttuni mwinyu wo nlhatu no ukhwelhiya ama wiikhapakacha mwiiruttuni mwinyu. Mii phi Apwiiya Nlhuku.
29“Nhinnanarihe mwalhi inyu wo umpanga o ulhuva, ilhapo yonkhaye ihiwe imorelhaka muulhuvani, nkayaachara cho uhilhoka.
30“Nvarechesheke Nihuku no Wiittuwa naka ni uthimicha Nihema Nitakatifu naka. Mii phi Apwiiya Nlhuku.
31“Nhirwee wa attu omoopa nttiti, o mashoka mena attu o miruchi wiira mwaalhepelhe owoopelheni nttiti, nkamweenanariha. Mii phi Apwiiya Nlhuku inyu.
32“Mwakhalhaka uhoolho wa ashulhupalhe mweemelheke, ni waavaha nthimicho aya, ni inyu munthimicheke Nlhuku inyu. Mii phi Apwiiya Nlhuku inyu.
33“Yakhalhaka haawo nlheto munlhokoni mwinyu nhimpangelhe chittu cho uhilhoka. 34Yoyo nlheto nokhalha ni inyuva uyo nookhalha uwannyu thoko nnenchi, ni inyuva munttuneke thoko chineettuna inyu mwanene, ukhalhawaya ni inyu mwaari alheto ilhapo yo Umisri. Mii phi Apwiiya Nlhuku inyu.
35“Nhihiye mena waamulha wo ikekhiaye inaacha maphimelhiyo o urekama, o ulhemelha ni o machariho. 36Nnothananiya wiira ntumiyeke ikapani yo ikekhiaye, ni cho uphimelha cho ikekhiaye. Mii phi Apwiiya Nlhuku, Nlhuku inyu, kuuthaminheni ilhapo yo Umisri.
37“Nnothananiya wiira nvareke ni upangacha malheheriyo aka ni malheheriyo aka onkhaye. Mii phi Apwiiya Nlhuku.”
Currently Selected:
Alawi 19: MOT
Highlight
Share
Copy
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
