Alawi 16
16
Nihuku no ulhevelhelhiya nlhatu wo uwonya
1Apwiiya Nlhuku yahoolhumana ashinna Musa, baada yo urimeelha achishaana eelhi a Naharuni ikatema vaatamenrie aya Apwiiya Nlhuku, ni ututumiha ubani wahaathananiya. 2Yeerenlhe wiira, “Mwaahimerie onninyu Naharuni wiira ahikelhe Vakittu Vatakatifu Chinene utulhi wo nipaziya ikatema ihinothananiya. Ahikelhe vavawo vakittu vawo ukhalhawaya phi vakittu vanokhumelhelha aka nnihuteni, vachulhu ikifuniko yo Nisanduku no Malhehano, vaneehaniya nipuro no uhiyerera milhatu. Yaahirumelhelheke, anookhwa. 3Naharuni ahinaya ukelha Vakittu Vatakatifu Chinene awiiheke n'dume nikani no ing'ope no isadaka yo uthamiha uwonya ni ikhondoro ilhopwana yo isadaka yo upahiya.
4“Amalhihaka, arapeke maashi iruttu yonkhaye. Baada yo vavawo, awareke ikuwo chinowariya ni opochera ishaani, yaani ikuwo choteelha cho nhina, nkogo woteelha, anattukilhe nshipi woteelha nnyununi ni mphumburu mmuruni.
5“Aakusheke mabeberu eelhi o ipuri ukhuma wa attu o Israeli o nlhatu wo isadaka yo uthamiha uwonya ni ikhondoro ilhopwana imoka wo nlhatu no isadaka yo upahiya. 6Naharuni akumiheke n'dume no ing'ope no isadaka yo uthamiha uwonya waya anene, ni nlhatu wo waathanihiya wo nlhatu waya anene ni inupa aya. 7Yamalhaka akusheke mabeberu meelhi o ipuri alhe ni weesha vakhiviru ni nlhako wo Nihema Nitakatifu. 8Vavawo akusheke malhuku meelhi, oopelheke ikhura mabeberu ayo. Ikhura imoka wo nlhatu no isadaka wa Apwiiya Nlhuku, ni ikhura ikina wo nlhatu no nibeberu ninoomolhiya vanikambini nineehaniya Azazeli. 9Awiiheke nibeberu noopelhiye ikhura wo nlhatu no Apwiiya Nlhuku ni ukumiha isadaka yo uthamiha uwonya. 10Nansho nibeberu noopelhiye ikhura wo nlhatu no isadaka yo uhiyereriya uwonya nne, nikumihiyeke umihoolho wa Apwiiya Nlhuku ninari nikumi wiira nipangelhiye ittu yo waathanihiya. Yamalhaka, Naharuni ahiyeke nibeberu nikina nineehaniya Azazeli nno, noomolhelhiye uthakoni, ninakushilhe uwonya wa attu.
11“Yamalhaka vavawo, Naharuni akumiheke isadaka yo n'dume no ing'ope yo uthamiha uwonya waya anene, ni upanga ittu yo waathanihiya wo nlhatu waya anene ni wo nlhatu wa manyaalhoko aya. Ahitheke n'dume no ing'ope no isadaka yo uthamiha uwonya nno ni uchinga iphome nnyiponi. 12Akusheke inyipo yo upahera ubani, makhalha o mooro anokhuma vamadhubahuni umihoolho wa Apwiiya Nlhuku, ni mathatha meelhi o ubani ushilhiye rata chinene. 13Awiiheke yoyo ubani uyo umihoolho wa Apwiiya Nlhuku ni uhelha vamooroni wiira mwiishi watutumaka ukhuneelhe ikifuniko yo Nisanduku no Malhehano nirii phi nipuro no uhiyereriya milhatu cho uwonya wiira ahikhwe. 14Akusheke iphome vakani yo n'dume no ing'ope nno ni unyunyihera wo nikokho naya mpata unosha nchuwa vachulhu ikifuniko yo Nisanduku no Malhehano, mikwaha saba. Yamalhaka, anyunyihereke wo nikokho naya, uhoolho wo Nisanduku nno mikhwaha saba.
15“Yamalhaka, ahitheke nibeberu no isadaka yo uthamiha uwonya nne wo nlhatu no attu onkhaye. Awiiheke iphome aya iyo Vakittu Vatakatifu Chinene ni upanga thoko chipannge aya wo iphome yo ing'ope ilhe, wo unyunyihera ikifuniko yo Nisanduku no Malhehano mikwaha saba, ni mpata wo uhoolho wo Nisanduku nno mikwaha saba chiicho. 16Wo yeyo iphiro iyo anoottukuria Vakittu Vatakatifu Chinene, wo nlhatu no unanara, utteka, ni uwonya wonkhaye wa attu o Israeli. Apangeke chiicho wo Nihema Nitakatifu, ukhalhawaya nirii variyari mwa yayo attu arii o nanara wo iphiro chihinorumelhelhiya wo waalhapelha Apwiiya Nlhuku ayo. 17Toka ikatema Naharuni vanokelha aya Vakittu Vatakatifu Chinene upangani ittu yo wiittukuria wo nlhatu naya anene, ashilhoko aya ni attu onkhaye attu o Israeli, hikhalhe mena ntu riyoothe nhina Nihema Nitakatifu, mpaka vanohalha aya umalhiha ni ukhuma vathe. 18Yamalhihaka akhumeke ni urwaa varii madhubahu arii umihoolho wa Apwiiya Nlhuku ni upanga ittu yo wiittukuria. Akusheke iphome ikina yo n'dume no ing'ope ni yo ipuri ilhe ni uhikahika inyaka urukureria madhubahu onkhaye. 19Anyunyihereke madhubahu ayo iphome wo nikokho naya mikwaha saba wo uttukuria ni weesha umihoolho wa Apwiiya Nlhuku, athamihe unanara wonkhaye wa attu o Israeli wiira arumelhelhiye wo iphiro cho waalhapelha Apwiiya Nlhuku.
Ipuri inoomolhelhiya uthakoni
20“Naharuni amalhihaka uttukuria Vakittu Vatakatifu Chinene, Nihema Nitakatifu ni madhubahu, awiiheke nibeberu nne ninari nikumi umihoolho wa Apwiiya Nlhuku, wo nlhatu no woomolhiya nirwee uthakoni. 21Yamalhaka, Naharuni eesheke miono chaya vamuruni vo nenno nibeberu nikumi nno ni uhimiacha vachulhu waya itiyamaru yonkhaye ya attu o Israeli, utteka waya ni uwonya waya wonkhaye ni uhiya vamuruni wa ipuri iyo. Amalhihaka, athaphulheke ahiyeke nittawelhe uthakoni, noomolhiyaka ni ntu riyoothe neekumiha wo uttuna wawe. 22Aphiyaka wowo, ntu uyo ahokolhieke, ahiyeke nibeberu nno nirweeke uthakoni uhirii attu, uno ninakunshe uwonya wa attu wonkhaye.
23“Yamalhakaru, Naharuni ahokolhieke nhina Nihema Nitakatifu, arulheke ikuwo chaawanre aya vaakelha aya Vakittu Vatakatifu Chinene chilhe ni uhiya mwommo. 24Arapeke mwommo mpani mmo vakittu vatakatifu ni uwara ikuwo chaya. Amalhihaka, akhumeke vathe ukumiha isadaka aya yo upahiya, ni isadaka yo upahiya ya attu o Israeli, wiira apange ittu yo waathanihiya wo nlhatu waya anene ni wo nlhatu wo attu onkhaye. 25Apaheke vamooroni makhura a ashinama o isadaka yo uthamiha uwonya vachulhu madhubahu.
26“Ntu aarweehilhe nibeberu no ipuri nikushilhe uwonya wa attu wiithuphini nne, apuputteke ikuwo chawe ni urapa maashi hinaaya uhokolhia unikambini. 27Marapalha, inama ni mavi o n'dume no ing'ope ni ipuri chikumihiye isadaka yo uthamihiya uwonya ni iphome aya nkayaarweehiya Vakittu Vatakatifu Chinene wiira yapangelhiye ittu yo waathanihiya chilhe, chikushiyeke chonkhaye chirweehiyeke uchereshere nikambi chapahiyeke mooro. 28Ntu nohalha upaha chechiyo chittu chiyo, amalhihaka, apuputteke ikuwo chawe ni urapa maashi, hinaaya uhokolhia unikambini.”
Nihuku no uhiyereriya milhatu
29“Alha phi malheheriyo nnothananiya inyu uttwara wo uhihiya mahuku onkhaye wiira, nihuku no khumi no mweeri wo saba, mwaattiva mwaashinene ni ata alheto anokhalha munlhokoni mwinyu, nttukeke nenno nihuku nno ni uhiya uvara mitheko. 30Mpangeke chiicho ukhalhawaya nenno nihuku nno waathanihiya unoopangiya wo nlhatu winyu, ni uttukuriya uwonya winyu, wiira nrumelhelhiye umihoolho wa Apwiiya Nlhuku. 31Nenno nihuku nno phi nihuku no wiittuwa unene, nttukeke. Ni yayo phi malheheriyo anothananiya inyu uttwara wo mahuku onkhaye. 32Opochera ishaani ahikiye makhura ni weesheriya miono wiira avarelhe vanipuroni va athumwane, phi nohalha upanga ittu yo waathanihiya nawanre ikuwo chitakatifu chorera choteelha. 33Yayo anoopanga ittu yo waathanihiya wo nlhatu no Vakittu Vatakatifu Chinene, wo nlhatu no Nihema Nitakatifu, madhubahu, opochera ishaani ni wo nlhatu no attu onkhaye o Israeli. 34Alha etu phi malheheriyo o mahuku onkhaye, nnoothananiya wiira attware wiira apange ittu yo waathanihiya wo nlhatu no attu o Israeli nkwaha mmoka kila iyaakha ahiyereriye uwonya waya.”
Paahi ashinna Musa nkayaapanga chiicho thoko chaalheheriye aya ni Apwiiya Nlhuku.
Currently Selected:
Alawi 16: MOT
Highlight
Share
Copy
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
