Nayoshua 8

Iwani yo Uai inoovariya mateeka ni ulhakalhihiya.

1Apwiiya Nlhuku nkayeerelha Nayoshua wiira, “Nhoove wala nhikelhiye nipampa nirinoothe, mwaakusheke manyaasikari inyu onkhaye nrweeke iwani yo Uai, ukhalhawaya amwene o Uai kiheesha mmiononi mwinyu vamoka ni attu aya, iwani aya ni ilhapo aya. 2Mwaapangelheke iwani yo Uai vamoka ni amwene aya thoko chaapangenlhe inyu iwani yo Uyeriko ni umwene awe vamoka ni mihuwo chaya chinohala inyu uvara mateeka chinookhalha chawinyu. Nrweeke mwaateke iwani iyo wo ukhumelhelha utulhi.”

3Paahi Nayoshua nkayaathama vamoka ni manyaasikari aya onkhaye urwaa Uai. Nkaathanlha attu o uchuwelha waatakana ikhoto maelufu makhumi mararu ni weerelha ahoolhelhe ikatema yo uhiyu. 4Nkayaalhehera cho; “inyuv anoomindelha Mwiiwelhelhe mwaattiva iwani ukhuma mpata wo utulhi. Mweevitheke, nhirwee utayi ni iwani, nansho nkhalheke miitho ikatema yonkhaye. 5Mii vamoka ni attu onkhaye arii vamoka ni mii, ninowaatameria iwani. Attu vanohalha aya ukhuma vathe uwa unittwarani thoko cheera aya mahuku o utulhi alhe, hiyaano ninowattawa. 6Ni ayo vanohalha aya uthepa unittwara mpaka akhalhe utayi ni iwani aya, ukhalhawaya anaanyihereke wiira ahonoomolha thoko chaapannge aya mpacho. Hiyaano ninowaahiya anoomolheke. 7Vavawo mwaattiva nkhumelhelheke ukhuma weevinthe inyu, ni uvara mateeka iwani aya, ukhalhawaya Apwiiya Nlhuku inyu anouvahani yeyo iwani iyo. 8Mwamalhihaka uvara mateeka iwani iyo, mwapaheke mooro. thoko Apwiiya Nlhuku chilhehenre aya. Yayo phi malhehero anohalha inyu uttwara.” 9Paahi, Nayoshua nkayeerelha arwaacheke vakittu vaya wo wiivitha, ni ayo nkayaakhalha mpata uneelha nchuwa wo iwani yo Uai, iriyari yo iwani yo Uai ni Ubetheli. Nansho Nayoshua yaarumpe yoyo uhiyu uyo unipuroni wa attu o Uisraeli.

10Nayoshua nkayonkwa wichishuru nkayaathothokaniha attu o Uisraeli ni ukelhelha iwani yo Uai, anari vamoka ni ashulhupalhe. 11Manyaasikari onkhaye yattukanne aya ahaatameria iwani ni weesha nipuro mpata wo uchulhu iwani Uai, variyari nikoote iwani yo Uai. 12Paahi nkayaakusha attu akina maelufu nthanu nkayeesha eevithe iriyari yo iwani yo Ubetheli ni Uai, uneelhelha nchuwa iwani yo Uai. 13Mphingo muulhupalhe wa manyaasikari weeshiye mpata wo uchulhu wo iwani, ni akina aahanlhe alhe eeshiye uneelha nchuwa ninomindelha wo iwani. Yoyo uhiyu uyo Nayoshua aarumpe uhito.

14Amwene o iwani yo Uai yooneke chiicho, wichishuru ni urwaa uhito wo ukelhelha Uaraba wiira akumaane ni attu o Uisraeli ukhotoni. Nansho khayaachuwenlhe wiira iwani ayo yaari ineethelhiye ukhuma utulhi. 15Yamalheke Nayoshua vamoka ni attu aya nkayeepanga thoko wiira anowoochelha, nkayaachokholha uttawa akelhelhaka uthakoni. 16Attu onkhaye yaari vawani vawo yaheehaniya wiira yaatware attu o Uisraeli, ni vaari aya yaatwarelhelhaka Nayoshua, ahothama vawani ni urwaa utayi ni iwani aya. 17Khaawo ntu riyoothe aahanlhe iwani yo Uai, Ubetheli nkayaahiya mikhora wo uhitteiya, nkayaarwaa waatwarelhelha attu o Uisraeli.

18Paahi Apwiiya Nlhuku nkayeerelha Nayoshua “Nthoonyeke nivaka ninyu iwani yo Uai, ukhalhawaya kinouvahani yeyo iwani iyo.” Nayoshua nkayaathoonya nivaka naya iwani yo Uai. 19Phiyaru Nayoshua yathoonyeke nivaka naya Uai uwe, mphingo weethelha mpata nkina nkawaakhumelhelha ni ukelha vawani, nkawaavara mateeka iwani ni urimeelhiha wo mooro. 20Attu o Uai yaweheke utulhi, nkayoona mwiishi ukhumaka uwani uwo uwelhaka mpaka wiirimu. Ni ayo khayoonrie uttawa mpata uriyoothe, ukhalhawaya attu o Uisraeli yahaarukunuwelha yayo yaatwarelhelha ayo. 21Nayoshua ni attu o Uisraeli onkhaye yooneke wiira mphingo weethelha uhovara mateeka iwani, ni wiira mwiishi waari uwelhaka nchulhu, yahaarukunuwelha ni uchokholha weeva Uai. 22Attu yaahanlhe vawani ahothama nansho onkhaye yaari anarukureriye ni attu o Uisraeli ari anavanre ilhapo yo Uai nkayakhuma watwarelhelha ayo nkayeeviya, hihalhaka ata ntu mmoka aya. 23Nansho mwene o iwani yo Uai ahovariya mateeka anari akumi, ni urweehiya wa Nayoshua.

24Attu o Uisraeli amalhiheke weeva attu onkhaye o Uai uthakoni uwo yaatwarelhenlhe alhe, ahohokolhia vawani Uai ni weeva attu onkhaye ahalhenlhe mwommo ayo. 25Attu onkhaye o Uai yeeviye nenno nihuku nno manyaalhopwana ni manyaathiyana yaari wo umalhaka attu maelufu khumi na meelhi. 26Nayoshua khayaakurunshe moono aya waavarenlhe aya nivaka naya uthoonya Uai, mpaka veevilhe aya attu onkhaye o yeyo iwani iyo. 27Attu o Uisraeli ahovara ni ukusha; ashinama, ni nhakhu tho thoko Apwiiya Nlhuku chaalhehenre aya Nayoshua. 28Paahi Nayoshua ahorimeelhiha iwani yo Uai wo mooro ni uhiya mathalharu mpaka lhelho nna. 29Yamalheke, nkayaathomia amwene o Uai umwirini mpaka uchechilho. Nansho nchuwa nachokholheke wiilha, Nayoshua aholhehera ntembo uyo uthamihiye umwirini warihiye vanlhakoni wo iwani. Yamalhaka, ookelhiye malhuku menchi vachulhu ntembo uyo, yayo malhuku ayo ahawo mpaka lhelho nna.

Malhehero shomia umwakoni Ebali

30Yamalheke, Nayoshua nkayaathekelha Apwiiya Nlhuku, Nlhuku o Uisraeli madhubahu umwaakoni Uebali, 31Aapannge thoko ashinna Musa karumiya a Apwiiya Nlhuku chaalhehenre aya attu o Uisraeli, thoko chilhephiye aya nhina ikitabu yo ikekhiaye ya ashinna Musa wiira, “Anookhalha madhubahu athekiye wo malhuku ahihemiye wala ukwakwanyiya ni ikerero iriyoothe yo iyuuma.” Vachulhu wo yayo madhubahu ayo yaakumihere Apwiiya Nlhuku isadaka cho upahiya vamooroni ni isadaka cho mpuha. 32Ni uhoolho wo mphingo wonkhaye wa attu o Uisraeli, Nayoshua ahohokolhelha tho ulhepa ikekhiaye ya ashinna Musa vachulhu malhuku. 33Attu o Uisraeli onkhaye vamoka ni ahoolhelhi aya, ashulhupalhe ni waamulha ni alheto onkhaye yaari aya, yaheemelha kila mpata awehaka Nsanduku no Malhehano uhoolho wa opochera ishaani Alawi yaakhushilhe Nsanduku no Malhehano na Apwiiya Nlhuku. Nusu aya aheemelha mwaako wo Ugerizimu ukhalhaka utulhi waya, ni nusu akina nkayeemelha uno mwaako wo Uebali unari utulhi waya, thoko ashinna Musa karumiya a Apwiiya Nlhuku chaalhehenre aya utulhi vawo, mwaha unaacha uvahiya mpuha wa attu o Uisraeli. 34Yamalheke, Nayoshua nkayaashomelha ikekhiaye chonkhaye, vamoka ni ibarakha ni malhavo thoko chilhephiye aya nhina ikitabu yo Malhehero. 35Khanimo nlhove nalheeheriye ni ashinna Musa, Nayoshua nahaashomme aya uhoolho wa attu o Uisraeli, aariwo munlhokoni mwaya manyaathiyana, achishana ni alheto.

Currently Selected:

Nayoshua 8: MOT

Highlight

Copy