Nayoshua 11
11
Nayoshua anowaakottolha mamwene o nchulhu
1Amwene Nayabini o iwani yo Uhazori veewilhe aya yoyo mwaha uyo, yahorweha nttenga wa amwene Nayobabu, o Umadoni ni wa amwene o Ushimrani, ni wa amwene o Uakshafi, 2ni wa mamwene arii umiakoni mpata wo uchulhu, ni mamwene aakhalha Uaraba mpata wo uchawa wo Ukinerothi, umakoteni ni yaari Unafothdori mpata uneelha nchuwa. 3yahorweeha nttenga wa Akaanani yaari mpata unoosha nchuwa ni uneelha nchuwa, wa Aamori, wa attu o Uhiti, wa attu o Uperizi, wa Ayebusi yaakhalhaka umiakoni ni wa attu o Hivi yaakhalha vakhiviru ni mwaako wo Uhermoni ilhapo yo Umizpa. 4Paahi nkayaathama onkhaye ni miphingo chaya chulhupalhe cho manyaasikari. Ni ayo ari enchi thoko nhaava wo umbwaani vamoka ni nkukuta cho upurulhiya ni a farasi ni ifarasi akina enchi chinene. 5Alha mamwene onkhaye alha aholhutaana vamoka ni weesha nipuro naya vanraponi Umeromu wiira yaatakane ikhoto ni attu o Uisraeli.
6Apwiiya Nlhuku nkayeerelha Nayoshua, “Nhoove yayo, ukhalhawaya meelho, ikatema thoko ilha, kinowaarimeelhiha onkhaye wo nlhatu no attu o Uisraeli, ni inyu nnootupulha mithinga cha a farasi aya ni upaha mooro nkukuta chaya.” 7Paahi, wo uhikhulhuvelhiya unraponi Umeromu Nayoshua vamoka ni mphingo aya wonkhaye ahokhumelhelha ni waatakacha. 8Apwiiya Nlhuku nkayaavaha ukottolha attu o Uisraeli, ni ayo nkayaatakacha ni waatopora mpaka Usidani Yulhupalhe ni Umisrefothmaimu, mpaka mpata wo unoosha nchuwa uhito wo Umizpa. Attu o Uisraeli nkayaata ni weevakacha onkhaye. 9Yamalheke, Nayoshua ahotupulhacha mithinga cha a farasi aya chonkhaye ni upaha mooro nkukuta chaya, thoko Apwiiya Nlhuku chaalhehenre aya.
10Vaari aya ahokolhiaka, Nayoshua ahovara maateka iwani yo Uhazori. Nkayeeva amwene aya ukhalhawaya phi ari nashirongora o chechiyo imwene chonkhaye chiyo. 11Yamalheke ahochokholha owiiva ankayaapaha mooro iwani yo Uhazori ni weeva attu aya onkhaye, ahinhiyaka ata ntu mmoka.
12Chiicho tho ahovara mateeka iwani chikina chonkhaye chilhe ni weevakacha mamwene aya onkhaye, thoko ashinna Musa, karumiya a Apwiiya Nlhuku chaalhehenre aya. 13Nansho attu o Uisraeli nkayapanhe mooro iwani chaari umiakoni cho mathalha aya, nansho uwani wa Uhazori vekha aya, Nayoshua phi yaarimelhinhe. 14Attu o Uisraeli ahokusha chittu chonkhaye chaavanre aya mateeka ni ashinama o chechiyo iwani chiyo, ni weeva attu aya onkhaye, ni wala khayanhiilhe ata ntu mmoka. 15Thoko Apwiiya Nlhuku venreenlhe aya ashinna Musa wiira, ni ayo ashinna Musa nkayaalhehera Nayoshua yaapannge wo hihiya ittu Apwiiya Nlhuku yaalhehenre ashinna Musa
Ilhapo chiavariye mateeka ni Nayoshua.
16Nayoshua ahovara mateeka ilhapo yonkhaye: Mipatta cho umiakoni ni ilhapo yo Unegebu, ilhapo yo Ugosheni, ilhapo yo uhikhalhe ni miako, ilhapo yo Uaraba, miako cho Uisraeli ni mipatta chaya cho uhikhalhe ni miako, 17yahaavara mateeka ni weeva mamwene onkhaye o chechiyo ilhapo chiyo, uchokholha mwaako wahaarina ittu wo Uhalaki waatameria ni Useiri mpaka Ubaalgadi unikoote no Lebanoni, ni uchawa wo mwaako wo Uhermoni. 18Ikhoto yaatakanne aya Nayoshua ni yayo mamwene onkhaye ayo yahopicha chinene. 19Khiiwo uwani yaapannge malhehano o mpuha ni attu o Uisraeli, yaahikhalhe uwani yo Ugibeoni vekha aya, waakhalha aya attu o Hivi. Attu o Uisraeli ahovara mateeka iwani chikina chonkhiaye cho waatakana ikhoto. 20Yaari uthanana waya Apwiiya Nlhuku anene ulhipiha mirima cha attu o ilhapo chikina chiyo, wiira yaatakane ikhoto. Aalhakenlhe wiira ahoonelhiye ikiriri nansho arimeelhihiye. Phi chiicho Apwiiya Nlhuku chalhehenre aya ashinna Musa.
21Yeyo ikatema iyo Nayoshua ahorwaa, nkayaarimeelhiha Aanaki yaakhalha umiakoni Uhebroni, Udebiri, Uanabu, ilhapo yonkhaye yo miako cho Uyuda ni Uisraeli. Nayoshua yahaarimeelhiha yayo attu ayo vamoka ni iwani chaya. 22Khaawo ntu o nikosho ni Naanaki ahalhenlhe ilhapo yo Uisraeli, yaahanlhe vakani etu iwani cho Ugaza, Gathi ni Uashdodi.
23Paahi, Nayoshua ahokusha ilhapo yonkhaye wo ulhikaana ni alhe onkhaye Apwiiya Nlhuku yeerenlhe aya ashinna Musa. Nayoshua nkayaavaha attu o Uisraeli ilhapo iyo ikhalhe yawaya, akawane wo ulhikaana ni makosho aya.
Paahi ikhoto Yamalheke, ilhapo yonkhaye yahokhalha ni mpuha, ni khawaakhanlhe ikhoto ikina tho.
Currently Selected:
Nayoshua 11: MOT
Highlight
Share
Copy
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
