Uchokholha 50
50
1Vavawo Nayusufu ahaawulhuwelha athumwanaya makukhu, nkayonlha ni waakumbatira. 2Nkaalhehera anamirete aya wiira yaahike makhura Naisraeili, athumwanaya, ahunte. Ni anamirete ayo nkayaapanga thoko chaalheheriye aya. 3Thoko chaalhemalhelhiya aya, mahuku makhumi ncheshe o mattanga ahovira. Attu o Umisri ni ayo aheesha mattanga o mariro a Nayakhobo wo mahuku makhumi saba.
4Mahuku o mariro ayo vaamanlhe aya, Nayusufu aherelhacha attu o upuwani u Nafarao wiira, “Yakhalhaka kihorumelhelhiya umihoolho winyu mwaatti, paahi kinoulhepelhani wiira kuurumeni nrwe u Nafarao mwolhumane wiira, athumwanaka yahokilhupelhiha yeeraka, 5‘athumwanaka yahokilhupelhiha yeeraka, “Mii kihaatameria vanokhwa aka. Mwakivitheke etu unihiyeni kihemme aka Ukanaani.” Paahi etu kinaalhepelha wiira akivahe nipesha kirwee kaavithe athumwanaka, kamalhihaka kinoohokolhia.’ ”
6Nafarao nkayaakhulha, “Nrweeke mwaavitheke athumwaninyu thoko chenre aya wo ulhupelhihani.”
7Paahi etu Nayusufu ahothama nkayaarwa uwaavithani athumwanaya yaattukanaka ni anamitheko a Nafarao, ashulhupalhe o upuwani u Nafarao, vamoka ni ahoolhelhi o ilhapo yonkhaye yo Umisri. 8Chiicho tho, Nayusufu ahaattukana ashilhoko aya onkhaye, achihima aya, ni ashilhoko a athumwanaya, Nayakhobo, onkhaye. Ugosheni uwo yaahalhanche achishaana aya vekha ni ipuri, ikhondoro ni ing'ope chaya. 9Tho ahaattukana attu yaawenlhe ifarasi ni mikukuta cho ifarasi. Waari mphingo mulhupalhe chinene.
10Vaaphilhe aya ipuwa yo weepettelhiya choolhia yo Uatadi, ukhopelhelhe mwolhoko wo Yorodani, wahonlhachiya chinene. Nayusufu nkayeesha mattanga o woopuwelha athumwanaya mahuku saba. 11Attu o Ukanaani, anenchi o vavawo ayo, vonne aya attu akhalhaka mattanga vapuwani vawo, yaheera, “Wo ikekhiaye alha mariro a attu o Umisri alha, molhupalhe!” Paahi nkayeehana vavawo vakittu vawo, Abel Misri, varii mpaka nna, ukhopelhelhe mwolhoko wo Yorodani ulhe.
12Achishaana ashilhopwana a Nayakhobo yahopanga thoko chaalhehenre aya athumwanaya. 13Yahaakusha mpaka Ukanaani, nkayaavitha unikhukuni Umakpelha ulhe, unosha nchuwa, iwani yo Umamre. Nikhuku vamoka ni imata iyo yaathumiye ni Aburahimu ukhuma wa Naefroni, ntu o Uhiti, wiira vakhalhe vakittu vo uvitheliya attu. 14Yamalheke waavitha athumwanaya, Nayusufu ahohokolhia vamoka ni manyonnaya ni attu onkhaye yaattukanne aya vaarwelhe aya uwaavithani athumwanaya.
Nayusufu anowaahelha nrima ashilhoko aya
15Baada yo urimelha wa athumwanaya, ashilhoko aya Nayusufu aholhumacha yeeraka, “Veekinaka Nayusufu vano anonipangelha ichimwa ni ulhivihera chittu cho uhilhoka chaapangenlhe ihu.” 16Paahi etu yahorweha nttenga wa Nayusufu, yeeraka, “Athumwaninyu vaari aya akumi yalhehenre wiira, 17‘Mwaahimerieke Nayusufu wiira, kineera, mwaalhevelheke manyonninyu chittu cho uhilhoka chonkhaye chaapannge aya upangelhani.’ Vano etu, chonte ninoulhepelhani wiira, nnilhevelhelhe chittu cho uhilhoka chonkhaye chaapannge ihu hii anamitheko a Nlhuku a athumwaninyu.” Nayusufu vaapantte aya nttenga ulha, yahonlha.
18Manyonnaya ayo yahowa, nkayaakhoromacha ni wiira, “Nnooneke hii thoko ipotta chinyu.”
19Nansho Nayusufu nkayerelhacha wiira, “Nhoove. Chani mii kihokhalha Nlhuku? 20Mwaatti mwahothanana ukipangelha chittu cho uhilhoka, nansho Nlhuku aholhakelha moombone wiira attu alhame thoko chinoona inyu lhelho va. 21Paahi nhoove ittu. Mii kinoushungani vamoka ni achishaana inyu.” Nkoolhumana rata ni waahelha nrima.
Ukhwa wa Nayusufu
22Nayusufu ahothepa ukhalha Umisri vamoka ni ashilhoko a athumwanaya onkhaye. Ukumi aya wonkhaye waari iyaakha mia ni khumi mpaka vaakhwilhe aya.
23Nayusufu ahovaheriya woona achishaana ni uchuulhu wa mwaamwanaya, Efraimu, ni tho ahoonacha achishaana a Makiri, anaaya Namanase. 24Paahi Nayusufu aherelhacha ashilhoko aya, “Mii vano mahuku aka ahophiyelha. Nansho Nlhuku wo ikekhiaye noowa ukaviherani. Noukumihani ilha ilhapo ilha ni urwehani ilhapo yaalhupenlhe awe Aburahimu, Naisaka ni Nayakhobo.” 25Yavireke vavawo, Nayusufu ahaalhupelhiha achishaana a Naisraeli, yeeraka, “Nlhuku vanohalha awe uwa uhokolhoshani vawo, mmweeke mwaakusha makhuva aka ukhuma uno.”
26Paahi Nayusufu nkayaarimelha Umisri ulhe, anari ntu o iyaakha mia ni khumi. Ni ayo manyaattu ayo yahohika nrete iruttu aya iyo wiira ihunte, nkayaathalhelha mmachiirani, Umisri ulhe.
Currently Selected:
Uchokholha 50: MOT
Highlight
Share
Copy
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
