Uttawa 11

Mariro o khumi: Wiiviya wa achishaana o nttara

1Yamalheke Apwiiya Nlhuku nkayeerelha ashinna Musa, “Ahohalha mariro nkwaha mmoka, anohalha aka waawiihera Nafarao ni attu o ilhapo yo Umisri. Yamalhaka vavawo, anouhiyani mwaattiva wiira nthame wono. Ni ayo anowa uwoomolhani nthame nhihokolhie tho. 2Mweerelheke etu Aisraeli ayo wiira, yiiweke rata, kila mmoka aya, nlhopwana wo nthiyana, alhepelheke wa amwaatamana awe, chittu chikooroshiye wo isiliva ni wo idhahabu.” 3Apwiiya Nlhuku nkayaavahera Aisraeli uttuniya umihoolho wa attu o Umisri. Uthepa yayo, ashinna Musa ahokhalha ntu o uchuwania chinene ilhapo yo Umisri yonkhaye, ni umihoolho wa anamitheko olhupalhe a Nafarao, ni wa attu onkhaye.

4Yamalheke, ashinna Musa nkayeerelha Nafarao, “Apwiiya Nlhuku aneera cho, ‘Uhiyu iriyari wo lhelho, mii kinovira variyari ilhapo yo Umisri. 5Vanohalha aka uvira vawo, kila mwaana o nttara Mmisri mu nookhwa. Toka nttara ninyu Nafarao nohalha inyu unhiyera umwene, mpaka mwaana o nttara a namitheko inyu nthiyana novara ntheko wo ushilhelhani yolhia chinyu. Ata mattara a ashinama inyu ni ayo onkhaye anookhwaacha. 6Vanowa ukhalha ikutto yulhupalhe ilhapo yonkhaye yo Umisri, ihinapacha ukhumelhelha ni mena khinowa yaakhumelhelha tho. 7Nansho munlhokoni mwa Aisraeli khaawo ata mwalhapwa nohalha ukhuwelhelha, mena ashinama aya, nchuwelhe wiira mii Apwiiya Nlhuku kinowamwalhaaniha attu o Umisri ni Aisraeli.’ ” 8Ashinna Musa nkayaamalhihera waahimeria Nafarao wo wiira, “Tho, anamitheko inyu alha onkhaye anoowa ni ukooromelha mii, yiiraka wiira kithame mwiilhaponi Umisri uno, mii vamoka ni attu onkhaye anokittwara.” Yamalheke, ashinna Musa uno anarushiye, ahothama u Nafarao uwo.

9Yamalheke, Apwiiya Nlhuku nkayeerelha ashinna Musa, “Nafarao khanowiwelhelhani, wiira cho ushangiha cho woopiha chaka chithepeke upangia mwiilhaponi Umisri.” 10Paahi ashinna Musa ni Naharuni yahopanga cho ushangiha chonkhaye chiyo umihoolho u Nafarao. Nansho Apwiiya Nlhuku ahaathepiha Nafarao itiyamaru aya iyo, nkayaakhota waahiyerera Aisraeli wiira athamache wiilhaponi waya uwo.

Currently Selected:

Uttawa 11: MOT

Highlight

Copy