Ntu o uhimiacha 7
7
Malhove o unikaviha muukumini
1Nambaya nthimicho woombone upwaha makhura o nchurukhu mwinchi. Ni mbaya nihuku no ukhwa upwaha nihuku no uyaria.
2Ihorera urwaa umattangani, upwaha urwaa usikukuuni, ukhalhawaya umalhelha wo kila ntu phi ukhwa, ni kila ntu achuwelheke mwaha uyo.
3Khalhaka nhaana ichuku, mbaya yeyo upwaha uthia ikatema yonkhaye, ni nineettuchiha chinene ikatema vanochukulha ihu. 4Nrima wa ntu o irusho unowuupuwelha attu arina mariro, nansho nrima wa ntu nkumbafu unothanana upuha. 5Ihorera wiiwa meettuchiho a ntu o irusho, upwaha wiiwelhelha ichipo cha attu akumbafu. 6Ukhalhawaya, uthia wa ntu nkumbafu unokhalha thoko nlhove no miiwa vamooroni. Ni nno phi mpwetu 7Ntu ri ni irusho amwaakhaka nkhunanawe, neepanga mwanene ukhalha nkumbafu. Ni uhongiya unookukureha irusho. 8Mbaya umalhelha ittu upwaha uchokholha waya.
Ni mbaya ntu novilhelha umpwaha ntu aneechoona.
9Uhaakuvie uthunalha, ukhalhawaya urushiya unokhalha mmamirimani mwa attu akumbafu.
10Uhiire, “Wo nlhatuni mahuku o khalhayi aari moombone upwaha vano?” Ukhalhawaya ukoha chiicho phi uhikhalhana ni irusho. 11Irusho phi ittu yomboone wa attu ari akumi; ni phi ittu yo nhakhu mwinchi thoko chittu cho uhiyeriya, 12ukhalhawaya irusho inookaviha thoko chinokaviha aya nchurukhu. Ni ureera wo ukhalhana irusho inoshunga ukumi wa ntu arinayo.
13Muupuwelheke rata ntheko awe Nlhuku, phi mpani nooria wookholha ittu ikhuruthunlhe awe Nlhuku? 14Nihuku mwapattaka nshangarareke, ni nihuku mwakufiaka muupuwelheke. Nlhuku ahowiiha mpuha vamoka ni mahuvo, wiira ntu hichuwelhe ittu inowa umihoolho.
15Attu anolhoka khanopicha ukhwa anari attu o ulhoka, kihoona chittu piilhi. Ntu anolhoka anookwa anari ntu o ulhoka, ni ntu ahinolhoka nkaalhokelha mahuku menchi awonyaka chiicho. 16Paahi nhikhalhe ntu o ikekhiaye chinene, mena nhikhalhe ntu o irusho chinene! Uhiwe mwichiive mwanene. 17Nansho tho nhikhalhe ntu o uwonya chinene mena nhikhalhe nkumbafu! Uhiwe ukhwa ahinaphiya mahuku inyu. 18Paahi nvareke onkhaye meelhi ayo. ukhalhawaya ntu anomwoova Nlhuku noolhama.
19Irusho chinompanga ntu o irusho ukhalhana machiri menchi waapwaha atawara khumi ari vawani.
20Wo ikekheene velhaponi va khaawo ntu anolhoka nopanga wo ikekhiaye mahuku onkhaye wo uhiwonya. 21Nhiiwelhelhe kila nlhove ninohimia ni ntu, nhiwe mweewa mwaruwaniyaka ni namitheko inyu. 22Inyuva mwanene nhochuwelha munrimani wiira nhaaruwanakacha attu mikwaha chinchi.
23Wo irusho chaka kahophima yonkhaye ayo, nkakeera, Kinothanana ukhalha ntu o irusho! Nansho nkakechoona wiira akirina irusho. 24Phi ntuni nooria uchuwelha ukumi phi ittuni? Uwanihu mwaha uyo uhorikarika uchuwelha. 25Paahi wo irusho nkakaathanana uchuwelha, ni uwehaweha ni waavia irusho vamoka ni maana yo chittu chiri mommo, wiira kichuwelhe uwonya phi ukumbafu, ni ukumbafu phi nahalhahalha.
26Nkakaachuwelha ittu imoka yo unanara chinene umpwaha nookhwa, phi nthiyana, arina nrima uhinolhoka thoko nriankho ama ittavi, ni miono chawe chiri thoko mittondoro. Nansho ntu nomwoova Nlhuku nonshemba nthiyaana uyo, nansho ntu nowonya noowaya wa nthiyana uyo. 27Paahi ntu nohimiacha mwaha womboone uyo nkeera wiira, chittu chilha phi choonilhe aka vaawehaweha aka vakani vakani. 28Kaholhakelha uchuwelha chittu chiyo tho ni tho, nansho akoonrie. Ni variyari ashilhopwana elufu imoka, kamwoonilhe nlhopwana mmoka, nophwanelhiya uvahiya nthimicho, nansho akamwoonilhe nthiyana ata mmoka variyari athiyana alufu imoka ayo, nophwanelhiya uvahiya nthimicho. 29Ni chilha phi chittu kiittuchihilhe aka. Nlhuku ahowuupa attu omboone chinene, nansho nkayewiihera itatako aneene.
The Bible Version in Makua @The Word for The World International and Makua Language translators. All rights reserved.