Itorati 32
32
1“Mwiiwelhelheke inyu irimu,
mwiiwelhelhe inyu ilhapo, malhove kinohimia aka.
2Meettuchiho aka anoomora vathi thoko ipulha,
malhove aka anoomora thoko ukame,
thoko mmeevelha uminyepuni,
thoko mwaapulha vachulhu mathaakhuru makithi.
3Ukhalhawaya kinootangacha nchina na Apwiiya Nlhuku,
ni waahimiachera attu uyuulhupalhe aya.”
4“Apwiiya Nlhuku phi mwalha wo ukumi,
ntheko aya uri wo uchuwania,
iphiro chaya chonkhaye phi cho ikekhiaye.
Yayo phi Nlhuku o ukhulhuvelhiya, o ikekheene,
yayo anopanga chittu cho ukhulhuvelhiya ni cho ikekhiaye.
5Nansho mwaatti khannokhulhuvelhiya,
mwaatti khanhi achishaana aya tho wo nlhatu no uwonya,
inyuva phi iyari cho uwonya ni cho hiiwa.
6Nnooria chani waalhiva chechiyo Apwiiya Nlhuku,
mwaatti attu akumbafu ni o uhikhalha ni irusho?
Chani yayo kahii athumwaninyu owuupilheni inyu mwaatti,
opanngeni ukhalha velhaponi?”
7“Muupuwelheke mahuku avinre,
muupuwelheke iyaakha chivinre cho iyari chinchi,
mwaakoheke manyanaangoro inyu, ni ayo anouchuwelhihani ittu yaakhumelhenlhe,
mwaakoheke ashulhupalhe inyu, ni ayo anouhimeriachani chittu cho khalhayi.
8Nlhuku Muulhupalhe chenre awe wo waakawelha makosho nhakhu aya,
vaakawanihilhe aya attu,
kila ilhapo ahovaha miinano chaya,
wo ulhikaana chiri aya attu o Israeli.
9Nansho ahaashungerera attu o nikosho ni Nayakobo ukhalha phi awaya,
yayo ahaathanlha ukhalha nhakhu aya.”
10“Aaphwannye uthakoni,
uthakoru waawuka iphioo yo machiri.
Aheenanelha ni waashunga,
aheenanelha thoko imboni yo niitho naya.
11Thoko nrepo vanolhitelhelha aya iphuru aya,
ni uthupathupa vachulhu makhandi aya,
ookolhaka mapupha aya wiira aavarelhelhe,
ni waakusha vachulhu yo mapupha aya,
Apwiiya Nlhuku ahaashunga attu o Israeli wiira ahiwulhuwache.
12Apwiiya Nlhuku ayo anene ahohoolhelha,
ni khaariwo nlhuku nkina nlheto aakaviha.”
13“Ahaaviriha mipata cho nchulhu cho ilhapo,
ni ayo aholhia choolhia cho mmamatani.
Nkaavaha uwama wo umwalhani,
ni makhura o mizeituni,
chaakonda vachulhu mwalha wo ulhipa.
14Ing'ope ni ipuri chaya chahokumiha mapelhe menchi,
nkaakhalha ni ikhondoro choreracha cho ukhuma Ubashani, ipuri ni ing'ope,
Ahaavaha ingaano yoombone chinene, ni idivai yo naanano nkaawuriacha.”
15“Attu o Israeli ahokhalha ni mihakhu, nansho ahokelhiya itiyamaru,
ahoneneva nkayaashichiracha,
yamalheke nkayanhiya Nlhuku oopilhe,
nkayankhotacha Moopolhi aya o machiri.
16Isinyago cho milhuku chaya chahaahelha ihache ni ichuku Apwiiya Nlhuku,
nkachaathotheria wiira athunalhe wo mitheko chaya cho urushiha.
17Nkayaalhapelha mashoka o unanara,
milhuku chahaachuwenlhe aya, mena,
milhuku cho naanano chikhumelhelhe mahuku o naanano va,
chahaathimicheriye ni manyaashulhupalhe aya, mena.
18Ahonlhiyalha Nlhuku aya, Moopolhi aya o machiri,
Mwalha wovahilheni ukumi.”
19“Apwiiya Nlhuku ahoona yoyo mwaha uyo, nkayoohiyani,
nkaakhotacha achishaana aya, ashilhopwana ni ashithiyana.
20‘Kinowaavitha ikove aka,
koone umalhelha waya unowa ukhalha chani.’
Ukhalhawaya yayo phi iyari ipotenre,
attu o uhikhulhuvelhiya wo iphiro iriyoothe.
21Ahokithotheria wiira koone ihache wo ittu ihirii nlhuku,
ahokithunalhiha wo nlhatu no isinyago chihemilhe aya.
Wiira kaathunalhihe, kinoowaaruma attu o nikosho na attu akumbafu wiira aakelhelhe.
22Urushiya waka uhoparelha thoko mooro,
unoopaha mpaka vathi unaminepa,
unorimeelhiha ilhapo ni chittu chiriwo mwommo,
unoopahacha mithithari cho miako.”
23“ ‘Kinoochariha mariro vachulhu waya
kinowaamalhihera miupa chaka.
24Anookhwa wo ithalha ni mareta,
anorimelhihiya ni mareta molhupalhe.
Kinowaaruma mashene aakhuure,
ni inwaa cho uhapalha chaalhumakache.
25Ikhoto inooweevakacha attu o mmawani,
woova unootawara mmanupani mwaya,
ashimirawo ashilhopwana ni ashimialhi anoweevakachiya
ata achishaana anaamwa ni ashulhupalhe o ipwii.
26Kahohimia wiira kinowaalhakalhiha,
ni ulhiyalhiya ahuupuwelhiye tho ni ntu riyoothe.
27Nansho akinaahiya amalhaponi aya eetitihache,
wiira ahaakottolha attu aka,
uno mii kimwanene phi alhakalhinhe!’
28“Attu o Israeli phi attu o uhikhalha ni irusho,
attu aya kharina irusho cho nhina ata vakani.
29Ahoochelha uchuwelha akottolhiye wo nlhatu waani,
khachuwenlhe ittu yaani yaakhumelhenlhe.
30Ntu mmoka onrie chani waakottolha attu elufu imoka,
ama attu eelhi onrie chani waakottolha attu elufu khumi?
Ukhalhawaya wiira Nlhuku aya haahiya,
Apwiiya Nlhuku aya ahaahiya.
31Ata amalhaponi aya ahochuwelha wiira milhuku chaya khachirina machiri,
kharina machiri thoko Nlhuku a attu o Israeli.
32Ukhalhawaya amalhaponi aya ahonta thoko attu o Usodoma ni Ugomora,
thoko mizabibu chinoyara izabibu cho uhapalha,
ikhuchhe chaya cho uwawa.
33Ari thoko idivai ikooroshiye wo isumu yo uhapalha yo inwaa.”
34“Apwiiya Nlhuku anowuupuwelha chittu chipannge aya amalhaponi aya,
nansho anoweherera ikatema yaayaka, awe aattwarusha.
35Apwiiya Nlhuku anowaahokolhoshera ni waatwarusha,
ikatema inoowa vanohalha aya uwulhuwacha,
ukhalhawaya nihuku naya no umalhelha niri vakhiviru chinene.
36Apwiiya Nlhuku anowaakiha attu aya,
ikatema vanohalha aya woona wiira machiri aya ahomalha,
ni woonelha ikiriri anamitheko aya,
vanoona aya wiira khaawo hanlhe, ttukiye ama neethi.
37Phi vavawo Apwiiya Nlhuku vanohalha aya waakoha attu aya,
‘Chiri vayi milhuku cho machiri chaakhulhuvelha inyu chilhe?
38Chaalhilhie isadaka chinyu cho upahiya vamooroni
ni idivai mwaavahilhe inyu?
Paahi chiweeke etu chuukaviheni,
nhiyeke chechiyo chuwaakihekeni vano!’ ”
39“ ‘Mii phi Nlhuku, kiri vekha aka,
mena khaawo nkina kaahikhalhe mii va.
Kinowiiva ni uwiiha ukumi, kinoorakalhiha ni ulhamiha,
ni khaawo nooria ukichiichiha ittu inopanga aka.
40Wo ikekhiaye, Mii phi Nlhuku nkumi,
Kinoothesha moono aka uchulhu ni ulhupelha
thoko chinokhalha aka mahuku o uhimalha,
41wiira kinoonona uphanga aka wo wiithia,
ni woona wiira ikekhiaye inoovarecheshiya.
Kinowaalhivereriha amalhaponi aka,
ni waatwarusha ahinokittuna alhe.
42Miupa chaka chinoowuva iphome,
uphanga aka unoweevakacha onkhaye ahinokittuna.
Akinonhalhiha ata mmoka naatakana ni mii,
ata attu arakalhihiye ni attu attukiye anoowiivakachiya.’ ”
43“Mwaatti attu o ilhapo nttapelhelheke vamoka ni attu a Apwiiya Nlhuku,
ukhalhawaya yayo anolhivereriha iphome ya anamitheko aya.
Anoolhivihera wa amalhaponi aya,
ni uhiyerera uwonya wa attu aya.”
44Yamalheke, ashinna Musa ni Nayoshua, anaaya Nanuni, ahohokolhelha malhove o nchipo nna, wiira attu o Israeli onkhaye eewacheke.
Malheheriyo o umalhihera a ashinna Musa
45Ashinna Musa vaamalhinhe aya waahimeriacha attu o Israeli alha malhove onkhaye alha, 46nkayeera wiira, “Nshungeeheke munrimani mwinyu malhove onkhaye kinouvahakani lhelho alha. Mwaalhehereke achishaana inyu wiira attwaracheke wo nrima malhove onkhaye o Malhehero alha. 47Ukhalhawaya Malhehero alha kahii malhoveru, nansho phi ukumi inyu, wo Malhehero alha nnookhalha mahuku menchi velhaponi unorwaa inyu ukhalhelha, ukhopelhelhe mwoolhoko wo Uyorodani.”
48Nenno nihuku, Apwiiya Nlhuku nkayeerelha ashinna Musa wiira, 49“Mmwelheke mwaako wo Uabarimu ulha, mwaako wo Unebo uri ilhapo yo Umoabu, unowehana ni iwani yo Uyeriko, mwooneke ilhapo yo Ukaanani kinaavaha aka attu o Israeli wiira akhalhelheke wowo. 50Yamalhaka, nnokookhwa wowo umwaakoni uwo, mwalhutaaneke ni manyaapwiiya inyu, thoko onninyu Naharuni chaakhwilhe aya umwaakoni Uhori, nkalhutaana ni manyaapwiiya aya, 51ukhalhawaya mwaatti eelhi va, mwahohiya ukhulhuvelhiya winyu umihoolho waka, ni umihoolho wa attu o Israeli vaari inyu mwalha wo Umeriba, vakhiviru ni iwani yo Ukadeshi, uthako wo Usini, nkamwoochelha ukithimicha umihoolho wa attu o Israeli. 52Nnokowoona ilhapo iri umihoolho winyu, nansho khannokelha wiilhaponi unaavaha aka attu o Israeli uwo.”
Currently Selected:
Itorati 32: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
