Itorati 20
20
Mwaha unaacha ikhoto
1“Mwarwaaka uwaatakanani ikhoto ni amalhaponi inyu, nkamwoona afarasi, mikukuta cho ifarasi, ni miphingo chulhupalhe cho anakhoto uupwahani mwaattiva, nhoove. Ukhalhawaya Apwiiya Nlhuku inyu okumihilheni Umisri, anookhalha vamoka ni inyu mwaatti. 2Nhinaaya uchokholha waatakana ikhoto, opochera ishaani eemelheke uhoolho ni weerelha manyaasikari ayo wiira, 3‘Mwaatti, attu o Israeli nkeewani! Lhelho nhaatameria uchokholha waatakana ikhoto ni amalhaponi inyu. Nhikhwe nrima, wala nhoove, ama nhoopopihiye ni amalhaponi inyu ayo, 4ukhalhawaya Apwiiya Nlhuku inyu, phi nohalha uuttukanani mwaati mwaatakane ikhoto ni amalhaponi inyu, ni waakottolhacha.’
5“Yamalhaka vavawo, manyaahoolhelhi o miphingo eerelheke attu wiira, ‘Chani haawo ntu munlhokoni mwinyu mu, thekilhe inupa nansho khanaaya ukelha? Yoyo ahokolhieke etu uwani, hiwe aakhwelha ukhotoni ni ntu nkina nkaalhipulha inupa iyo. 6Tho, chani haawo ntu riyoothe vaa, aanlhe izabibu ni uyo khanalhia milhipu? Yoyo ahokolhieke etu uwani, hiwe aakhwelha ukhotoni ni ntu nkina nkaalhipulha izabibu chiyo. 7Ama haawo nlhopwana riyoothe vaa, nvekilhe mwanthiyana ni uweherera wiira eeshiye ichitamo? Yoyo ahokolhieke etu uwani, hiwe aakhwelha ukhotoni ni nlhopwana nkina nkanthelha nthiyana nvekilhe awe uyo.’
8“Manyaahoolhelhi ayo athepeke weerelha attu wiira, ‘Chani, haawo vaa, ntu khwilhe nrima? Yoyo ahokolhieke etu uwani, hiwe aakwiiha nrima ashikhunanawe, thoko chikhwilhe awe nrima mwanene uyo.’ 9Attu o ipilhi ayo amalhihaka woolhumana attu, paahi aathanlheke ahoolhelhi o miphingo o waahoolheha attu.
10“Vanokelheha inyu iwani waatakana ikhoto, mwoolhumaneke thoko attu o vavawo ayo, yakhalhaka ari tayari uhiya ikhoto ahinaaya waatakana ni inyu mwaatti? 11Attu o yeyo iwani iyo, arumelhelhaka ni uthanana wiiwaanana, paahi attu onkhaye arii mwommo ayo, mwaavaheke ntheko wo utumikelhani. 12Nansho akhotaka uwiiwananani, nkaathanlha waatakana ikhoto, paahi mwarukurerieke ni utiyelhelha yeyo iwani aya iyo, 13ni Apwiiya Nlhuku inyu ahelhaka iwani iyo mmathathani mwinyu, ni waakottolha, mwaakhapacheke wo uphanga manyaalhopwana onkhaye ni weevakacha. 14Nansho mwaavareke mateeka manyaathiyana ni achishaana aya, mihakhu chaya, mihuwo ni chittu chonkhaye vawani vawo, mwakusheke chikhalheke chawinyu mwaashinene, mweepuhiheke, nhovahiya ni Apwiiya Nlhuku inyu. 15Phi chiichammo chinohalha inyu waapangelha attu o iwani chonkhaye chiri utayi chiyo, toka ilhapo inohalha inyu ukhalhacha mwaatti.
16“Nansho vanohalha inyu uvara iwani wowo mwiilhaponi nnohalha inyu uvahiya ni Apwiiya Nlhuku inyu, mweeveke kila ntu, nhikelhe mwaahalhiha ittu iriyoothe. 17Mwaalhalhiheke attu onkhaye: Ahiti, Aamori, Akanaani, Aperizi, Ahivi ni Ayebusi, thoko chinre aya wo ulheeherani Apwiiya Nlhuku inyu, 18wiira ahiwe owiittuchihani iphiro chaya cho uhilhoka chaapannge aya wo milhuku chaya, ni inyu mwaatti nkamwaawonya Apwiiya Nlhuku inyu.
19“Vanohalha inyu urukureria ni utiyelhelha iwani iyo wo mahuku menchi, nkamwaatakana ni ukottolha, nhiwe mwaakakha miri cho maphepu. Chani miri chihokhalha attu mpaka mmulhushache? Nhikakhache, ukhalhawaya nnowooria ulhia maphepu o chechiyo miri chiyo. 20Mwawulhusheke tu miri chikina, wiira chuukavihereni vanorukureria inyu ni utiyelhelha iwani iyo mpaka vanohalha inyu ukottolha.
Currently Selected:
Itorati 20: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
