Naamosi 7
7
Yo wooniya yo upachera phi Anashombe
1Nihuku nimoka Apwiiya Nlhuku ahokooniha chowooniya: Kahomwoona Apwiiya Nlhuku uupaka nlhoko wa anashombe, attu vamalhinhe aya uthikilha minyepu yo waalhiha ashinama a amwene. Ikatema manyashi vaathapuruwa aya tho. 2Kahoona anashombe ayo alhiaka, ni umalhiha kila nthaakhuru nikithi velhaponi. Phi venre aka; “Inyu, Athithi, Apwiiya Nlhuku kinoulhapelhani wiira unihiyerere! Ayari a Nayakhobo anolhamachani? Ukhalhawaya ari vakani chinene!”
3Paahi, Apwiiya Nlhuku ahorukunusha nrima aya, nkeera, “Khaninkhumelhelha nna!”
Yo wooniya yo nayeelhi phi: Mooro
4Apwiiya Nlhuku ahokooniha yo wooniya ikina. Kahomwoona Apwiiya Nlhuku anoohukumulha wo mooro. Ni mooro uyo wahopaha nkittu mwo wiisha mwo ibahari, ni upaha ilhapo yo wuuma. 5Phi venre aka wiira, “Inyu Thithi, Apwiiya Nlhuku, kinoulhapelhani wiira uhaatwarushe! Ayari a Nayakhobo anolhama chani? Ukhalhawaya attu ayo ari vakani chinene!”
6Paahi Apwiiya Nlhuku ahorukunusha nrima aya, nkayeera, “Khinokhumelhelha chiicho!”
Yo wooniya yo neeraru phi Itimazi
7Apwiiya Nlhuku ahokooniha yo wooniya ikina. Kahomwoona Apwiiya Nlhuku aneemenlhe vakhiviru ni ishiri ithekiye wo uphiya wo nripwe ittukelhiye itimazi avarenlhe mmoononi mwaya. 8Ni uyo ahokikoha: “Naamosi, nnoona ittu yaani?” Nkakaakhulha, “Kinoona itimazi.” Ni uyo nkayeera, “Mwooneke! Kinowaaphima attu aka o Uisraeli wo itimazi. Ukhalhawaya akinovilhelha tho uwonya waya. 9Vakittu vanolhapelha aya ayari a Naisaka, vanootanganyiya ni mapuro a attu o Uisraeli anookhalha mathalha. Kinowaakelhelha wo ikhoto attu o nihimo na amwene Nayeroboamu.”
Naamosi ni Naamazia
10Paahi, opochera ishaani Naamazia o iwaani yo Ubetheli, ahonrweehelha amwene Nayeroboamu o Uisraeli nttenga ulha, “Naamosi anoopanga miruku chinowaachani inyuva amwene o Uisraeli. Ni malhove ayo kaheena moombone ukhalhawaya attu khanowiiwelhelhani inyuva. 11Aneera wiira, ‘Nayeroboamu anowiiviya wo ikhoto ni attu o Uisraeli anoorwehiya upottani, utayi ni ilhapo aya.’”
12Yamalheke, Naamazia aheerelha Naamosi, “Inyu namilhohi hii nihowoochaana! Nthameke, nhokolhieke Uyuda, mwahimiacheke uwo unamilhohi inyu uyo, ni nnokoolhiviya wowo. 13Uhihimiache tho unamilhohi inyu uyo Vabetheli va, ukhalhawaya vaa phi vakittu vanolhapelha aya amwene, phi inupa yo umwene ulha.”
14Naamosi nkaakhulha Naamazia wiira, “Mii kahii namilhohi mena mwaana a namilhohi. Nansho mii phi nshunga o ikhondoro ni o uwehaweha miri cho mikhuyu. 15Apwiiya Nlhuku ahokikumiha unthekoni waka wo ushunga mihuwo, nkakilheehera wiira kiwe kaahimeria attu aya o Uisraeli malhove o unamilhohi alha. 16Ni inyu Naamazia, mwiiwelhelheke nlhove na Apwiiya Nlhuku: Inyuva nnokiirelha kihihimiache malhove a Nlhuku wa Aisraeli, mena kihihimiache mwaha unaacha ayari a Naisaka. 17Paahi vano, Apwiiya Nlhuku aneera wiira:
‘Ahanu inyu anoolhavalhava, ni achishaana inyu ashilhopwana ni ashithiyana anowiivakachiya ukhotoni. Ilhapo inyu inookawanihiya ni uvahiya attu akina, ni inyu mwaanene nnokookhwelha wi ilhapo inanarihiye, ni Aisraeli anorweehiya ulhetoni, utayi ni ilhapo aya.’”
The Bible Version in Makua @The Word for The World International and Makua Language translators. All rights reserved.