2Nasamweli 9
9
Nadaudi ni Namefiboshethi
1Nihuku nimoka, Nadaudi ahokoha, “Chani, Khaawo ntu riyoothe ahanlhe mwa ashilhoko a Nasauli, kimpangelhe chittu choombone wo nlhattu ni Nayonathani?”
2Vavawo ahokhalha akarumiya mmoka a ashilhoko a Nasauli nchina eehaniya Nasila. Yayo ahohimeriya wiira arwee wa Nadaudi. Vaaarwelhe aya etu, amwene Nadaudi ahokoha, “Chani, inyuva phi Nasila?”
Ni ayo nkaakhulha, “Eiyo Pwiiya, phi mii.”
3Amwene nkankoha tho, “Chani, Khaawo ntu riyoothe halhenhe mwa ashilhoko a Nasauli, wiira kimpangelhe moombone, thoko chaalhehilhe aka wa Nlhuku wiira kinoopanga chiicho?”
Nasiba nkaakhulha wiira, “Khaawo mwaamwanaya Nayonathani mmoka. Nansho o uremara mieto.”
4Amwene nkaathepa ukoha, “Ari vayi”
Nasiba ni ayo nkaakhulha, “Ari uwani u Namakiri anaaya Naamieli, o Ulodebari.” 5Paahi, amwene Nadaudi ahaaruma attu, wiira awiihiye.
6Paahi, Mefiboshethi anaaya Nayonathani, uchuulhu u Nasauli ahowiihiya wa amwene Nadaudi, nkayooroma, wo waathimicha amwene Nadaudi. Nadaudi nkayeehana, “Mefiboshethi!” Ni uyo nkaakhulha, “Phi mii vaa, karumiya inyu.”
7Nadaudi nkayaera, “Uhoove. Mii Kinoupangelhani moombone, wo nlhattu wa athumwaninyu Nayonathani. Ilhapo yonkhaye ilha yaari ya Apwiiya inyu Nasauli. Ni mahuku onkhaye, uweva unookhalha ni ulhia vamoka ni mii vameezani waka.”
8Mefiboshethi nkooroma ni wiira, “Pwiiya, mii vaa, kiri thoko mwalhapwa o ukhwa. Nlhatuni wo ukipangelha yayo?”
9Yamalheke, amwene Nadaudi aheehana Nasiba akarumiya a Nasauli, ni weerelha, “Nhakhu wonkhaye waari u Nasauli ni ashilhoko aya, kinommaha Mefiboshethi mwanchulhu aya. 10Inyuva, ni achishaana inyu, ni akarumia inyu nnookhalha o waalhimelha imata ashilhoko a Apwiiya inyu Nasauli, ni uwiiha cholhia chiyo uwannyaya. Nansho Mefiboshethi, yoyo noolhia vameezani waka.” Yeyo ikatema iyo, Nasiba aari ni achishaana ashilhopwana khumi ni nthanu, ni akarumiya makhumi meelhi. 11Yamalhekeru, Nasiba nkeerelha amwene, “Mii karumiya inyu, kinoopanga chittu chonkhaye, thoko chinolhehera inyu.”
Paahi etu, Mefiboshethi ahokhalha ni uvahiya yoolhia awe vameezani va Nadaudi, thoko mmoka a achishaana a amwene. 12Mefiboshethi ahanaa mwaana mmoka nchina nawe Namika. Attu onkhaye mwa ashilhoko a Nasiba nkaakhalha akarumiya a Mefiboshethi. 13Chiicho etu, Mefiboshethi o uremara mieto chaya chonkhaye nkaakhalha iwani yo Uyerusalemu, ni ulhia cholhia vameezani va amwene.
The Bible Version in Makua @The Word for The World International and Makua Language translators. All rights reserved.