2Nasamweli 22
22
Ichipo wo utotopelha ni Nadaudi
(Izab18)
1Apwiiya Nlhuku vooponlhe aya Nadaudi, mmiononi u Nasauli ni wa amalhaponi akina, aheepelha Apwiiya Nlhuku nna ichipo nna, eeraka, 2Nkeera wiira,
Apwiiya Nlhuku phi nkhikichero aka,
ingome aka, ni moopolhi aka.
3Nlhuku aka, mwalha aka, kinontawelhelha ukumi aka,
ni ingome aka, ni machiri ni moopolhi aka
Ingome aka, ni ntawelho naka.
mwoopolhi aka, anokinkelha ukhuma wa amalhapo aka.
4Kineehana Apwiiya Nlhuku aphwanelhiye utotopelhiya
ni mii kinowookholhiya ukhuma wa amalhaponi aka.
5Ukhalhawaya niwambwe wo nokhwa yahookirukureria,
niwambwe wo uwoopiha yahokikelhelha.
6Mikhoyi yo nihiye inokirukureria,
miriankho cho nookhwa yaari umihoolho waka.
7Muuhuvani waka, kaheenhana Apwiiya Nlhuku,
kaheenhana Nlhuku aka,
ni uyo aheewa nlhove naka munrapattani mwaya mwo ulhapelha,
Ikutto aka nkayaakelha mmaaruni mwawe vavekenlhe aka nkaviho.
8Vavawo ilhapo vaatikhinyiye aya ni utetemelha,
nsingi o wiirimu nkachaathemwathemwa
ukhalhawaya Nlhuku aari anathunanlhe.
9Mwiishi nkawaawelha ukhumaka mphulhani mwawe,
mooro nkawashikhuma mmwano wawe,
makhalha o mooro wahotutuma ukhuma uwannya aya.
10Ahoowahulha irimu, nkaakhuruwa vathi,
ni nihute wo uripa nkanaawanelha unyaani wawe.
11Ahowelha nkerubi vachulhu mapupha nkaavava,
nkanakhumelhelha nihute wo nipupha vachulhu iphioo.
12Nkeekhuneelha ipiphi mipata chonkhaye,
mahute yo uripa yo wiirimu.
13Uverunya wahomwalhia umihoolho waya,
miari yo mooro nkayaapharelha.
14Apwiiya Nlhuku aheewaniya ukhuma wiirimu,
Nlhuku Muulhupalhe nkoolhumacha wo nlhove nowoopiha.
15Nkoopa miura chaya wo nivaka, nkayaamwarushacha amalhaponi,
wo uverunya waya, ahaamwarushacha.
16Apwiiya Nlhuku ahaachachera,
wo iphumu inokhuma mphulhani wawe,
wuuthi chinene ibahari wahopatakhulhiya
nsingi ilhapo nkooniya.
17Apwiiya Nlhuku ahookholha moono awe ukhuma nchulhu aari maashi menchi nkayaakikusha,
ahokookholha ukhuma nthathakoni.
18Nkayokoopolha ukhuma waamalhaponi aka o machiri,
ahookopolha ukhuma wa attu anokivenga,
ukhalhawaya aari ni machiri o ukipwaha mii.
19Ahokikelhelha kaaria aka muhuvani,
nansho Apwiiya ahokhalha ichishuri aka.
20Ahokithamiha uthathakoni ni ahokeesha vakittu vo ulhoka,
nkayaakoopolha, ukhalhawaya ahochivelhiya ni mii.
21Apwiiya Nlhuku ahokipangelha moombone wo uhiwonya,
ahokishunga wo ukhalhawaya akirina nlhattu.
22Ukhalhawaya kihorumelhelha, malheheriyo a Apwiiya Nlhuku,
mena akinhilhe Apwiiya Nlhuku aka wo uwonya.
23Ukhalhawaya kihoovarechesha ikekhiaye aya,
ni mii akihiilhe uttwara malhehero aya.
24Ahochuwelha wiira akiwonnye umihoolho wawe,
kinowiichinanelha wiira kihikelhe mu uwonyani.
25Paahi etu phi nokishunga,
wo nlhattu wo upanga chittu cho ulhoka,
ukhalhawaya ahochuwelha wiira akirina nlhattu wo uwonya.
26Inyu Apwiiya Nlhuku, nri o ukhulhuvelhiya wa attu anoukhulhuvelhiya,
o ureera wa attu onkhaye o ureera.
27Inyuva khamwonyilhe wa attu ahinowonya ayo,
nansho inyu ashilhilhi wa attu o uwonya.
28Inyuva phi nnoopolha attu aneetimarikha,
nansho nnowaaweha attu o wiichona ayo.
29Inyu Apwiiya Nlhuku phi ikhandiri aka,
Nlhuku aka, nnokimwalhelha mwiipiphini.
30Inyu phi nnokivaha machiri o waawulhusha amalhaponi,
inyu phi nnokivaha mii machiri o uwelha nshirini.
31Nohalha upanga Nlhuku khirina idosari,
malhove aya anookhulhuvelhiya,
yayo phi ichushuru,
ya attu onkhaye anaattimakelha.
32Mpani aari thoko Nlhuku, ahikhalhe Apwiiya Nlhuku,
mpani aari mwalha o ukumi ihu nansho Nlhuku ihu.
33Nlhuku phi nttawelho naka wo wittimarika,
ni ahopanga mphironi aka ikhalhe ikumi.
34Phi nopanga mieto chaka ukhalha thoko cho naahe,
ni ukeemesha rata vachulhu miako.
35Anokinttuchiha waatakana ikhoto,
miono chaka choorie waanulha muura o ulhipa chinene o ishaba.
36Inyu Apwiiya Nlhuku nhokivaha ichishuri ni ukokhoolha,
nhokikavihera wiira kichuwaniee.
37Nhokaakiha wiira kihivariye mateeka,
wala kanhiilhe wiira kiwulhuwe.
38Kihaattwarelhelha amalhaponi aka ni waarimeelhiha,
akaahokolhelhe utulhi mpaka vaarimelhinhe aka onkhaye.
39Kahaarimeelhiha ni waawulhusha vathi,
ahoorie weemelha tho,
ahokiwulhuwelha mmietoni waka.
40Ukhalhawaya nhokivaha machiri o waatakana ikhoto,
o waakottolha amalhaponi aka.
41Mwahopanga amalhaponi aka akittawe,
Kihaalhakalhiha attu onkhaye anokivenga mii.
42Ahomwavia ntu o waakaviha, nansho khaawo o woopolha,
ahoomunlhelha Apwiiya Nlhuku, nansho khaakunlhe.
43Kahaanyikalhacha thoko ittaya wi ilhaponi,
Nkakaanyakathacha thoko ittaya mphironi.
44Nhokoopolha kihiwulhushiye ni attu o uhilhoka,
nhokooriha wiira kaataware attu o makosho makina,
attu kihaachuwenlhe aka, ahokhalha phi attu kinaatawara aka.
45Alheto ahowaacha nno atotopelhaka,
veewilhe aya nttenga aka ahokirumelhelha mii.
46Alheto ahokhwacha mirima,
ahowaacha nno atetemelhaka,
ukhuma ungomeni mwaya.
47Apwiiya Nlhuku phi nkumi!
Athimichiye ichishuri aka
Athimichiye Nlhuku aka, ni mwalha ukoopolha aka!
48Anokivaha ikuru yo waakottolha amalhaponi aka,
ni ukipanga kittaware ilhapo chaka.
49Ni ukookholha ukhuma wa amalhaponi aka,
ni ukiinanelha kihithuriye ni attu o uhilhoka.
ni ukishungerera wa attu o ushilhilhi
50Paahi wo chiicho, kinoutotopelhani mmilhokoni mwo ilhapo,
kinowiipa ni uushipani Apwiiya Nlhuku.
51Nlhuku anowaavaha amwene ikuru yo ukottolha chinene,
nowooniha uttuna wawe wa ntu nthanlhilhe aya,
Nadaudi ni achishaana aya, mahuku o uhimalha.
The Bible Version in Makua @The Word for The World International and Makua Language translators. All rights reserved.