2Ikatema 2
2
Ukooroshiya vakittu wo uthekiya Madhubahu
(1Mam5:1-18)
1Amwene Naselemani aholhakelha utheka inupa inohalha ulhapelhiya Apwiiya Nlhuku, ni wiithekelha anene ihano yo imwene. 2Ahaaphaka manyaalhopwana o machiri maelufu makhumi saba ukhalha attu o ukusha misigo, ni akina maelufu makhumi nane ukhalha attu o upwesha malhuku umiakoni, ni attu maelufu mararu ni imia sita ukhalha attu o weemelhelha mitheko chiyo.
3Yamalheke, Naselemani ahoruma nttenga wa amwene Nahiramu o Utiro, nkeerelha, “Nkipangelheke ni mii thoko chaapangenlheinyu athumwanaka, amwene Nadaudi, vaarweenlheinyu miri cho mierezi cho uthekelha ihano. 4Mwooneke, vano mii kihaatameria utheka inupa yo waalhapelhelha Apwiiya Nlhuku, Nlhuku aka. Kinoweeshera miono wo weesha vakittu vo ututumiheriya ubani wo unukhelha umihoolho waya, ni vakittu wo weeshiya mikatte chikumiheriye umihoolho waya mahuku onkhaye, ni isadaka cho upahiya vamooroni wichishu ni uchechilho, Mahuku o Wiittuwa, mahuku o woonia mweeri ni isikukuu chikina cha Apwiiya Nlhuku, thoko Nlhuku cheerenlheawe attu o Israeli apange mahuku ouhimalha. 5Inupa inothananaaka utheka mii, inokhalha yuulhupalhe chinene, ukhalhawaya Nlhuku ihu phi muulhupalhe chinene, upwaha milhuku chikina chonkhaye. 6Nansho khaawo nooria waathekelha inupa yo unlhapelha Nlhuku, yakhalhaka irimu inene kinaathosha mena irimu cho nchulhu chinene? Kimpani mii, yaahikhalhe tu kintekelhe vakittu vo ututumihera ubani umihoolho waya? 7Paahi, munrumeke ntu o uchuwelha ukoorosha chittu cho idhahabu, ifedha, ishaaba, ni iyuuma, ni uttota ikuwo cho irangi cho izambarau, irangi youhwiilha ni cho kibuluu, anochuwelha ukoorosha ni ureeriha. Yoyo anookavihana ntheko uyo ni attu akina arii vamoka nimii Uyuda ni Uyerusalemu, aathanlhakachiye ni athumwanaka Nadaudi. 8Tho, nkiwiihereke miri cho mierezi, miberoshi ni cho misandali cho ukhuma Ulebanoni, ukhalhawaya kihochuwelha wiira anamitheko inyu attu ourata chinene o uparulha imbau wowo Ulebanoni uwo. Ni anamithekoaka anookavihana ni anamithekoinyu ayo, 9wiira akipasurere imbau chinchi, wo nlhatu no nihekalu kinothananaaka utheka iyo inowunnuwa ni ushangiha chinene. 10Wo nlhatu na anamitheko inyu, yaani attu o uparulha imbau kinookumiha etu ittani maelufu meelhi o ingaano yo ushilhia, ittani maelufu meelhi o ishayiri, idivai ilita malaki macheshe, ni ilita malaki macheshe cho makhura yo izeituni.”
11Nahiramu amwene o Utiro, ahaakhulha Naselemani wo iwarakha yeeraka,
“Ukhalhawaya Apwiiya Nlhuku anowaattuna attu aya, ahouthanlhani inyuva wiira nkhalhe amwene aya. 12Atotopelhiye Apwiiya Nlhuku, Nlhuku o Israeli oopilhe irimu ni ilhapo! Ukhalhawaya haavaha amwene Nadaudi mwaana o irusho ni uchuwelhachittu, nohalha waathekelha Apwiiya Nlhuku nihekalu ni wiithekelha mwanene ihano awe. 13Paahi vano mii kinouwiiherani ntu o uchuwelha ukoorosha chittu chinene, ri ni irusho chinchi, aneehaniya Huramu abi, 14yariye ni nthiyana mmoka o munlhokoni mwa manyaathiyana o nikosho ni Nadani, ni athumwanawe ari o ukhuma Utiro. Yoyo Huramu abi uyo hochuwelha chinene utheka chittu cho idhahabu, isiliva ishaba, iyuuma, malhuku ni miri. Tho wo uttava ikuwo irangi cho zambarau, cho kibuluu ni ikuwo chotelha. Tho phi ntu nooria uhema chittu ni ulhepa milhepo cho kila nnothananainyu ummaha. Yoyo noopanga ntheko vamoka ni attu inyu, mafundi a athithi aka Nadaudi, athumwaninyu. 15Paahi vano, thithi, chechiyo chittu chihimilheinyu chiyo, yaani ingaano, ishayiri, makhura ni idivai, chonte mwaavaheke anamitheko inyu awiihe, 16ni hii ninoopasura imbau chinothananainyu ukhuma wowo Ulebanoni, yamalhaka, ninoottuka vamoka wiira chiphembe mmaashini mpaka Uyopa. Ukhuma wowo nrweeheke Uyerusalemu.”
Uchokholha utheka inupa ya Apwiiya Nlhuku
(1Mam6:1-38)
17Amwene Naselemani aholhehera wiira attu onkhaye aalhakelhiye, alheto onkhaye ari mwommo wiilhaponi Uisraeli. Wowo waalhakelhiya uwo waari thoko chaapangeaya Nadaudi, athumwanaya. Alheto aalhakelhiye ari ilaki imoka ni hamsini ni ttaru ni imia sita. 18Munlhokoni mwaya, attu maelufu sabini ahaavaha ntheko wo ukusha mituro, akina maelufu makhumi nane ari attu o upwesha malhuku umiakoni, ni attu maelufu mararu ni imia sita arii o weemelhelha attu anovara ntheko.
The Bible Version in Makua @The Word for The World International and Makua Language translators. All rights reserved.