1Nasamweli 2
2
Ulhapelha u Nahana
1Nahana nkaathepa ulhapelha eeraka:
“Kinowaattapelhelha Apwiiya Nlhuku munrimani mwaka.
Kinowaathimicha Apwiiya Nlhuku, akivanhe machiri.
Vano kinowooria waathia amalhaponi aka,
kinoteelhiya ukhalhawaya Apwiiya Nlhuku ahokikaviha waawulhusha amalhaponi aka.
2Khaawo ri ntakatifu waapwaha Apwiiya Nlhuku,
khaawo nkina riyoothe rii thoko yayo.
Khaawo noninkelha nolhikaana ni Apwiiya Nlhuku ihu.
3Nhiyeke wiishipa,
nhiyeke wuulhumacha pufia.
Ukhalhawaya Apwiiya Nlhuku phi chuwenlhe.
Yayo phi nophima mitheko chonkhaye.
4Miura cha attu o machiri chihonthakiacha.
Nansho attu oririyacha iruttu anoothepa ukhalha ni machiri.
5Attu aari ni cholhia chinchi khalhayi vawo,
vano anovahiya ntheko wiira apatte cholhia.
Nansho attu aawolhiya ithalha,
vano khanowolhiya ithalha tho.
Nthiyana o uhiyara,
vano heethaphulha ashaana saba.
Nansho nthiyana aari ni achishaana enchi,
hohiiya vano wo uhikhalha ni mwaana.
6Nansho Apwiiya Nlhuku phi neeva ni uhihimusha,
yayo phi naakurusha unaminepa ni waahihimusha tho.
7Apwiiya Nlhuku anowaapanga akina aya ukhalha amashikini,
ni akina akhalhe o nhakhu.
Akina anookurushiya ni akina anoowelhihiya.
8Anowaawusha amashikini vantukurukhuni,
anowaawusha attu o uvekelha vatuurani,
nkayaakhalhiha vamoka ni attu o ipilhi,
ni waakhalhiha mapuro o uthimichiya.
Ukhalhawaya mapoto o ilhapo phi a Apwiiya Nlhuku,
yayo phi emenshe ilhapo vamapotoni waya.
9Yayo phi noshunga ukumi wa attu o ukhulhuvelhiya,
nansho ukumi wa attu o uwonya phi nolhakalhiha aya wiipiphini.
Ukhalhawaya ntu khanopatta ikuru yo ukottolha chittu wo machiri awe mwaneneru.
10Amalhaponi a Apwiiya Nlhuku anowunthakachiya,
anowa aaturumelha thoko ithari wiirimu.
Apwiiya Nlhuku anoohukumulha ilhapo yonkhaye,
anonhelha machiri mwene aya,
anowaavaha ikuru ntu anthanlhilhe aya.”
11Paahi Naelikana ahorwaa uwani Urama, nansho mwaamwanaya mwanlhopwana Samweli uyo ahohalha avaraka ntheko wa waakavihera Apwiiya Nlhuku, aakavihaka opochera ishaani Naeli.
Achishaana ashilhopwana a Naeli
12Achishaana ashilhopwana a Naeli aari attu o uwonya chinene. Khayaarumelhelha Apwiiya Nlhuku 13ni wala ulhoha ntheko aya wo opochera ishaani thoko chaathananiya. Kila ikatema ntu vaakumiha awe isadaka awe, ahonruma karumiya a attu opochera ishaani, navanre uuma wo miino mararu. Ni inama vaavilhuwa aya, 14karumiya uyo ahotukhunyera uuma uyo nnyoopweni, ni inama iriyoothe yaakumihiye mwommo ni uuma uyo, ahaarwehelha achishaana a Naeli. Ni attu o Israeli onkhaye aarweelhe ukumihani isadaka chaya Ushilo aapangelhiye chiicho. 15Wo uthepa vavawo, ata makhura o mwannama vaari aya ahinaaya upahiya mooro, karumiya a opochera ishaani ahowa ni umwiirelha ntu aakumiha isadaka ulhe wiira, “Mwaavaheke opochera ishaani inama yo waaneelhiya, ukhalhawaya khanopochera inama inyu wo waapeiya, nansho ikithi.”
16Ni ntu uyo eeraka, “Nkilhiteke thoko keeshe mahema viikho, yamalhaka mmwieke chinothanana inyu,” karumiya uyo aakhulha, “Mena, nkivaheke naanano va. Mwaahittuneke, kinouthurulhani.”
17Ulha uwonya wa achishaana a Naeli umihoolho wa Apwiiya Nlhuku ulha wahothepa chinene. Ukhalhawaya aari apangelhaka ncheche isadaka chaakumihiya wa Apwiiya Nlhuku.
Nasamweli Ushilo
18Nansho mmirawo Samweli ahothepa upanga ntheko wo waakavihera Apwiiya Nlhuku, awaraka nkogo wo hariri. 19Kila iyaakha anumwanawe ahontottelha mwiinjiro mwankani ni unrweehelha, vaarwa aya uukumihani isadaka yo kila iyaakha vamoka ni owannyaya. 20Naeli ahaavaha ibarakha Naelikana ni ahanu aya eerelhaka, “Apwiiya Nlhuku oovaherekeni inyuva Naelikana achishaana akina wa ulha nthiyana ulha, awe aakusha nipuro no ulha mwaavahilhe inyu Apwiiya Nlhuku ulha.”
Yamalheke, nkawaahokolheiya uwani.
21Apwiiya Nlhuku nkayoonelha ikiriri Nahana nkaavahera waayara achishaana ashilhopwana araru ni ashithiyana eelhi. Mmirawo Samweli ahothepa wunnuwa ni uthepa waakavihera Apwiiya Nlhuku.
Naeli ni achishaana aya
22Yeyo ikatema iyo, Naeli aari anoolhuvanlhe chinene. Veewilhe aya chittu chonkhaye chaapanga aya achishaana aya ashilhopwana wa attu o Uisraeli, cheera aya wo waarupana manyaathiyana aavara ntheko vanlhakoni wo Nihema Nitakatifu. 23Paahi ahaakohacha, “Nlhatuni etu no upanga chiicho? Kiheewa wa attu chittu cho uhilhoka chinopangacha inyu. 24Nhipange chiicho achishaana aka, ukhalhawaya malhove aneewa aka ukhuma wa attu a Apwiiya Nlhuku, ari o uhilhoka. 25Ntu anttekelhaka nkhunanawe, nowooria ulhepelhelhiya wa Apwiiya Nlhuku wiira ahiyereriye ni Apwiiya Nlhuku ayo. Nansho ntu aawonyaka Apwiiya Nlhuku, mpani etu nohalha waalhepelha wiira ahiyereriye?” Nansho achishaana aya ayo, khayeewelhenlhe athumwanaya, ukhalhawaya Apwiiya Nlhuku ahomalha ulhakelha wiira eevakachiye.
26Mmirawo Samweli ahothepa wunnuwa nchusha, ni nkaathepa uttuniya ni Apwiiya Nlhuku, ni attu onkhaye.
Malhove o unamilhohi vachulhu inupa i Naeli
27Nihuku nimoka, ntu aarumiye ni Nlhuku ahowa u Naeli ni weerelha, “Apwiiya Nlhuku aneera wiira, ‘Chani, akeepatakunlhe mwaari wa ashilhoko a Naharuni, vaari aya Umisri, vaari aya ipotta chi Nafarao? 28Kahaathanlha apwiiya inyu munlhokoni mwa makosho a attu o Uisraeli akhalhe opochera ishaani aka, arwee vamadhubahuni waka akikavihere, akipahere ubani ni ukiwarelha ikizibau. Tho, kahaavaha athumwaninyu ni inupa aya isadaka chonkhaye chaapahiye vamooroni ni attu o Uisraeli. 29Chani, woonaka khannolhoha ishaani ni isadaka chaka, chikuminhe aka waavaha attu aka? Chani woonaka nnaalhohacha chinene achishaana inyu, upwaha chineera inyu wo ukilhoha mii, nneeneneviha mwaashineneru wo chittu chinokumihiya isadaka ni attu o Israeli?’
30“Paahi etu mii Apwiiya Nlhuku a attu o Israeli, kaholheeha wiira, inupa inyu ni inupa ya athumwaninyu phi nohalha uvara ntheko wo upochera ishaani mahuku o uhimalha. Nansho vano tho, Apwiiya Nlhuku aneera, ‘Akinottuna tho yoyo mwaha uyo!’ Attu onkhaye anokithimicha ayo, ni mii kinowaathimicha. Nansho attu onkhaye ahinokithimicha ayo, ni mii kinowaahiya wo uhaalhoha. 31Mwiiweke, ikatema inoowa vanohalha aka weeva ashimirawo onkhaye wi inupa ya athumwaninyu, mpaka vanohalha inyu uhikhalha ni ntu o wuulhuvalha mu iyari inyu. 32Ni inyu nnoowa mwoona nipampa, ni woonelha ihache ashikhunaninyu, wo nlhatu no chittu choombone chinowa chaavaha aka attu akina munlhokoni mwa attu o Israeli. Nansho munlhokoni mwinyu khunowa mwaakhalha ni ntu o wuulhuvalha. 33Yakhalhaka kinonhiya mmoka inyu munlhokoni winyu, ukhalha opochera ishaani, nowookokwaa wiira kintiyelhelhe miitho awe hoone, ni uyo nookhwa nrima ni achishaana inyu anowiivakachiya. 34Ni ittu inohalha waapatta achishaana inyu eelhi ashilhopwana ayo, Hofini ni nkhunanawe Finiyasi phi ilha; oyelhi anowa ukhwa nihuku nimoka. Yeyo phi nohalha aka uwoonihani. 35Yamalhaka, kinoomwiinulha opochera ishaani nkina o ukhulhuvelhiya nohalha upanga thoko chiri aya mmuruni ni munrimani mwaka. Kinonkomaalhihera nikosho nulhupalhe, ni uyo noovara ntheko mahuku o uhimalha umihoolho wo imwene aka. 36Ntu riyoothe nohalha wookokwaa munlhokoni mwa ashilhoko inyu, noorwaa wa yoyo opochera ishaani uyo ni unlhepelha wiira, ‘Nkeesheke wi imoka yo nipuro ninyu nimoka, wiira koorie inakhalhaka upatta ikipande yo nkatte’.”
The Bible Version in Makua @The Word for The World International and Makua Language translators. All rights reserved.