Mazimuriyaa 31
31
Metuwaa Wode Woosaa
Zammaaretuwaa Kaappoo Yes'etteedda, Daawita Mazimuriyaa
1Abeet Med'inaa Godaw, taani neekko bak'atay;
awudenne taana yeellayoppa.
Ne s'illotetsan taana ashsha.
2Ne haytsaa taakko yegga;
ellekka taana ashsha.
Neeni taani geemmiyaa zaallaanne
taana ashshiyaa mino geessuwaa taw gida.
3Ee, neeni taw zaallaanne geessuwaa;
ne suntsaa diraw, neeni taana kaaletsanne ne ogiyaa bessa.
4Neeni taw geemmiyaa sa'aa gidiyaa diraw,
unttunttu taw k'osi wotseedda p'iriyaappe taana neeni naaga.
5Abeet Med'inaa Godaw, tumuwaa S'oossaw,
Taani ta shemppuwaa ne kushiyan wotsay;#Luk'. 23:46
neeni taana woza.
6Patsenna eek'atoo goyinniyaawantta taani is's'ay;
shin taani Med'inaa Godaan ammanettay.
7Ta metuwaa neeni be'eedda dirawunne
ta tuggaa neeni ereedda diraw,
Taani aggena ne siik'uwaan nashettananne
nashshechchan nooc'u gaana.
8Neeni taana morkkiyaa kushiyan aatsaade immabaakka;
ta gedetookka la"atetsaa immaadda.
9Abeet Med'inaa Godaw,
taani metuwaan geleedda diraw, taw k'aretta.
Taani daro mishetteedda diraw, taani metuwaan,
ta ashuukka, ta shemppuukka daabureedda.
10Mishuwaa daruwaan ta de'uu c'ireedda;
ta laytsatuukka oolishin wureeddino.
Metuwaa daruwaan ta wolk'k'ay is's'ina;
ta mek'etsatuukka arggaac'eeddino.
11Ta morkkatuwaa ubbaw k'id'd'iyaa gidaaddi
taani ta shoorotoo yeellaa,
Taana eriyaawanttookka yashissiyaawaa gidaaddi.
Ogiyaan taana be'eeddawanttukka taappe bak'atiino.
12Taani hayk'k'eeddawaadan dogettaad;
me"ina oleedda otuwaa mala gidaaddi.
13Taani darotuwaa saasuketsaa sisaad;
dagamay ubbaa saani de'ee.
Unttunttu ta bolla shiik'inonne taana wod'anaw mak'ettiino.
14Shin Med'inaa Godaw, taani neenan ammanettay,
Neeni ta S'oossaa yaagay.
15Ta de'uwaa laytsay ne kushiyaanna.
Taana yederssiyaa ta morkkatuwaa kushiyaappe taana neeni ashsha.
16Ne k'oomaa bollan ne som"uwaa poo'issa;
aggena ne siik'uwaan taana ashsha.
17Abeet Med'inaa Godaw, taani neena s'eesiyaa diraw
taana yeellayoppa.
Shin iitatuu yeellatino;
unttunttu duufuwaan geliide, sirp'p'i giino.
18Otoruwaaninne kad'iyaan s'illotuwaa bolla
s'aliide haasayiyaa diraw,
Unttunttu worddotiyaa doonaa c'o"u ootsa.
19New yayyiyaawanttoo neeni minjjeeddanne
neekko bak'atiyaawanttoo asaa sintsan,
neeni ootseedda ne keekkatetsay ayaa daree!
20Neeni unttuntta ne sintsan geema sa'aan gentsaade,
asaa mak'k'uwaappe ashshaasa.
Neeni unttuntta ne dunkkaaniyaan k'osaade,
iita ins's'arssaappe ashshaasa.
21Taani morkkii dooddeedda katamaa giddon de'iyaa wode,
I taana malalissiyaa bare aggena siik'uwaa besseedda diraw,
Med'inaa Goday galatetto.
22Taani dagamaade,
«Taani ne sintsaappe kichchaad» yaagaad.
Shin taana maaddana mala, neena s'eeseedda wode,
ta waasuwaa neeni sisaadda.
23Hinttenoo, S'oossaa asatoo, Med'inaa Godaa siik'ite.
Med'inaa Goday ammanettiyaawantta naagee;
shin otoranchchatoo unttunttu gatiyaa wurssi c'iggee.
24Hinttenoo, Med'inaa Godaan hidootaa ootsiyaawanttoo,
minnitenne wozanaamite.
Currently Selected:
Mazimuriyaa 31: DFBLVL
Highlight
Copy
Compare
Share
Want to have your highlights saved across all your devices? Sign up or sign in
The word for the world Ethiopia
