Ermaasa Seelaa 3
3
Biro Hidootay De'iyaawaa Gidussaa
(3:1-66)
1S'oossaa hank'k'uwaa gatiman metuwaa be'eedda Asay taana. 2I taana laaggi kessiide, poo'uu bayinna d'umaw afeeda. 3I zaari zaariidekka gallassaa muliyaa taana shoc'anaw bare kushiyaa ta bollan dentseedda. 4I ta galbbaanne ta ashuwaa ec'iseedda; ta mek'etsaakka mentseedda. 5I taana direedda; metuwaaninne daaburan I taana dooddeedda. 6Beni ayidentto hayk'k'eedda asaadan, taana d'umaa giddon wotseedda. 7Taani kesennaadan, ta yuushshuwaa direedda; dees'o sanssalatankka taana k'achcheeda. 8Taani Aa s'eesaad; aakko waassinakka, I ta woosaa sisennan is's'eedda. 9Ta ogiyaan masetteedda shuchchaa wotsiide gorddeedda; ta ogiyaakka geellayeedda.
10I taw muggiyaa Babantsaa mala, woy k'osettiide naagiyaa gaammuwaa mala gideedda. 11I taana ta ogiyaappe kessi oliide, duuseretseedda. Yaatiide taana Asay bayinna saan yeggi basheedda.
12Bare wonddaafiyaa dafiide, taana dukkanaw maleedda. 13I bare wonddaafiyaa dafiide, ta wozanaa ayifiyaa c'addeedda. 14Taani asaa ubbaw miichchaanne gallassaa kumentsaa boriidde yes's'iyaawaa gidaaddi. 15I taana c'amuwaan kuntseedda; k'ay godare uutsaadan c'ammiyaa s'uu'aa ushshiide, taana kalisseedda.
16I ta achchaa anc'c'uwaan mentseedda; baana giddon I taana yed'd'eedda. 17Saruu taappe haakkeedda; taani injje de'uwaa dogaad. 18Hewaa diraw, taani, «Ta wolk'k'ay taappe kichcheedda; taani Med'inaa Godaan hidootaa wotseeddawe ubbaykka d'ayeedda» yaagaad. 19Ta metuwaanne taani toyilakattiyaawaa hassayina, de'uu taana c'ammeedda. 20Hewe taani ubbakka dogennabaanne ta shemppuukka kayyottiyaawaa.
21Gidooppenne, taani ha ittibaa ta wozanaan k'oppiyaa wode, taw sintsanaw hidootay de'ee. 22Hewenne, Med'inaa Godaa aggena siik'uwaappe denddeeddawaan nuuni d'ayibookko. Aa k'aretaykka mule wuri erenna; 23unttunttu wontta wontta ooratsa. Neeni loytsa ammanettiyaawaa. 24Taani taw, «Med'inaa Goday taana gakkeedda saamaa; hewaa diraw, taani aan hidootaa wotsay» yaagaad.
25Barenttu hidootaa an wotsiyaawanttoonne Aa koyiyaawanttoo Med'inaa Goday lo"o. 26Hewaa diraw, Asay Med'inaa Goday ashshiyaa ashshuwaa danddayan naagooppe lo"a. 27K'ay Asay bare yalagatetsan de'iiddi, danddayaa tamaarooppe lo"a.
28Med'inaa Goday metuwaa ahiyaa wode, I c'o"u giide, barekka utti aggo. 29I bare som"uwaa biittaa gatsiide hayzzo. Ooni erii, aw sintsanaw hidootay de'anenttonne. 30I bare shayiyaa bak'k'iyaawoo besso; bare morkketuu shek'k'iyaa shek'aakka kallo.
31Ayaw gooppe, Goday asaa med'inaw olenna; 32itti wode kayyuwaa ahooppenne, I bare aggena siik'uwaa daruwaadan k'arettee. 33Ayaw gooppe, I asaa tuggayiyaawaaninne metoyiyaawan nashettena.
34Aa asaa kaaletsiyaawanttu k'ashetteeddawantta barenttu gediyaappe garssa baggana yed'd'eeddino; 35k'ay Ubbaappe D'ok'k'iyaa S'oossaa sintsan asaw de'iyaa maataa diggiino; 36k'aykka chilootan pirddaa geellayiino. Unttunttu Goday hewaa ubbaa be'enna giide k'oppiinoyye?
37Goday azazibeenawaa azaziide, polissanaw danddayiyaawe oonee? 38Iitabaa gidina lo"obaa gidinakka, haasayiide poliyaawe Ubbaappe D'ok'k'iyaa S'oossaa gidenneeyye? 39Yaatina, nuuni asaa gidiyaawanttu nu nagaraa diraw, I nuuna muriyaa wode, ayaw zuuzummeettoo?
40Hewaa aggiide, ane nu ogiyaa paac'c'oyttenne k'oroytte; Med'inaa Godaakkokka ane simmoytte. 41Ane nu wozanaanne nu kushiyaa saluwaan de'iyaa S'oossaakko dentsiide, hawaadan yaagoytte; 42«Nuuni neena naak'k'eeddo; new makkaleeddo; neenikka nuw atto gabaakka. 43Ne hank'k'uwaan nuuna yederssaadda; k'ay neeni nuw k'arettennaan nuuna siifaadda. 44Nu woosay neekko aad'd'enaadan, ne huup'iyaa shaariyaan kammaadda. 45Asaa giddon nuuna pittonne buuraa ootsaadda. 46Nu morkketuu ubbay nu bollan haasayeeddino. 47Nuuni dagammeeddonne gitiyaan geleeddo; bayeeddonne d'ayeeddo» yaageetto.
48Ta Asay metuwaan d'ayeedda diraw, ta ayifii shaafaadan afotsaa goggee. 49Ta ayifii mule wode aggenaan afotsaa tigee. 50Med'inaa Goday saluwaappe duge s'eelliide be'ana gakkanaw hewe hanee. 51Ta kataman de'iyaa mac'c'a asatuwaa ubbaa bollan gakkeeddawaa ta ayifii be'eedda wode, ta wozanay kayyotteedda.
52C'oo taana morkkiyaawanttu taana kafuwaa shankkatiyaawaadan shankkateeddino. 53Unttunttu taana pas'a de'ishiina ollaan yeggiide, ollaa doonaa shuchchaan gorddeeddino. 54Haatsay kumiide, ta huup'iyaana goggiyaa wode, taani d'ayaad gaade k'oppaad.
55Abeet Med'inaa Godaw, taani c'iimma ollaa giddon de'aadde ne suntsaa s'eesaad. 56Ta waasuwaa sisanaadaan taani neena woossiyaa wode, neeni taw sisaadda. 57Taani neena s'eeseedda wode, taakko shiik'aade, «Yayyoppa» yaagaadda. 58Abeet Godaw, neeni ta mootuwaa mootettaade, taana wozaadda. 59Abeet Med'inaa Godaw, neeni ta tuggaa be'aadda. Hewaa diraw, ta mootuwaa neeni pirdda. 60Unttunttu haluwaa kessanaw ta bollan mak'ettiyaa mak'k'uwaa ubbaa be'aadda. 61Abeet Med'inaa Godaw, unttunttu taana shek'k'iyaa shek'aanne ta bollan mak'ettiyaa mak'k'uwaa ubbaa sisaadda. 62K'ay ta morkketuu gallassaa kumentsaa ta bollan zuuzummiyaawaanne saasukkiyaawaa sisaadda. 63Be'a, unttunttu uttiiddinne ek'k'iide, taana bori boriidde yes's'iino.
64Abeet Med'inaa Godaw, unttunttu ootseedda oosoo bessiyaa gatiyaa unttunttoo c'igga! 65Unttunttu wozanaa dammissa! Ne shek'ay unttuntta gakko! 66Abeet Med'inaa Godaw, neeni unttuntta ne hank'k'uwaan yederssa, salotuwaappe garssaana unttunttu de'iyaasaappe unttuntta d'ayissa!
Currently Selected:
Ermaasa Seelaa 3: DFBLVL
Highlight
Share
Copy
Want to have your highlights saved across all your devices? Sign up or sign in
The word for the world Ethiopia
