Isiyaasa 42

Med'inaa Godaa K'oomaa

1Taani zemppisaade oykeedda ta k'oomay, ta shemppuu aan nashetiyaawe, taani dooreeddawe hawoko. Taani ta Ayaanaa Aa bolla wotsaad; I kawutetsatoo suure pirddaa ahana.#Mat. 3:17; 17:5; Mar. 1:11; Luk'. 3:22; 9:35#Mat. 12:18-21 2I waassenna; woy bare k'aalaa d'ok'k'issenna; woy k'ay bare k'aalaa ogiyaan sissenna. 3Tinc'c'etteedda shombbok'uwaa I mentsenna; k'ay lii'akattiide ees's'iyaa muk'aaddaakka I toyissenna. I ammanettiide, suure pirddaa ahana. 4I biittaan suure pirddaa essennan de'iidde aggena; woy guyye geena. Abbaa doonaa biittatuwaan de'iyaa Asay ubbay Aa higgiyaa sisanaw naagee.

5S'oossay Med'inaa Goday, salotuwaa med'd'iide mic'c'eeddawe,#Kit. 17:24-25 sa'aanne sa'aappe kesiyaawaa ubbaa ootseeddawe, sa'aan de'iyaa asaw shemppuwaa immiyaawe, aan hametiyaa ubbaw de'uwaa immiyaawe hawaadan yaagee; 6«Taani Med'inaa Godaa; taani neena s'illotetsan s'eesaad; taani ne kushiyaa oyk'k'aade,#Isa. 49:6; Luk'. 2:32; Kit. 13:47; 26:23 neena naagana. Taani neena kawutetsatoo poo'o ootsaade, k'ay asawukka c'aak'uwaa ootsaade immana. 7Neeni k'ook'iyaa ayfiyaa dooyana mala, omoodetteeddawantta omooduwaa golliyaappe kessana mala, d'uman de'iyaawanttakka k'asho golliyaappe kessana mala, 8Taani Med'inaa Godaa; hewe ta suntsaa. Ta bonchchuwaa taani haraw immikke; ta galataakka masettiide giigeedda misiletoo immikke. 9Be'ite, kase taani odeeddawanttu ubbay poletteeddino. Ha"i k'ay taani ooratsabaa awaayay; unttunttu hananaappe kasetaade taani hinttenttoo oday» yaagee.

Galataa Yetsaa

10Med'inaa Godaw ooratsa mazimuriyaa yes's'ite;

biittaa gas'aappe doommiide, Aa galataa odite.

Abbaa bollan biyaawanttunne,

aan kumeedda ubbaykka ane waassino.

Abbaa doonaa biittatuunne unttunttun de'iyaa ubbaykka yes's'ino.

11Mela biittaynne bazzuwaan de'iyaa katamatuu,

k'ay K'eedaare Asay de'iyaa mootsatuukka,

barenttu k'aalaa d'ok'k'u ootsino.

Selaa'a giyaa kataman de'iyaawanttukka,

deriyaa huup'iyaappe barenttu ililssaa sissino.

12Unttunttu bonchchuwaa Med'inaa Godaw immino;

Aa galataakka gas'aa biittatuwaan awaayyino.

13Med'inaa Goday mino asaadan kesana;

olanchchaa asaadan, I bare hank'k'uwaa dentsana.

I waassana; bare k'aalaakka d'ok'k'u ootsiide awaayana.

I mino gidiyaawaa bare morkkatuwaa bessana.

S'oossay Bare Asaa Maaddanaw K'aalaa Geleedda

14S'oossay hawaadan yaagee;

«Adussa wodiyaappe taani saruwaan takkaad;

c'o"u gaade danddayaad.

Ha"i yeluu oykeedda mishiratiidan,

taani waassana;

tookka tookkaade shemppananne peenuk'ana.

15Taani deretuwaanne zoozetuwaa laalana;

unttunttun mokkeeddawaa ubbaa melissana.

Shaafatuwaa mela kessana;

del"etuwaakka melissana.

16«Taani k'ook'etuwaa unttunttu erenna ogiyaanna ahana;

unttunttu erenna loossuwaanakka kaaletsana.

Unttunttu sintsan de'iyaa d'umaa poo'oo laammana;

korp'p'ukorp'p'a sa'aakka salallissana.

Hewantta taani unttunttoo ootsana;

taani geedda ha yewotuwaa ootsenan aggikke.

17Shin massiide giigisseedda misiletuwaan ammanettiyaawanttu,

k'ay siilissiide giigisseedda misiletuwaa,

‹Hintte nu s'oossatuwaa› yaagiyaawanttu,

guyye simmana.

Unttunttu mule yeellatana»

yaagee.

Israa'eeliyaa Asay Tamaarennaan Is's'eedda Is'uwaa

18S'oossay hawaadan yaagee; «Hinttenoo tulletoo, sisite; hinttenoo k'ook'etoo, hintte be'ana mala s'eellite. 19Ta k'oomaappe hara k'ook'ii oonee? Taani kiittiyaa uraappe hara tullii oonee? S'oossaw dummateedda uraadan, woy Med'inaa Godaa k'oomaadan k'ook'ay oonee? 20Darobaa s'eelliita; shin akeekikkita. Hinttenttu haytsatuukka dooyaa; shin sisikkino» yaagee.

21Med'inaa Goday bare s'illotetsaa diraw, bare higgiyaa gitayanawunne bonchchanaw doseedda. 22Shin hawe Asay bonk'k'etteeddanne wotsi aketeedda. Unttunttu ubbaykka diizzan oyk'k'ettiide, k'asho golliyaan k'osetteeddino. Unttunttu bonk'k'etteeddino; shin unttuntta ashshiyaawe baawa. K'ay omoodetteeddino; shin ooninne, «Zaarite» yaagiyaawe baawa.

23Hintte giddoppe hawaa sisanawe oonee? K'ay sintsaappe yaana wodiyaabaa hayzzanawe oonee? 24Yaak'ooba omooddiyaawoo, Israa'eeliyaa bonk'k'iyaawoo aatsiide immeeddawe oonee? Aa bollan nuuni nagaraa ootseedda, Aa ogiyaan unttunttu beennan is's'eeddanne Aa higgiyawukka unttunttu azazettenan is's'eedda Med'inaa Godaa gidenneeyye? 25Hewaa diraw, I unttunttu bolla bare hank'k'uwaa suuluwaanne yashshiyaa olaa gusseedda; I unttunttu yuushshuwaan tamaa eetseedda, shin unttuntta eribeykkino; I unttunttu s'uuggeedda; shin unttunttu akeekibeyikkino.

Currently Selected:

Isiyaasa 42: DFBLVL

Highlight

Copy

Compare