Eranchchaa 3

De'uwaabaw Geetetteedda Haasayatuwaa

(3:1—11:8)

Ubbabawukka Wodii De'ee

1Ubbabaw wodii de'ee;

saluwaappe garssa baggana oosettiyaabaw ubbaw,

Aa laytsay laytsay de'ee.

2Hewaa diraw, yelettanaw wodii de'ee;

hayk'k'anawukka wodii de'ee.

Tokkanaw wodii de'ee;

tokkeeddawaa shoddanawukka wodii de'ee.

3Wod'anaw wodii de'ee;

patsanawukka wodii de'ee.

Kolanaw wodii de'ee;

k'ay kees's'anawukka wodii de'ee.

4Yeekkanaw wodii de'ee;

miic'c'anawukka wodii de'ee.

Kayyottanaw wodii de'ee;

k'ay nashettiide yes's'anawukka wodii de'ee.

5Shuchchaa laalanaw wodii de'ee;

shuchchaa shiishshanawukka wodii de'ee.

K'oomettanaw wodii de'ee;

k'ay shaakkettanawukka wodii de'ee.

6Koyiide demmanaw wodii de'ee;

bayzzanawukka wodii de'ee.

Shiishshi oyk'k'anaw wodii de'ee;

laalanawukka wodii de'ee.

7Peed'anaw wodii de'ee;

sikkanawukka wodii de'ee.

C'o"u gaanaw wodii de'ee;

k'ay haasayanawukka wodii de'ee.

8Dosanaw wodii de'ee;

is's'anawukka wodii de'ee.

Olaw wodii de'ee;

saroo wodii de'ee.

9Yaatina, oosanchchay bare daabureedda daaburaappe ayaa wod'iyaa demmeeddee? 10Taani k'ay, asaa naanatuu daaburiide ootsana mala, S'oossay immeedda gedii loytsi dees'o gidiyaawaa be'aad. 11S'oossay ubbabaa Aa wodiyaan wodiyaan loytsiide ootseedda. S'oossay asaa wozanaan med'inatetsaa ootseedda; hewaa gidooppenne, S'oossay ootseeddawaa ubbaa koyiruwaappe wurssetsay gakkanaw, Asay wurssiide eranaw danddayenna. 12Hewaa diraw, Asay bare de'eedda laytsan lo"iyaawaa ootsiyaawaappenne, nashetiyaawaappe aad'd'iyaawe ayaynne bayinnawaa taani akeekaad. 13K'ay, asaw aw Aa daaburaw waaga gidiyaawe muussaaninne ushshan barena nashechchiyaawaa; hewekka aw S'oossaappe imetteedda imotaa.

14S'oossay ootseeddawe ubbay med'inaw de'iyaawaa gidiyaawaa taani eraad; I ootseeddawaa bollan gujjanaw woy aappe haa guutsanaw danddayettenna. S'oossay hewaa ootseeddawe, Asay barew yayyiide bonchchanaassa. 15Ha"i haniidde de'iyaabay woy sintsappe hananaw de'iyaabay ubbay kase aad'd'eeda wodiyaan haneeddawaa; ayaw gooppe, S'oossay kase haneeddawe zaari zaariidekka hananaadan ootsee.

Ha Sa'aan Pirdday Geellatteedabaa

16K'ay taani, saluwaa gufantsan geeshsha pirddaa sa'aan iitatetsay, s'illotetsaa saankka nagaray de'iyaawaa be'aaddi. 17Ta wozanaan, «S'oossay s'illuwaanne iitaa laa"uwaakka pirddaw shiishshana; ayaw gooppe, S'oossay allaalle ubbawunne oosuwaa ubbaw wodiyaa keeri wotseedda» yaagaade k'oppaaddi.

18K'ay taani ta wozanaan, «Asay do'atuwaappe keekennawe unttuntta bessanaw, S'oossay unttuntta paac'c'ee» yaagaad. 19Ayaw gooppe, asaa gidina, do'atuwaa gidinakka, unttunttu kaac'ay ittuwaa; ittuu hayk'k'iyaawaadan, yenkkuukka hayk'k'ee. K'ay laa"uukka itti c'arkkuwaa shemppiino; hewaa diraw, asatuukka do'atuwaappe keekkikkino; hewekka mela. 20Unttunttu laa"uukka itti sa'aa biino; laa"uukka biittaappe med'etteedda diraw, biittaw simmiino. 21Yaatina, asaa shemppuu saluwaa pude kesiyaawaanne do'atuwaa shemppuu biittaa c'iimmaw duge wod'd'iyaawaa shaakkiide eranaw danddayiyaawe oonee? 22Hewaa diraw, Asay bare ootseedda oosuwaan nashetiyaawaappe keekiyaawe harabay aw bayinnawaa be'aad. Ayaw gooppe, aw de'iyaa lo"o kaac'ay hewaa s'alala. Asi hayk'k'i kichchooppe aappe guyyiyaan haniyaawaa bessanaw, Aa hayk'k'uwaappe guyye ahanaw danddayiyaawe oonee?

Currently Selected:

Eranchchaa 3: DFBLVL

Highlight

Copy

Compare