Roma Uram 16

Er Paulus biryi sun Roma nang asi, “Ni kwit yabwe teleb,” ebmou uram

16:1-16

1Ura, ni kwit yabwe, dib tenen ner si Febe ati uram ton ebkwinsin. A ner ara teleb wa irur cok, sun Kengkrea atei kuboka buluraming dib tenen nang asi dirnilirur. Ati, sunci erti, “Nun malner dib tenen ner,” tenen dobdobdarur ati molobmasin. 2Ati, nun malner sun dam yangaci ura, sunci erti, “Nun Du milin ner,” tenen ersi diboka dobdobdarur. Nunda nun Du Yesus dam kun nang kunub ati, nunci teleb kuboka yuk nang asi du dongona kikib. Ati, sunci nun malner asi diboka kibdobmunci, er molobmaci tok karebdarur. Nun malner ara ninyi ilinto dirniliramuryi, nibabyi dirniliranou ati, sunci erbabyi neiktoto dibnilibdarur. 3Ura, Priskila ab er akenyi Akwila ab asi niryi, “Teleb,” ebmasin. A nang bitinyi ara ni ab tonkwa wa iramaburyok, nun Du Yesus Kristus uram Teleb Uram lak etereramoubwe. 4A nang bitinyi ara, “Ninyi aryi nunsi obsitingnyi ababyi nunci nun Du Yesus uram Teleb Uram lak eterebmilibkwayeb,” tenen nisi diboka wa irmiliranirei. Ati, niryi sunti, “Ei ni nai, ni nong,” tenenun. Tonda, sun Yahudi yala kum nang kankan asi dib tenen nang nirya ababyi a nang bitinyi ati, “Ei nun nai, ei nun kwin,” tenenung. 5Tonda, sun kankan dib tenen nang ton nang ara Priskila ab er akenyi Akwila ai bulurandum asi niryi, “Teleb,” ebmasin.

Tonda, ni kwit boukwe weik kununyi si Epenetus bisi sunci uram ebmuruboka, “Teleb,” ebdeibdarur. Nunda minob ura Asia mutuk yandoka Teleb Uram eterebmoubwe ba, nun kwit Epenetus biryi deyok kouboka nun Du Yesus Kristus bisi dib tenebmou ani, Asia mutuk nang yuk nang ababyi aminda aryi dib tenebkalibmai. 6Tonda, Maria bibabyi, “Teleb,” ebdeibdarur. A ner ara busul kuboka sunti dibniliboka wa irmiliransou ani, ukuryok ababyi wa irmilisurur ati ato ebman. 7Nun kwit Andronikus ab nun malner Yunias ab asi sunci, “Teleb,” ebdarur. Ni Paulus bira Yahudi yalanyi kunun to, a nang ababyi Yahudi yala nang kururung. A nang ara deyok kouboka nun Du Yesus bisi dib tenebmarei ani, nira aminda aryi dib tenebmase. Sun nun Du Yesus uram Teleb Uram deyok kouboka eterebde bana nang ara a nang ati, “Iya teleb kun nang,” teneraming. Ninyi aryi nisi taleboka ninyi wenen ai dongobmanei ura, a nang ababyi ni ab tonkwa ninyi wenen ai buramoubwe.

8Nun kwit Ampliatus bisi, “Nun Du dam kururnyi,” tenen boukwe weik kunun cok, niryi erti, “Ni kwit, teleb,” ebman. 9Tonda, nun kwit Urbanus bibabyi, “Teleb,” ebman. Erda nun ab tonkwa wa iboka nun Du Yesus Kristus uram Teleb Uram eterenanyi kurur. Tonda, nun kwit boukwe weik kununyi si Stakhis bibabyi, “Teleb,” ebman. 10Tonda, Apeles bisi, “Teleb,” ebdarur. Anyi bira tanglona kum uca nun Du Yesus Kristus bisi milirurnyi kurur. Tonda, Aristobulus mabwe silib asi, “Teleb,” ebdarur. 11Tonda, Herodion bisi, “Teleb,” ebman. Anyi ab ni ab neik yala nang ara Yahudi yala nang kununum ati ato ebman. Tonda, Narkisus mabwe silib kankan kuboka ton nang ara nun Du Yesus dam kun nang kunung asi, “Teleb,” ebman.

12Trifena ab Trifosa ab asi, “Teleb,” ebmasin. A nerabwe ara busul kuboka nun Du Yesus wa irmilin nerabwe kururung. Tonda, nun malner boukwe weik kunun ner si Persis bisi, “Teleb,” ebmakin. A ner ara busul kuboka nun Du Yesus wa irmiliramwe ner kurur. 13Tonda, Rufus bisi niryi, “Teleb,” ebman. Nun Du biryi wibdeiboka teleb wa takubdeibmunyi biti ato ebman. Tonda, Rufus er kwin ababyi, “Teleb,” ebman. A ner ara niryi, “Ni kwin,” tenenun asi niryi, “Teleb,” ebman. 14Tonda, niryi nun kwit yabwe Asinkritus ab, Flegon ab, Hermes ab, Patrobas ab, Hermas ab, sun ab tonkwa kuramingnyi dib tenen nang yuk nang ab asi, “Teleb,” ebmasin. 15Tonda, nun kwit Filologus ab nun malner Yulia ab asi, “Teleb,” ebman. Nun kwit Nereus ab, er malner ab asi, “Teleb,” ebman. Tonda, Olimpas bibabyi, “Teleb,” ebman. Tonda, a nang ab tonkwa kuraming nang ababyi Er Imtamnyi dam kun nang kuraming ati niryi sun nirya asi, “Teleb,” ebmasin.

16Nunda dib tenen nang aryi tonkwa buluboka, “Nun kwit yabwe dib tenen nang,” tenen nun mamun irirdaramib to, sunci, “Nun kwit yabwe,” tenen sun mamun iribdandarur. Nun Du Kristus dib tenen nang ara yuk atei yuk atei nirya aryi buluramingnyi nang asi sunda Roma atei aryi kuboka dib tenen nang ati, “Teleb,” ebmasing.

Paulus biryi sun Roma nang asi sirya kobdob ebdeibmou uram

16:17-27

17Ura, ni kwit yabwe. Ton nang ara, “Sun dib tenen nang neik kanya bobingnyei,” tenen sun dib tenen nang bongminingnaming. Sunci a nang ati, “Bokminiksingnyei,” tenen diboka kisibdobdarur. Niryi uram ebdarab eboka sunsi ato ebdeibmasin. A nang ara sun nun Du Yesus biti dib tenen nang ati, “Sun dib tenena asi taklobting,” tenen ninyi bowaningminingnaming. A nang aryi etereraming uram ara tola uram kururci, sunci dobdobmandau dib en uram eterena ati bisik sengnande. Ati, sunci a nang asi kisibdobdarur. 18Sun ato kuboka tola uram eterebingiryok ninyi bongminingna nang ara nun Du Yesus Kristus wa irmilin nang diboka kum kunung. Eda, sunci sun mining kanya dam aryi anaranci malyi kun dinyi akwe kunung. A nang ara kisal dakoka ninyi kanya teleb kimdeirin uram eramingiryok, sunci eraming uram ara dib en uram kuma. Ato kuboka ninyi tangdeirin uram eboka sunci sun mangkau kanya bon nang kanya asi bowaningminingnaming. 19Ura, sunda Roma atei aryi kuboka dib tenen nang ara tanglona kum uca nun Du Yesus erdeirisin uram kunurandum. Ninyi nirya aryi sunti, “Nun Du uram kunuraming,” tenen bingsunung. Nibabyi neiktoto, “Nun Du uram kunuraming,” tenen bingsunun deyok aryi, ni kanya kilkil weik kunurur. Ato ebman cok, niryi sunsi bitardeirisin uram ton tabakoka ebdeibkwinsin. Sunci bikdob dinyi bingna nang ato kurandumci, teleb dinyi diboka kunubdarur. Tonda, sunci namin kanya boramunci, malyi kun dinyi kubmunyei. 20Ura, nun Nai Imtamnyi ninyi antanirdeirisururnyi biryi karebsici uca, sunci isa sienyi Iblis bisi minola muna kibdongobmunci, sun yan amwetam aryi yanibdaraboka kum daneibkwandum.

Nun Du Yesus biryi kisal dakoka sun ab tonkwa kuna teleb.

21Ura, ni wa irmilinururnyi Timotius biryi sunsi, “Teleb,” ebmasir. Tonda, Lukius ab, Yason ab, Sosipater bibabyi sunsi, “Teleb,” ebmasing. A nang ara ni yala Yahudi yala nang kunung. 22Tonda, nun kwit Tertius bibabyi sunda Roma nang ati, “Nun Du Kristus dam kun nang,” tenen sunsi, “Teleb,” ebmasir. Ni Paulus bira a kerek sengna deyoknyi kubman ba, nun kwit Tertius biryi ni ebdeibmasin to nirya kerek sekdeibmasir. 23Nun kwit Gayus bibabyi sunsi, “Teleb,” ebmasir. Gayus bira nisi du dongobnou ati, nira er ai kunun. Nun kwit biryi du dongorande ati, sun akatei kuboka dib tenen nang nirya yandoka er ai kuboka tonkwa buluraming.

Tonda, Erastus bira weik atei kalingna nang wa irmilinanyi biryi sunsi, “Teleb,” ebmasir. Tonda, nun kwit dib tenenanyi Kwartus bibabyi sunsi, “Teleb,” ebmasir. 24Nun Du Yesus Kristus bira kisal dakoka sun ab tonkwa kuna teleb. Amin.

25-27Ura, nunci nun Nai Imtamnyi si weik ebkwayeb. Nun Nai bira iya mikibnyi kurur ati, Erci sun dib tenena ati katabum erdeirisina ati mikib kurur. Ara, niryi eteresunun to, ara nun Du Yesus Kristus uram Teleb Uram lak eteresunun to, nun Nai biryi sunsi katabum erdeirisina ati mikib kurur. Tonda, nun Nai Imtamnyi biryi er teleb tenesurur to ukuryok lak kibdeibsou to, Er Imtamnyi biryi sunsi katabum erdeirisina ati mikib.

Nun abwe yabwe minob kuramnyi nang ara kwalina seratus baryi yubwa-yubwa kwalibde baramiryok, sunci Er Imtamnyi biryi teleb tenesurur to kum bingnamnyi. Kum bingnamnyi ani, nun Nai biryi er teleb tenesurur uram lak kibdeibsou. Ara, Er Imtamnyi Uram ebdeibmaci to lak etereramnyi nang aryi kerek sekmai uram deib aryi Erci ato eboka lak kibdeibsou. “Nira Imtamnyi iya kam kururnyi biryi sun im dangna tukwe dangna nang nirya asi ato eboka arukdeibmasin, ‘Sun nirya ara nisi dib tenebnumunci, Ni uram kunubdarur,’ ebmasin,” eboka kibdeibsou.

Nun Nai Imtamnyi bikwa iya bikdob dinyi bingdurnyi kurur. Ati, nunci nun Nai si weik ebkwayeb. Ara, nun Du Yesus Kristus biriman aryi Er si tuba-tuba weik ebkwayeb. Amin.

Currently Selected:

Roma Uram 16: MTG

Highlight

Copy