Roma Uram 1
1
Paulus biryi sun Roma nang asi, “Ni kwit yabwe, teleb,” eboka kibmou uram
1:1-7
1Teleb ni kwit yabwe, ni Paulus bira nun Du Yesus Kristus wa irmilinanyi kunun cok, sunda weik atei Roma kurandum dib tenen nang asi kerek sengna ton sekeibkwinsin. Nun Nai Imtamnyi biryi nisi naboka tikeibnou uca, niryi nun Nai biryi ebdeibnou uram eterebde banun. Ara, nun Du Yesus uram Teleb Uram ninyi lemsina uram eterebkwan ati takubdeibnou ati, niryi deyok kouboka a uram asi eterebmurubde banun. 2Nun Du uram Teleb Uram eterenun ara ukuryok uram kuma. Eda, sun minob uca Er Imtamnyi biryi kunubkwamwe uram ebdeibmaci to lak etereramnyi nang ara nun Du Yesus deyok ati minob kerek sekansei. Ara, sunci, “Ato-ato kuboka kunubkwansir,” ebdeiboka sunci Er Imtamnyi Uram minob uram umbura aryi nun Du Yesus deyok ati minob kerek sekansei. Ara, nun Nai Imtamnyi biryi a nang asi takubdeiamwe to, sunci kerek sekeiboka nunda ukuryok kubde baramib nang asi nun Du Yesus uram Teleb Uram minob lak kiansei. 3Nun Du bira Er Imtamnyi Mi kururcok, Erda ninyi kibdandoka nun abwe Daud yalanyi kurur. 4Tonda, nun Du Yesus bira Er Imtamnyi Mi Kobdob ababyi kurur ara laktoto kubmar. Ara, nun Du Yesus diboka dibmou ani, Er Imtamnyi Kanya Roh Kudus mikib biriman aryi Ersi kam bukeibmou. Kam bukeibmou biriman aryi, Er Imtamnyi Kanya Roh Kudus aryi nun Du Yesus biti, “Erda Er Imtamnyi Mi diboka kurur,” eboka lak kibmou. Nun Du Yesus Kristus nun arungdeirisurur iya weik sienyi kurur ati ato ebman. 5Er Imtamnyi biryi teleb teneranou to, nun Du Yesus biryi nisi kisal daknouci, “Deyok kouboka Teleb Uram eterebde birum,” ebdeiboka tikeibmanou. Tikeibmanou cok, Erci nisi ato eboka ebdeibmanou. “Sun im dangna tukwe dangna nang mutuk yuk-yuk yibinkirikmin cok, kanci sun Yahudi yala kum nang ara lemsina uram ati walwal nang ati ‘Nun Du Yesus bisi dib tenebmunyi uca, sunci du mouboka Er Uram kunubde bindarur,’ eboka eterebdum.” Nun Du biryi nisi tikeibnou ati ebman. Tonda, “Ninyi nirya aryi nun Du Yesus si weik erebdeibkwaming,” tenen niryi Teleb Uram eterebde banun. 6Ura, sunda Roma nang ababyi lemsina uram ati walwal kurandau asi, nun Nai Imtamnyi biryi, “Ni Mi Yesus Kristus amwetam bun nang kibdarur,” eboka sunbabyi nabmasou.
7Ura, ni Paulus biryi sunda Roma atei kurandum dib tenen nang asi kerek sekeibmasin. Ati, niryi sunti, “Nun Nai Imtamnyi biryi boukwe kurur nang,” tenen kibdobmasin. Tonda, sunda nun Nai biryi, “Ni dam kun nang kibting,” tenen nabsou nang asi, “Teleb,” ebmasin. Nun Nai Imtamnyi ab nun Du Yesus Kristus ab aryi sunsi kisal dangsina teleb. Tonda, nun Nai ab nun Du Yesus ab aryi antanibdeiboka sun kanya yuk-yuk namin kurdeirisina teleb.
Paulus biryi sun Roma nang ati, “Sun dam yanganyi uca, ebdatibyi,” ebmou uram
1:8-17
8Ura, yuma kobdob ebkun ara ato ebkun. Sunda Roma nang ara ninyi lemsina uram ati walwal kurandau ani, ukuryok ara nun Du Yesus bisi dib tenerandum. A deyok aryi, niryi nun Nai bisi, “Ei ni Nai,” enun. Sun dib tenen dinyi ara laktoto kurur ati, sun im dangna tukwe dangna kuramingnyi nang aryi sunti ato eboka lak eransing. “Sun Roma nang ara walwal kuramnyi ani, ukuryok ara sunbabyi nun Du Yesus bisi dib tenenung.” A deyok aryi, niryi nun Nai Imtamnyi bisi, “Ei ni Nai,” enun ba, nun Du Yesus Kristus biryi a uram ermiliboka nun Nai Imtamnyi urasintam bobarur. 9Ni Paulus bira sunda Roma nang asi tuba-tuba teneibde basunun. Tola kuma. Nun Nai Imtamnyi biryi niti, “Dib ebmar,” tenen bingnurur. Nira busul kuboka nun Nai takubdeibnou to diboka kununun. Ara, Er Imtamnyi Mi uram Teleb Uram lak eterebde banun cok, niryi nun Nai Imtamnyi karebnou wa asi diboka inun. 10Ati, niryi sunti tuba-tuba teneirisunun cok, nun Nai Imtamnyi bisi ato eboka molonun. “Nai, kanci teleb tenebniminyi uca, bublan kukeibniminyi ba, niryi sun Roma nang asi dirbinkwan.” Ato eboka moloranse ani, ukuryok tubto molonun.
11Ni sun ab tonkwa ebdatibyi ati ebman. Sirya ebdandoka eterebsitinyi uca, Er Imtamnyi Kanya Roh Kudus aryi sunsi muna karen dinyi ton karebtabaksute uca, sun dib tenena ara katabum ebtabaksute ati tenesunun. 12Sirya ebdatibyi ura, niryi sun dib tenena asi katabum ebtabaksitinyi ba, sunci ni dib tenena ababyi katabum ebtabaksutum. Ara, nunci, “Mikib kuboka nun Du Yesus bisi dib tenenub,” tenen nun mamun bingdanub cok, nun dib tenena katabum ebtabakdatibyi. 13Ura, ni kwit yabwe. Uki-uki ilinto aryi niryi, “Sun Roma nang dirbinkun,” tenen ukurderanse uca, bisik sengna dinyi yuk-yuk aryi nisi tuba-tuba bisik sengminingnanou ati sun diboka bikdarur. A deyok aryi, niryi, “Sun Roma nang dam bindoka Teleb Uram ati eterebtabaknyi uca, sun kankan kuboka yuk nang ilinto ababyi dib tenebkalibting,” tenen ukurderanse uca, ni sun dam kum yanmase. Niryi sun Yahudi yala kum nang bindoka Teleb Uram eterebde banun uca, du mourande ati sun bikmarum. Ura, sunbabyi Yahudi yala kum nang kurandum ati, niryi sunbabyi yandoka Teleb Uram deyok ati eterebtabakde basitinyi uca, sun kankan ababyi du moubtabakwansute ati ebman.
14Er Imtamnyi biryi nisi takubdeibnou to, niryi sun Yahudi kum yala yuk-yuk asi bindoka Teleb Uram eterebde banun. Ara, sun Yunani yala nang babyi, sun yuk yala-yuk yala nang ababyi bindoka niryi Teleb Uram eterenun. Niryi sun bikdob dinyi bingna nang bindoka sun bikdob dinyi bingna kum nang ababyi bindoka Teleb Uram eterebde banun. 15A deyok aryi, niryi sunda Roma atei nang kum diryanmase ati, “Sunbabyi dam bindoka Teleb Uram eterebtabaktinyi,” tenesunun.
16Nun Du Yesus uram Teleb Uram ati niryi ilil kum asa aryi kuboka lak eterebde banun. Nun Du uram Teleb Uram ara Er Imtamnyi biryi karebsou mikib uram kurur. A uram mikib biriman aryi sun dib tenebmangnyi nang nirya asi Er Imtamnyi biryi lemsurur. Ara, nun Nai biryi sun Yahudi yala nang asi deyok kouboka lebde baramwe ani, ukuryok tuba lebde barurci, sun Yahudi yala kum nang asi aminda bindoka sunbabyi lebde barur. 17Teleb Uram umbura aryi Er Imtamnyi biryi ato eboka lak kimsurur. “Malyi kun nang asi teleb kibdeiboka Ni mabwe nermabwe dobdobkwan. Sirya dobdobnyi uca, Ni urasintam aryi teleb dinyi kunubkwaming.” Er Imtamnyi biryi nunda malyi kun nang asi dorosurur ara dib tenena deici akwe dorosurur. Tonda, Er Imtamnyi biryi nunda malyi kun nang asi dorosurur uca, nunci tabakoka dib tenenub. A dinyi ati Er Imtamnyi Uram minob uram umbura aryi ato erur.
“Er Imtamnyi biryi dobdobmaci nang ara dib tenena biriman aryi kam kun dinyi dobdobkwaming,” ebmou. (Habakuk 2:4)
Er Imtamnyi biryi, “Sun malyi dinyi kunurmurun nang asi diba ati wenebkwan,” eboka lak kimsurur uram
1:18-32
18Ba, Er Imtamnyi bira iya teleb kururnyi biryi malyi dinyi nirya ati, “Ni li,” tenen kurur ati, Erci, “Diboka wenebkwan,” ena uram ababyi imtam aryi kuboka lak kimsurur. Ara, ninyi aryi Er Imtamnyi biti, “Nun li,” tenena uca malyi dinyi akwe kunuramingnyi asi Er Imtamnyi biryi diba ati wenebkwande. Tonda, sun yuk nang asi malyi kimdeiriramingnyi nang asi nun Nai biryi wenebkwande. A nang ara Er Imtamnyi dib en uram asi bingnamingiryok, sunci, “Malyi dinyi akwe kunubtibyi,” teneraming uca, “Dib en uram kekena nun li,” tenen malyi dinyi kuraming. 19Er Imtamnyi biryi Erdamnyi ninyi nirya asi lak kimdaramwe uca, sun, “Er Imtamnyi biti nun walwal,” en nang ababyi Er Imtamnyi biti walwal diboka kum kuraming. Eda, sunci, “Dib en uram kekena nun li,” tenen malyi dinyi akwe kuraming. 20Ara, nun Nai Imtamnyi biryi im ton tukwe ton nirya kiknibmou ura, Erci ninyi nirya asi Erdamnyi lak kimdansou ani, ukuryok ababyi tuba lak kimdasurur. Ara, “Er Imtamnyi bira Iya Erebdobnyi kurur,” tenen ninyi nirya bingnung. Tonda, “Yuma kobdob talak aryi kuboka Er Imtamnyi bira iya mikibnyi kuramwe ani, ukuryok ababyi iya mikibnyi kurur,” tenen ninyi nirya bingnung. Nunda tukwetam nang aryi Er Imtamnyi bisi asing eibmanto kum kunub bok, Er Imtamnyi biryi nun nirya asi Erdamnyi lak kimdasurur. Ati, nunci im dangna tukwe dangna dinyi kurande asing eirinub dinyi asi asing eirinub cok, nunci, “Nun Nai Imtamnyi biryi a dinyi nirya kiknibmou,” tenen bingnub. Ati, Er Imtamnyi biryi Erdamnyi lak kimdarur ati, ninyi tentok ababyi, “Er Imtamnyi biti walwal kunun ati, Erci nisi wenebnicei,” tenen kum ebmote.
21A malyi kun nang ara Er Imtamnyi biti walwal kum kuramiryok, sunci, “Nun molonubnyi,” tenen Er Imtamnyi si weik ena kum kunung. Tonda, sunci, “Nun Nai biryi kisal dakmasir,” tenen Er Imtamnyi bisi, “Ei nun Nai,” kum enung. Eda, sun kanya ara kunuk dakmou uca, sunci bikdob dinyi tenena kum uca, talyi dinyi akwe teneboka malyi dinyi akwe kunubde baraming. 22A nang ara sun damnyi ati, “Nunda bikdob dinyi bingna nang kunub,” erdaraming cok, lub nang kanya akwe bonung. 23A nang ara Er Imtamnyi biti, “Er Iya Erebdobnyi,” tenen kum molonung. Eda, sunci Er Iya Erebdobnyi bisi unubdeiboka talyi dinyi akwe kikniboka molonung. Ara, co keil doboka sunci, “Nun molon dinyi kiknibkwayeb,” tenen tukwetam nang minola dibmanto kun nang ara ato dinyi kikliboka kikniraming. Tonda, maka ato dinyi kikniraming. Bisam kwatima ato dinyi kikniraming. Kikniramingiryok, sunci a kiknibmai dinyi yuk-yuk asi naboka, “Nai du o, nong o,” eboka molonung.
24Kwemdeina dinyi akwe molonung deyok aryi, Er Imtamnyi biryi, “Niryi a nang asi deiblobkwan uca, sunci sun kanya aryi kuboka malyi kun dinyi akwe ur kunubting,” tenen wenebmou. Ato tenen wenebmou uca, a nang ara kwemdeina dinyi molormururamingiryok, sunci, “Sal ner talyi yobtibyi,” tenen, “Yuk alyi tenen dinyi kunubtibyi,” tenen talyi yordana akwe kuraming. 25Ati, sunci Er Imtamnyi biryi dib en uram asi bai donokoka tola en dinyi akwe talebdoboka kwemdeina moloraming. Moloramingiryok, im dangna tukwe dangna Kikniamunyi bisi tuba kum molonung. Eda, sunci keil co doboka Er Imtamnyi biryi kikniamwe dinyi asi kikliboka kiknibmai ati, “Nai du o, nong o,” eboka molonung. Nun Nai Imtamnyi bira tanglona kum uca Er si iya weik ebkwanubnyi kurur ati ebman. Amin.
26Dib en uram asi bai donokmai deyok aryi, Er Imtamnyi biryi, “Niryi sunsi deiblobkwan uca, sunci sun kanya aryi kuboka malyi kun dinyi akwe kunubkwanung,” eboka wenebmou. Wenebmou uca, sun nerabwe ara sal aryi kum yoraming. Eda, nerabwe ara sun mamun tablangdaraming. 27Tonda, sun sal nang ara sun ner asi tuba kum yoraming. Eda, sal ara den atan weik kuboka sun mamun yordaraming. Ato kuboka alyi weik tenen dinyi kunuraming uca, sunci sun damnyi lemdana kum uca malyi kun dinyi tabakoka kunurmururaming. Ati, Er Imtamnyi biryi a nang asi wenebde barur uca, Erci sunsi, “Sun malyi kun dinyi taklobdarur,” tuba kum erur. Tuba kum erur ati, Er Imtamnyi biryi a nang asi dokdonokdiryi, kum lebkwande.
28Ura, a kwemdeina molon nang ara Er Imtamnyi dib en uram asi bingnamiryok, sunci a uram ati, “Talyi uram aca,” tenen kum kunuramnyi. Ato tenen kuramnyi deyok aryi, Er Imtamnyi biryi yu kanya boramuryi, sunsi taklobmou. Ati, Erci, “Sun kanya dam kuboka malyi kun dinyi akwe ur kunubkwanung,” eboka sunsi taklobmou. Uca, sunci alyi tenen dinyi ab ukubman kum dinyi ab akwe kununung. 29A nang ara langdeiboka malyi kun dinyi yuk-yuk akwe kunuraming. Tonda, sunci teneiboka yuk nang asi malyi dinyi akwe kununung. Tonda, “Bona bon dinyi ilinto dobdobtibyi,” tenen ingkiringnung. Tonda, “Iya malyi kun dinyi akwe kunubkwayeb,” tenenung. A nang ara yu kanya boboka yuk nang dinyi ati, “Dobdobtibyi,” tenenung. Tonda, “Ninyi obtibyi,” tenenung. Tonda, “Yuk nang uram kekena ati nun li,” tenenung. Tonda, tola uram akwe enung. Yuk nang ati, “Malyi kibdeibtibyi se,” tenenung. A nang ara murmur eboka yuk nang asi talakdonung. 30A nang ara yuk nang ati, “Malyi nang,” enung. Tonda, sunci Er Imtamnyi biti, “Nun li,” tenenung. Tonda, sunci talyi ati sun damnyi asi, “Nunda sien nang aca,” erdanung. A nang ara sun damnyi erebdeibdandoka yuk nang asi ina ngilingnaming. Tonda, sunci, “Ato-ato kuboka malyi dinyi kunubtabakwayeb,” tenena akwe kunung. A nang ara sun nai sun kwin uram diboka kum kekenung. 31A nang ara bikdob dinyi tenen kanya kum bonung. Sunci yuk nang asi, “Ato-ato kubkwan,” ebdeibtingnyi uca, sunci ebloboka diboka kum kununung. Tonda, yuk nang asi boukwe kum kunung. Tonda, bico tenena kum uca, yuk nang asi malyi kimnaming. 32A nang ara Er Imtamnyi biryi, “Wenebkwan,” en uram kikib asi bingnung cok, sunci Er Imtamnyi Uram kum kununung. Ara, Er Imtamnyi biryi, “Sun ato kuboka malyi kun nang asi weneboka obkwanun,” en uram bingnung cok, sunci sun malyi kun dinyi tanglona kum kunung. Eda, sunci iya malyi kun nang kuraming ati, sun malyi kun nang yuk nang aryi malyi kunuramingyi to kisal dangnung.
Currently Selected:
Roma Uram 1: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
