Kuusan Fasavatan 15

A Lagafan Fataxapiak I Taa Savat

1Lana xunavata si, ne kaalum e saxa fakalimaanan lava a savat e ne ipul. A angelo pisiguak, ri lisan a mu lagafan pisiguak aava ri fataxapiak. A mu lagafan aanabe' ri fataxapiak senaso la yaan ri fataxapin a faisok siri a maraleian sina Piran i taa taxapus. 2E ne xalum a mo malaan sena laman taasaxa, a vesanan pana ʻgalaasʼ xuvul pana fata. E nari aava ri fo fa'onam a vupung patak e a maaradaang ina e xuluna xakatan ina isina, ri taxa tigina la xasing ina laman ʻgalaasʼ aanabe'. E ri taxa tao a mo ri xalie pana ʻhaapʼ aava Piran fo tavai nari pana. 3E ri yangan a yanganan si Moses aava sisiak sina Piran e a yanganan sina Natuna Sipsip. A malaan:

“Nano, no Piran pana Maana Gutan Xapiak.

A Faisok siim a molava e roxo xasingit.

Nano, no Piran ina paamuian a maana rabuna xapiak.

A mu vilaana siim ri xaradak e ri tuuna paaliu.

4Memai, a maana rabuna xapiak ri taa matautan nano

e maana rabuna xapiak ri taa kuus fati a isaam.

Senaso nano sang mon, no Piran Taap.

E maana mu rabuna xapiak,

ri taa tamana savat xe siim e ri taa tamana nangus nano.

Senaso maana vilaana xaradak siim fo savat la matavas.”

5Lamina maana mo aanabe', ne kaalum xe laa'ui lana xunavata e pave a Tang Lifu Lotu, pana Nobina Taap Xasingit aava nobina ina Mo Tawaane Taap, a talakas paaliu. 6E ti lana lifu lotu moxo, nari mu angelo pisiguak ri savat pana maana lagafan pisiguak siri. A mu angelo aave ri toxan a marapi aava vesanan pana ʻlinenʼ e a marapi siri taxa lang e ri piau ta vusiit paaliu. E vaxa ri pis a famareri pana yowang ʻgolʼ. 7E saxa ina mo to talafaat a tavai nari mu angelo saxa saxa pana ʻdis golʼ pisiguak aava bas pana maraleian sina Piran; a Piran aava to vulai, vulai. 8E a miridingan sina Piran e a gutan sina a fabas a Tang Lifu Lotu aapave pana bun e piau ta mo a fexaxaas sena laak lana fefexaxaas sena maana lagafan sina mu angelo pisiguak ri taa taxapus.

Currently Selected:

Kuusan Fasavatan 15: TFSP

Highlight

Copy

Compare