Palonga 6

Kire Lio Hilisie E Hiu Mwane Huni Peꞌi I Laona Soihaadaꞌinge

1Aana maholona soihaadaꞌinge ko peine lau-leu oto mola, oto kira hiiwalaimoli nge kire ko ere-ere mola aana erenga ni Krik, kire ko aehota upwesie mo iini nge kire sai ere aana tohungana erenga mo Jiu. #6:1 Mo iini nge kire hute i Israel kire sai ere aana erenga ni Hibru, nge tohungana erenga mo Jiu oto ngeena. Na aena urine hungelada kire lio toli mola aana mo Jiu nge kire hute aana mo henue hai aaopaꞌi. Oto kire ko teꞌuri, “Suli dinge maholo omu ko haꞌa-adoa kira maitale aana mo niinge kolu meni niiꞌi, omu kaꞌa tohungei peꞌi-peꞌi diana aana ike mo nao iꞌemeelu mala mo iini iꞌomu.”

2Oto aawalai hurulaꞌaa mwana rue kire lokoa ahutana mwala aana soihaadaꞌinge, kire ko si teꞌuri hunire, “E kaꞌa diana ike hunie melu ke toliꞌaasie houleꞌinilana walana God na melu ke lio mola i sulie toꞌoha na ngaulaa. 3Oto mo mwane, kei lae oto i diana liutaa hunie omu ke lio hilisie nga hiu mwane aamiu nge omu saie uri kire saenanau liutaa na kire honu aana Liꞌoa Maaꞌi hunie melu ke niie mei esunge ngeena hunire. 4Taꞌe iꞌemeelu, melu kei iiꞌo mola peꞌie aarengaꞌinge na peꞌi houleꞌinilana walana God.”

5Oto ahutana mwala kire rongoa mei wala ngeena kire ko si ilenimwaꞌe haahie. Oto kire si lio hilisie a Stivin, na a Pilip, na a Prokoras, na a Nikeno, na a Timon, na a Pamenas, na a Nikolas.#6:5 Mo satai ola ngeena, mo satai ola ni Krik haliꞌite, na e haataꞌinie uri soihaadaꞌinge e mwaꞌe-mwaꞌe toꞌohuu huni haꞌa-oodohie mei haꞌa-erenga ngeena. Hiiwalaimolinge a Stivin ngeena e tohungei susu, na e honu aana Liꞌoa Maaꞌi. Na a Nikolas ngeena e hute aana mo Aapoloa Aaopa aana huilume i Antiok, taꞌe e talamaꞌinie tolahana mo Jiu na e neꞌie oto ngaeta iini aada. 6Oto kire haꞌa-uuresie e hiu mwane ngeena i naꞌona mo hurulaꞌaa, na kire si hele i pweude peꞌi aarengaꞌinge haahire.

7Oto walana God mone ko lae ahusie oto mo henue hunge, na mo pwaarongoisuli i Jerusalem kire ko hunge loꞌu liutaa, na hungelana mo pris ko lulu i sulie oto a Jisas noꞌone.

Mo Naꞌohai Mwane Ni Jiu Kire Tapolie A Stivin

8A God mone ko haꞌadianaꞌaa a Stivin na ko nii-niie nanamanga hunie, oto ko esuie mo huꞌi-huꞌite na mo ola ni pangataꞌinge i matolana mwala. 9Taꞌe ngaeta mo mwane ni Jiu kire ko leledie mola a Stivin. Mo mwane ngeena kire uure mwaanie mo huilume haꞌatau i Saerin na i Aleksandria na e ro poꞌo ni henue i Silisia na i Esia. Na kire mani sai loko aana nume ni palo-palo mo Jiu nge kire haaraꞌinie aana Nume Ni Palo-palo Mwala Kire Iiꞌo Luhetaꞌi Loꞌu. Oto mo mwane ngeena kire ko aehota haꞌa-ere oto peꞌie a Stivin, 10taꞌe Liꞌoa Maaꞌi ko peꞌie a Stivin hunie erenga ingeie ke aꞌailaꞌa liutaa aana mo mwane ngeena.

11Oto lae-lae kire si lai waaie ngaeta mo mwane hunie kire ke eerotaꞌinie a Stivin uuri, “Melu rongoa a mwane ie e ere mwakataꞌinie a Mosis na a God.” 12Oto aana kire ko ere urine, kire ko da ahutana mwala, na mo rato ni mwane aana mo Jiu, na mo haꞌa-uusuli aana mo Haꞌatolanga a Mosis, kire ko meni tohungei saewasulie a Stivin. Oto kire tapolie na kire ookea wau oto i naꞌona pulitaa ni lei-lei. 13Oto mo mwane ngeena kire uure i lengi huni eero, na kire ko teꞌuri, “A mwane ngeena, ko ere-ere aaelasie Nume Maaꞌi Peine ikolu na ko ere-ere aaelasie mo Haꞌatolanga a Mosis oto tarau. 14Na melu rongoa e unue uri a Jisas, mei ola ni Nasaret ngeena, kei ohoie Nume Maaꞌi Peine ikolu, na kei oolisie mo tolahai ola nge a Mosis e niiꞌi mei hunikie.” 15Oto aana maholona ahutana mwala nge kire loko ngeena, kire ko si lio hahuroto oto aana a Stivin aana kire ko si leesie maana e lio oto mala ensel.

Currently Selected:

Palonga 6: apbNT

Highlight

Copy