Palonga 18

A Pol E Lae i Haꞌa-uusulie Mo Korinit

1Oto purihaꞌana a Pol e uure mwaanie i Atens, e si lae loꞌu hunie huilume i Korinit. 2Na aana huilume ngeena ko oodoie mwane satana a Akuila mwane ni Jiu nge e hute aana poꞌo ni henue i Pontas. A Akuila na huꞌe ingeie a Prisila kirerue oꞌoꞌo wau i naꞌo aana poꞌo ni henue i Itali, taꞌe kirerue si lae mwaanie maholo inemauri peine ni Rom a Klodias e oohea ahutana mo Jiu mwaanie huilume i Rom, nge e neꞌi naꞌohai huilume aana poꞌo ni henue i Itali. Oto a Akuila na Prisila ko si lae mai iiꞌo i Korinit maholo a Pol e oodoirerue. 3Oto a Pol ko iiꞌo oto peꞌirerue, na ko euꞌesu oto peꞌirerue aena aana kiraelu ko meni esu mola aana asuilana mo nume susulu. 4Na suli Dinge Maaꞌi Mo Jiu, a Pol ko lae i nume ni palo-palo mo Jiu huni ere-ere nana mo Jiu na mo Aapoloa Aaopa hunie kire ke hiiwalaimoli aana walu ola nge ko unuꞌi.

5Oto maholo a Saelas na a Timoti kirerue hule mai saana a Pol aana kirerue uure i Masedonia, a Pol ko si aehota tarohaꞌinie Tataroha Diana mola i suli dinge. Na ko tarohaꞌinie hunie mo Jiu uri a Jisas oto a Kraes, a Haꞌa-uuri nge a God e haiholotaꞌinie kei lae mai. 6Taꞌe maholo mwala ni Jiu kire ko leledie na kire ko ere aaelasie, a Pol e si tataaꞌinie mola mo wasa-wasa aana toꞌoni ingeie mala nga tolimaa uri tolahada e tohungei aaela liutaa. Oto ko haꞌapasulire ko teꞌuri, “Mala uri a God ko haꞌaloiꞌomu, na roroꞌanga iꞌomu oto maraamiu eena. Nga roroꞌanga ineu haꞌike aana leune. Uure siꞌiri pwau weu ne kei lai tarohaꞌinie Tataroha Diana oto hunie mo Aapoloa Aaopa.”

7Oto a Pol e iisitaa mwaanie nume ni palo-palo mo Jiu ngeena, na ko lae oto wau i nume a Titias Jastas ngaeta mwane aana mo Aapoloa Aaopa nge ko palo-paloa God. Na nume ingeie e iiꞌo mola karaꞌinie nume ni palo-palo ngeena. 8Ahutana asunge ingeie peꞌie mo Jiu e kaꞌa waetaꞌi ike, aana naꞌohai mwane haahie nume ni palo-palo ngeena satana a Krispas na uluhe ni iinoni ingeie kire ko meni hiiwalaimoli oto aana a Aalaha. Na mo iini hunge loꞌu i Korinit kire ko loto maaꞌi oto, aana kire rongoa Tataroha Diana, na kire hiiwalaimoli oto aana.

9Oto aana ngaeta hai rodo a Aalaha ko ere hunie a Pol aani maꞌahu-polenga ko teꞌuri, “O ke suꞌuri meꞌu, na o ke suꞌuri rohu, taꞌe o ke unu-unu tahangaꞌinieu tarau 10sulie ineu taane peꞌiꞌo. Nga iini aana mwala aana huilume ngeena e saꞌa waeliꞌo ike sulie mwala ineu kire hunge i leune.” 11Oto a Pol e iiꞌo loꞌu i Korinit hunie halisi peꞌie e oono waro-waro huni haꞌa-uusulie mwala aana walana God.

12Oto aana maholo nge a Galio e aalaha haahie poꞌo ni henue i Akaea, mo rato ni Jiu kire ruru, kire si tapolie a Pol na kire toolea i saana a Galio hunie ke leie. 13Na kire ko teꞌuri, “A mwane ie ko tohungei sare huꞌisie haꞌatolanga aana ko da uri mwala ke palo-paloa God mola mwaanie tolahai haꞌatolanga iꞌemeelu mo Jiu.” #18:13 Mo Rom kaꞌa toliꞌaasie ahutana mo palonga hai aaopaꞌi i laona aalahanga ikire, taꞌe kire maaie ngaeta mo iini mola, mala palonga mo Krik, na palonga mo Jiu. Aana maholo ienini kire kaꞌa lio saie ue uri hiiwalaimolinge aana Jisas e aaopa mwaanie palonga mo Jiu, taꞌe lae-lae kire lio saie uri e aaopa, nge kire si uure honosie.

14Taꞌe maholo a Pol ko sare aalamire, oto a Galio ko holaꞌi teꞌuri oto hunire mo Jiu, “Mala uri omu ke da wala i sulie nga mei ola aaela wa nga mei takalonga a mwane ie ke asuie, haꞌalaa nou sai rongo taane huniꞌomu mo Jiu. 15Taꞌe i sulie omu ko ere haitelili mola i sulie mo wala na mo satai ola na mo ola mola i sulie mo haꞌatolanga iꞌomu maraamiu, oto e diana mola uri hunie iꞌomu maraamiu omu ke haꞌa-oodohie leune. Ineu, nou kaꞌa sare haꞌa-oodohie ike mo ola urine huniꞌomu.” 16Oto e si oohera i sinaha mwaanie nume ni lei-lei. 17Na kire mani tapolie mola a Sostinis, poro paine haahie nume ni palo-palo mo Jiu, na kire ko repu aaelasie oto i maana nume ni lei-lei. Taꞌe a Galio e kaꞌa aapwasu ike aana leune.

A Pol E Ooli Loꞌu Hunie Huilume I Antiok Aana Poꞌo Ni Henue I Siria

18Oto a Pol e iiꞌo tewa oto loꞌu peꞌie mo mwaasine i lalo aana Kraes i Korinit. Lae-lae e si loꞌongaꞌi huni lae loꞌu hunie poꞌo ni henue i Siria. A Prisila na Akuila kirerue hakusie aana laenga ngeena, na maholo kire hule i Senggria, a Pol e si pala oꞌoruꞌe aana iihune pwaune aena aana mo dinge aana haiholotaꞌinge maaꞌi ingeie kire si mango. Oto kire taꞌe aana haka, 19kire ko lae holosie aasi oto hunie huilume paine i Epesas. Kire lai hule wau i Epesas nge a Pol e si lae mwaanie a Prisila na Akuila, na ko lae maraana oto i laona nume ni palo-palo mo Jiu ni ere-ere peꞌire. 20Oto kire ko eitanaie hunie ke kele iiꞌo tewa loꞌu peꞌire, taꞌe e sereꞌi. 21Maholo ko deu aakau oto huni lae mwaanire, oto ko teꞌuri, “Mala uri a God e saetoꞌo aana ne ke ooli loꞌu mei, nge omu ke leesieu loꞌu i leu.” Oto e si lai taꞌe aana haka, no ko lae oto mwaanie i Epesas.

22Maholo kire hule aana huilume i Sisaria, a Pol e lae taꞌau i Jerusalem nge ko si ere-ere peꞌie mwala aana soihaadaꞌinge taꞌau i leune. Oto purihaꞌana nge e si lae hao loꞌu hunie i Antiok. 23E haro iiꞌo tewa i Antiok nge e si lae loꞌu mwaanie i leune, na ko lai liuhie oto mo henue i laona e ro poꞌo ni henue i Kalesia na i Frijia ni ere haꞌasusue saeda, hunie hiiwalaimolinge ikire aana Jisas ke aꞌailaꞌa loꞌu.

A Apolos E Tarohaꞌinie Jisas

24Aana maholona noꞌone ngaeta mwane ni Jiu nge e hute aana huilume i Aleksandria ko lae mai hunie i Epesas, na satana a Apolos. E tohungei saenanau aana ere-luhesilana mo neꞌisaenga na e tohungei saenanau noꞌone aana mo Uusu-uusu Maaꞌi. 25Kire haꞌa-uusulie aana hiiwalaimolinge aana a Aalaha na e tohungei mwaꞌe-mwaꞌe ni tarohaꞌinie Tataroha Diana na mo haꞌa-uusulinge i sulie a Jisas. Nga taa ko haꞌa-uusulie mwala aani i sulie a Jisas e tohungei oodo, maꞌalana e saie mola laladonga i sulie loto-maaꞌinge a Jon Loto Maaꞌi. 26A Apolos e lae wau i laona nume ni palo-palo mo Jiu ko tohungei ere hiitoꞌo hunire. Oto maholo a Prisila na Akuila kire rongoa ere-erenga ingeie, kire si toolea wau i nume ikirerue ni haꞌa-uusulie loꞌu aana tolahana God.

27Oto purihaꞌana, maholo a Apolos ko sare lae loꞌu holosie aasi hunie poꞌo ni henue i Akaea, mo mwaasine i lalo aana Kraes i Epesas kire si peꞌie ni uusue uusu-uusu hunie mwala aana soihaadaꞌinge i Akaea uri kire ke lio i suli diana aana maholo kei lae wau i saada. Oto maholo a Apolos e lai hule wau i Akaea, e si peꞌie mo iini nge a God e si niie hiiwalaimolinge hunire aena aana manata-diananga ingeie e paine hunire. 28E tohungei peꞌire hiitoꞌo sulie e ere raramaa hunie mo Jiu i maana mwala, na ko haataꞌi diana aana mo leu nge loꞌongaꞌinge ikire e lae takalo. Na ko lado luhesie loꞌu mo wala i laona Uusu-uusu Maaꞌi huni haataꞌinie uri a Jisas oto a Kraes, a Haꞌa-uuri nge a God e haiholotaꞌi huni uusungeꞌinie mai.

Currently Selected:

Palonga 18: apbNT

Highlight

Copy