Palonga 16

A Timoti E Lae Peꞌie A Pol Na A Saelas

1Kira Pol kire lai hule wau aana huilume i Debe, oto purihaꞌana kire si lae loꞌu hunie huilume i Listra nge kire oodoie ngaeta pwaarongoisuli a Jisas, satana a Timoti. Aamana mwane aana mo Aapoloa Aaopa, taꞌe nikana keni ni Jiu nge ko lulu i sulie a Jisas.#16:1 Mo Jiu kire mani unue uri a Timoti ingeie ngaeta iini aada aana nikana keni ni Jiu, na mo Aapoloa Aaopa kire unue uri a Timoti ngaeta iini aada aana aamana mwane aana mo Aapoloa Aaopa. 2Mo mwaasine i lalo aana Kraes i Listra na i Aekoniam kire tohungei neꞌisae paine aana a Timoti, 3oto a Pol ko sare toolea peꞌire. Taꞌe mo Jiu aana poꞌo ni henuena kire saie mone a Timoti e kaꞌa torihesiꞌo ue aana aamana nga mwane aana mo Aapoloa Aaopa. Oto maꞌalana kire unue ingeie mwane ni Jiu taane i sulie a nikana, taꞌe kire kaꞌa tohungei hikusie ike. Oto mwaanie kire upwesie loꞌu, a Pol e si torihesiꞌo aana a Timoti.

4Oto kira Pol kire ko lae i laona mo huilume peꞌi laengaꞌinie hunie mo soihaadaꞌinge uri kire ke lulu i sulie mo haꞌatolanga nge mo hurulaꞌaa na mo naꞌohai mwane taꞌau i Jerusalem kire uusuꞌi hunire. 5Oto hiiwalaimolinge mo soihaadaꞌinge ko si susu, na suli dinge mwala haalu ko sili loꞌu mei i laona soihaadaꞌinge.

A God E Unue A Pol Ke Lae I Masedonia

6Kira Pol ko lai liuhie mo toꞌo-toꞌolana e ro poꞌo ni henue hai aaopaꞌi i Frijia na i Kalesia. Kire oalaꞌi huni eeliꞌu takoie poꞌo ni henue i Esia huni tarohaꞌinie Tataroha Diana i leune noꞌone, taꞌe Liꞌoa Maaꞌi e uure honosire. 7Oto maholo kire hule aana taitelihana poꞌo ni henue i Misia, kire ko deu aahonga huni eeliꞌu oto loꞌu takoie poꞌo ni henue i Bitinia, taꞌe Liꞌoa Maaꞌi a Jisas e uure honosire loꞌu. 8Oto kire liue mola mo henue i Misia, na kire oodo mola hunie huilume i Troas.

9Oto aana hai rodona a Pol ko leesie mei haataꞌinge uri mwane ni Masedonia e lae mai haaraie ko teꞌuri, “O ke lae mai Masedonia huni peꞌiꞌemeelu.” 10Purine a Pol e leesie mei haataꞌinge ngeena, nge melu#16:10 Aana mei wala “melu” e si lae mai aana tatala ie, nge kie saie uri a Luk, mwane nge e uusue uusu-uusu ienini, e oodoie kira Pol i Troas huni lae peꞌire. si teuleꞌi huni lae hunie poꞌo ni henue i Masedonia, aana melu saie oto uri a God nge e soiꞌemeelu huni lai tarohaꞌinie Tataroha Diana hunie mwala i Masedonia.

A Lidia E Hiiwalaimoli I Pilipae

11Melu taꞌelie haka i Troas nge melu si oodo hunie mala-malau i Samotres. Oto aana hai dinge i puri, melu lae mwaanie mala-malau ngeena, melu si lae loꞌu hunie huilume i Niapolis. 12Oto uure i leune melu lae loꞌu hunie huilume i Pilipae, ngaeta naꞌohai huilume aana aapai henue aana poꞌo ni henue i Masedonia. Mo mwane ni Rom kire hiitoꞌo aana huilumena na kire iiꞌo mola i memelutana inemauri ni Rom.

Melu iiꞌo i leune hunie ngaeta mo hei dinge 13na aana Dinge Maaꞌi Mo Jiu, melu loꞌongaꞌi huni lae i nume ni palo-palo mo Jiu, taꞌe nga nume ni palo-palo haꞌike i leune. Oto melu iisitaa mwaanie huilume ngeena, na melu lae i sulie wai aana melu loꞌongaꞌinie uri saꞌa mola mo Jiu kire toꞌo aana nga kele leu huni aare-aarea God i leune. Oto melu leesie ngaeta mo huꞌe ni Jiu kire loko, nge melu si iiꞌo i aano huni ere-ere peꞌire. 14Na ngaeta huꞌe aada satana a Lidia keni ni Taeataera. Ingeie ngaeta keni aana mo Aapoloa Aaopa, na asunge ingeie oto huni haꞌaholingeꞌinie mo sala nonoroꞌa holiteni e paine oto liutaa. Ingeie ko palo-paloa noꞌone a God, na maholo ko pwaa-pwaarongo i sulie a Pol, a God e tahanie manatana hunie ke hiiwalaimoli aana mo erenga a Pol. 15Oto ingeie na ahutana mwala aana nume ingeie kire si loto maaꞌi na ko haaraiꞌemeelu oto huni lae wau i nume ingeie, na ko teꞌuri, “Mala uri omu ko loꞌongaꞌi uri nou hiiwalaimoli toꞌohuu aana Aalaha, nge omu ke lae kaꞌu mei iiꞌo i nume ineu.” Oto aana e ere haꞌa-olaꞌemeelu urine, nge melu si lae huni iiꞌo peꞌie i nume ingeie.

A Pol Na Saelas Kire Iiꞌo I Laona Nume Ni Hoꞌo

16Oto aana ngaeta hai dinge maholo melu ko lae aana leu ni aarengaꞌinge i sulie wai ngeena, melu oodoie nga keni haalu ko euꞌesu mala koni-konihe nana ngaeta mo mwane. Na a keni ngeena liꞌoa aaela nge aana, na ko unu-unue walu ola kei reu ue mai. Na mo mwane paine haahie koni-konihe ngeena kire ko tohungei tei-terie mei toꞌoha paine aana. 17A keine e lae i suliꞌemeelu a Pol oto mola peꞌie soinge oto paine na ko teꞌuri, “Mo mwane ngeena ikire mo mwane auꞌesu a God Hahuꞌana Nanama, na kire ko lae peꞌi unu-unue tala ni haꞌa-uuringe ingeie huniꞌomu.” 18Mo dinge hunge a keine ko teꞌurine oto mola, lae-lae hule aana a Pol e kaꞌa sare rongoa oto. Oto a Pol e saro wau takoie, na ko teꞌuri hunie liꞌoa aaela ngeena, “Aana satana Jisas Kraes no ko unue oto huniꞌo o ke lae mwaanie a keni ngeena.” Na oto mola aana maholoi satona liꞌoa aaela ngeena e tolana tahi oto mwaanie a keine.

19Na maholo mo mwane paine haahie a keine kire leesie uri tala ni teri-toꞌohanga ikire e mango oto, kire si tapolie a Pol na Saelas, kire ko ookerarue oto i saana mo mwane paine i nume ni rururu aana huilume ngeena. 20Kire toolera mai saana mo mwane lei-lei na kire ko teꞌuri, “E ro mwane ie, e ro mwane ni Jiu ni ie, na kirerue ko tohungei hurosie huilume ikolu. 21Na kire ko haꞌa-uusulie mwala aana tolahai ola e tohungei lae huꞌiteꞌi mwaanie tolahaka. Aana ikie mo Rom kie kaꞌa sai lae ike i sulie mo tolahai ola urine.”

22Oto ahutana mwala e ruru mei aana leune kire ko si peꞌie mo mwane paine huni waelie a Pol na Saelas. Oto mo mwane lei-lei kire unue ngaeta mo ramo huni taꞌaasie mo sala ikirerue na huni repusirerue. 23Maholo kire tohungei repu aaelasirerue mango, kire si lai neꞌirerue i laona nume ni hoꞌo, na kire ko unue uri poro paine haahie nume ni hoꞌo ke tohungei kakali diana aadarue. 24Oto aena mei olana, nge e lai neꞌire oto i laona duru ooreta hunie mo iini e tohungei aaela liutaa, na ko hoꞌosie aeꞌaedarue oto i denumana e ro hai dango oto paine.

25Oto i upui rodo a Pol na Saelas kirerue ko aarengaꞌi peꞌie kananga ni lahea God. Na mo iini nge kire iiꞌo noꞌone i nume ni hoꞌo kire ko rorongo mola i sulirerue. 26Kire si aparaꞌi na painehaꞌana nunu ko nunu oto, na poo-pootana nume ni hoꞌo ngeena ko esuleꞌi mango oto. Na maholoi satona noꞌone ahutana mo maa kire taha mango, na mo iieli heu kire mani siki oto mwaanie kiꞌi-kiꞌine na aeꞌaena ahutana mwala i laona nume ni hoꞌo. 27Maholo poro paine aana nume ni hoꞌo e lio na ko leesie uri ahutana mo maa aana nume ni hoꞌo kire mani taha mango, oto ko loꞌongaꞌinie uri ahutana mwala i laona nume ni hoꞌo kire tahi mango oto. Oto e darasie naihi ingeie, ko si deu ni horoꞌie mola maraana.#16:27 Aana haꞌatolanga mo Rom, mala uri nga mwane e iiꞌo i nume ni hoꞌo ko tehi, nge mo ramo kire ko kakali aana maholona, horoꞌilada kei lae. Leesie nga taa e rau aana mo ramo nge kire kakalie a Pita aana Palonga 12:19. 28Taꞌe a Pol e soi peine hunie na ko teꞌuri, “O ke suꞌuri horoꞌiꞌo maraamu aana ahutameelu taane mola mai ienini.”

29A poro paine ngeena ko eriri mola aana ko meꞌu, na ko soi oto hunie nga sine. Oto ko huru weu i laona nume ni hoꞌo, na ko pouruuru oto i naꞌona a Pol na Saelas. 30Oto e toolerarue poi sinaha, ko si dolosi aadarue uuri, “?Nga taa ni ne kei da hunie a God ke haꞌa-uurieu?”

31Oto kire ko teꞌuri hunie “O ke hiiwalaimoli mola aana a Jisas aana ingeie oto Aalaha, na a God ke si haꞌa-uuriꞌo, na e urine noꞌone hunie uluhe iꞌoe.” 32Na kire ko unue oto walana Aalaha hunie poro paine ngeena na hunie ahutana mwala nge kire iiꞌo i nume ingeie. 33Oto aana hai rodona kire ko tohungei lio i suli diana aadarue, na kire ko hodalie mo malaka i sapedarue. Na maholoi satona noꞌone ingeie na ahutana mwala aana uluhe ingeie kire ko meni loto maaꞌi oto. 34E toolea a Pol na Saelas wau i nume ingeie, ko si nii ngeulaa adarue. Na ahutana mwala aana nume ingeie kire ko ilenimwaꞌe oto aana kire mani hiiwalaimoli aana a God.

35E dangi hoꞌowa na mo mwane lei-lei kire uusungeꞌinie mo ramo huni haꞌa-iisitaangaꞌinirerue. 36Oto poro paine aana nume ni hoꞌo ko teꞌuri hunie a Pol, “Mo mwane lei-lei kire unue uri iꞌomoreꞌi a Saelas more sai iiꞌo luhetaꞌi oto. Oto more sai lae oto, na more ke suꞌuri tolahiꞌe loꞌu.”

37Taꞌe a Pol e teꞌuri mola hunie mo ramo ngeena, “Iꞌemereꞌi e ro mwane ni Rom ni ie, na kire tohungei waelie oto haꞌatolanga aana kire kaꞌa toliꞌaasiꞌemereꞌi huni ere luhesie nga mei ola hunire, taꞌe kire rapusiꞌemereꞌi mola mwaakule i maana mwala, na kire neꞌiꞌemereꞌi i laona nume ni hoꞌo. ?Oto e ue ni kire ko si sare toliꞌaasiꞌemereꞌi mola mumuni aana maholo ienini? !Haꞌike! E malisine ikire maraada ni kire kei haro lae mai huni haꞌa-iisitaangaꞌiniꞌemereꞌi mwaanie nume ni hoꞌo.”

38Oto mo ramo ngeena kire si lae, kire ko lai haꞌarongoa mo mwane lei-lei. Na maholo kire rongoa uri a Pol na Saelas ikirerue e ro mwane ni Rom, nge kire ko si tohungei meꞌu. 39Oto kire lae mai saana a Pol na Saelas, kire ko si unue saehuunge ikire hunirerue, na kire ko haꞌa-iisitaangaꞌinirerue oto mwaanie nume ni hoꞌo, na kire ko eitanairerue uri kirerue ke lae mwa-mwanoto mola mwaanie huilume. 40Maholo a Pol na Saelas kire iisitaa oto mwaanie nume ni hoꞌo, kire si lae wau i nume a Lidia na kire ko ere haꞌasusure mo mwaasine i lalo aana Kraes loꞌu hunie hiiwalaimolinge ikire ke susu. Oto e mango urine, nge kire si lae mwaanie huilume ngeena.

Currently Selected:

Palonga 16: apbNT

Highlight

Copy