Palonga 15

Mo Hurulaꞌaa Kire Mani Ere I Sulie Haꞌa-uurilana Mo Aapoloa Aaopa

1Oto ngaeta mo mwane ni Jiudia kire lae mai hule i Antiok kire ko aehota haꞌa-uusulie oto mo mwaasine aana hiiwalaimolinge na kire ko teꞌuri, “Mala uri omu kaꞌa torihesiꞌo ike mala Haꞌatolanga a Mosis e unue kolu ke asuie, nge a God e saꞌa roroꞌa haꞌa-uuriꞌomu ike.” 2Taꞌe a Pol na Banabas kire kaꞌa neꞌisae tararuru ike peꞌire, oto kire ko tohungei ere haitelili oto peꞌie mo mwaena, na kire ko ere tewa honosire. Oto lae-lae kira hiiwalaimoli i Antiok kire unue a Pol na Banabas na ngaeta mo mwane kire ke lae taꞌau i Jerusalem ni ere peꞌie mo hurulaꞌaa na mo rato aana soihaadaꞌinge i sulie mei ola ienini. 3Oto aana soihaadaꞌinge e uusungeꞌinire huni lae i Jerusalem, nge kire liu aana e ro poꞌo ni henue i Ponisia na i Samaria. Kire lae peꞌi maatolie kira hiiwalaimoli aana mo hanuena, na kire ko laengaꞌinie uri mo Aapoloa Aaopa kire ko aehota hiiwalaimoli oto aana a Jisas. Na kira hiiwalaimoli aana mo leune kire ko tohungei ilenimwaꞌe aana kire rongoa mei ola ienini.

4Maholo a Pol na Banabas kire lai hule taꞌau i Jerusalem mo hurulaꞌaa na mo rato aana soihaadaꞌinge, na ahutana soihaadaꞌinge kire tohungei tola konirerue. Oto a Pol na Banabas kire ko unu tahangaꞌinie hunie mwala walu ola nge a God e asuiꞌi hunirerue aana asunge ikirerue. 5Taꞌe ngaeta mo Parise nge kire hiiwalaimoli oto aana a Jisas kire uure, oto kire ko teꞌuri, “E tohungei roroꞌa oto liutaa hunie mo Aapoloa Aaopa nge kire ko sare lulu i sulie a Jisas ke tola i sulie mo Haꞌatolanga a Mosis na kire ke torihesiꞌo.”

6Oto mo hurulaꞌaa na mo rato aana soihaadaꞌinge kire ruru, kire ko si ere i sulie mei olana. 7Na purine kire ere hiitoꞌo oto i sulie, a Pita e uure i lengi, oto ko teꞌuri, “Maeni eesiku maaꞌi, omu meni saie oto uri a God e lio hilisieu oto wau i naꞌo mwaanie pulitaa ikolu hunie ineu ne ke holaꞌi laengaꞌinie Tataroha Diana hunie mo Aapoloa Aaopa hunie ikire noꞌone kire ke hiiwalaimoli aana Jisas. 8A God mone e saie mola loꞌongaꞌinge taꞌena nga iinoni, na e haataꞌinie oto uri e saetoꞌo aana mo Aapoloa Aaopa noꞌone aena aana e niie noꞌone Liꞌoa Maaꞌi hunire mala e niie hunikolu mo Jiu. 9E kaꞌa asuie ike nga mei ola ke aaopa i matolakaelu. E taꞌaasie mo oorahaꞌaanga mo Aapoloa Aaopa aena kire hiiwalaimoli mala e asuie kaꞌu aakaelu mo Jiu. 10?Oto e ue ni omu ko sare haꞌangei-ngeie a God urine? Mwaanie omu ko sare da mola uri hunie kira hiiwalaimoli ke lulu i sulie mo Haꞌatolanga a Mosis nge hule aana mo weuwaka na ikie maraaka noꞌone kie dau aasaie mola lulu i sulileni. 11!Haꞌike! Ikie, kie hiiwalaimoli uri a God ko haꞌa-uurikie mo Jiu mola aena aana manata-diananga nge Aalaha ikie a Jisas e niie naka. Na haꞌa-uurilana mo Aapoloa Aaopa ko lae urine noꞌone.”

12Mo erenga ngeena e da kire mani rohu, na kire ko rongo mola i sulie a Pol na Banabas kirerue ko ladoa mo huꞌi-huꞌite na mo tolimaa nge a God e da kire asuiꞌi i matolana mo Aapoloa Aaopa. 13Oto maholo kirerue ere-ere mango, a Jemes ko aehota ere uuri, “Maeni eesiku maaꞌi, omu ke pwaarongo kaꞌu hunieu. 14A Saemon Pita e si lado diana aana tala nge a God e holaꞌi haataꞌinie kinetaꞌinge ingeie hunie mo Aapoloa Aaopa hunie ikire noꞌone kire ke neꞌie mo iinoni ingeie. 15Na walana mo propet e tohungei sada noꞌone mola, aana nga iini e teꞌuri, 16Ne kei heꞌi ooli loꞌu mei na ne kei esu diana aana loꞌu nume a Deved Inemauri nge e aaꞌoho oto ngeena. Ne kei soꞌohie ahutana mo makakaꞌai ola aana nume ngeena. Ne kei ladoꞌi na kei heꞌi meꞌutaꞌa loꞌu. 17Oto aena aana mei ola ienini, ngaeta mwala loꞌu aana walumalau kire kei loꞌohieu, na mo Aapoloa Aaopa nge nou lio hilisire oto, ikire noꞌone kire ke neꞌie mwala ineu. Walana Aalaha oto ienini. 18Na ingeie oto e asuie mwala ke saie walu olana oto wau i naꞌo.” Emos 9:11-12

19Oto a Jemes ko teꞌuri loꞌu, “Neꞌisaenga ineu e uuri. Kolu ke suꞌuri da aasanga hunie mo Aapoloa Aaopa maholo kire ko si aehota lulu i sulie a God. 20Taꞌe hunie hanuelamanga ke iiꞌo i matolaka, e diana hunie kolu ke uusu-uusu mola hunire ni haꞌarongora uri kire ke suꞌuri esuie mo ola e lio mamaꞌelaꞌa aakaelu mo Jiu, mala ngaulana mo ngeulaa nge kire uunu ola aani i saana mo liꞌoa aaela, wa aeni-olanga peꞌie nga iini. Na kire ke suꞌuri ngeue taꞌena nga ola mauri nge liꞌoilana e lae hunie ke mae, na kire ke suꞌuri ngeue noꞌone nga mei epu. 21Aena mo ola ienini kire tohungei aaela aakaelu mo Jiu, sulie uure oto mai naꞌo haꞌa-uusulinge aana mo Haꞌatolanga a Mosis e lae i laona ahutana mo huilume ikolu, na saailana ko lae-lae oto suli Dinge Maaꞌi ikolu mo Jiu i laona mo nume ni palo-palo ikolu.”

Mo Hurulaꞌaa Kire Uusu-uusu Hunie Mo Aapoloa Aaopa Kire Hiiwalaimoli

22Oto mo hurulaꞌaa na mo rato na ahutana mwala aana soihaadaꞌinge, kire mani neꞌisae tararuru huni lio hilisie ngaeta mo mwane aada huni uusungeꞌinire peꞌie a Pol na Banabas i Antiok. Oto kire lio hilisie a Saelas na a Jiudas nge ngaeta sata aana a Basabas, aana ikirerue e ro naꞌohai mwane nge ahutana ruruhaa kire tohungei haꞌamaꞌu aadarue. 23Na kire uusungeꞌinie uusu-uusu peꞌirerue na uusu-uusu ngeena e teꞌuri.

Huniꞌomu mo Aapoloa Aaopa.

Iꞌomu mo Aapoloa Aaopa nge omu ko oꞌoꞌo i Antiok na i Siria na i Silisia, iꞌomu mo eesimeelu oto aana omu hiiwalaimoli aana Kraes. Oto iꞌemeelu mo hurulaꞌaa na mo rato aana soihaadaꞌinge mai leu i Jerusalem melu ko niie saediananga iꞌemeelu huniꞌomu.

24Melu rongoa uri ngaeta mwala aana pulitaa iꞌemeelu kire lai hule wau i seemiu, na kire kotahiꞌomu oto aani wala na ko hurosie saemiu. Taꞌe walu ola ngeena melu kaꞌa unuꞌi ike hunire hunie kire ke lae wau i unuꞌi huniꞌomu. 25Oto melu meni neꞌisae tararuru huni lio hilisie nga ro mwane huni uusungeꞌinirerue wau i seemiu. Na kire kei lae wau peꞌie e ro malahumeelu diana a Banabas na Pol, 26nge kirerue karaꞌi mae i tehulaꞌana asunge Aalaha ikie a Jisas Kraes. 27Oto melu ko uusungeꞌinie a Jiudas na Saelas hunie kire ke ere luhesie diana aana huniꞌomu walu ola nge melu unuꞌi i laona uusu-uusu ie.

28Oto loꞌongaꞌinge a Liꞌoa Maaꞌi na iꞌemeelu noꞌone uri melu ke suꞌuri haꞌahiꞌeiꞌomu aana nga mo ola mwaanie mo naꞌohai ola ienini. 29Omu ke suꞌuri ngaa nga mei ngeulaa nge uunu-olanga aana e lae i saana mo liꞌoa aaela, na omu ke suꞌuri ngeue mo epu, na omu ke suꞌuri ngeue taꞌena nga ola mauri nge liꞌoilana e lae, na omu ke suꞌuri aeni ola peꞌie nga iini. Oto kei tohungei diana oto liutaa i matolakaelu hunie omu ke lulu i sulie mo haꞌatolanga ienini.

Oto saediananga paine huniꞌomu. Ingeie otona.

30Oto soihaadaꞌinge e uusungeꞌinie e hai mwane ngeena, na kire lai hule oto wau i Antiok nge kire si lokoa ahutana mo iini aana soihaadaꞌinge. 31Na maholo kire saaie uusu-uusu ngeena, ruruhaa ko si tohungei ilenimwaꞌe haahie mei wala ni ere haꞌasusure ngeena. 32A Jiudas na a Saelas ikirerue nga ro propet noꞌone, oto kire ere-ere nada ni ere haꞌasusure huni haꞌa-aꞌailaꞌaa hiiwalaimolinge ikire. 33Maholo kirerue iiꞌo tewa mango i Antiok, mo mwaasine i lalo aana Kraes kire si toliꞌaasirerue aani henuelamanga na kirerue si eelihoꞌi loꞌu i saana mwala i Jerusalem nge kire uusungeꞌinirerue mai. 34#15:34 Ngaeta mo uusu-uusu i naꞌo aana erenga ni Krik kire sapeie loꞌu tatala 34 uuri, “Taꞌe a Saelas e oore mola.” 35Taꞌe a Pol na Banabas kire oore mola i Antiok, na ikirerue na ngaeta mwala hunge loꞌu kire ko haꞌa-uusulie mwala peꞌi tarohaꞌinie walana a Aalaha.

A Pol Na Banabas Kirerue Ere Haitelili

36Oto loꞌu mei puri a Pol ko teꞌuri hunie a Banabas, “Kure ke aalihoꞌi loꞌu i kelie mo eesikaelu kira hiiwalaimoli aana ahutana mo henue kure liu mei tarohaꞌinie walana Aalaha aani, hunie kure ke leesie kire ko lae oto uri taa.” 37A Banabas e ilenimwaꞌe taane mola, na e tohungei saetoꞌo aana a Jon Mak ke hakusirerue. 38Taꞌe a Pol e loꞌongaꞌinie uri e kaꞌa diana ike hunie kire ke toolea loꞌu, aana e kaꞌa lae taraꞌasi ike peꞌirerue huni haꞌamangoa asunge, aana e lae-lae kaꞌu peꞌirerue holaꞌinaꞌo, taꞌe e aalihoꞌi mola mwaanire i Pampilia. 39Kire tohungei ere haitelili hiitoꞌo i sulie, na lae-lae kire ko oopa oto.#15:39 Liꞌoa Maaꞌi e asuie erenga haitelili ngeena e da mei ola diana, aana urine e toꞌo aana e ro pulitaa huni uusungeꞌinire huni lai tarohaꞌinie Tataroha Diana. Na lae-lae a Pol na Mak na Banabas na Saelas kire mani heꞌi malahune loꞌu. Leesie 1 Korinit 9:6, 2 Timoti 4:11, na 1 Pita 5:12-13. A Banabas ko toolea oto a Jon Mak, na kirerue ko lae oto aana haka hunie mala-malau i Saepras. 40Taꞌe a Pol e lio hilisie mola a Saelas huni hekusie, na mo mwaasine aana hiiwalaimolinge kire ko aarengaꞌi taladarue, na kire niire wau oto i nimana a God hunie ke lio i sulire. 41Kire lae, kire lai liuhie e ro poꞌo ni henue i Siria na i Silisia na a Pol ko lae peꞌi haꞌa-aꞌailaꞌaa mo soihaadaꞌinge.

Currently Selected:

Palonga 15: apbNT

Highlight

Copy