2 Korinit 3

1Mwaanie omu loꞌongaꞌi uri melu ko ere urine aena aana melu ko ere toohaꞌiniꞌemeelu hunie omu ke rongo huniꞌemeelu. !Haꞌike oto ooꞌoo! Ngaeta mo iini aaopa kire saetoꞌo aana nga uusu-uusu huni unu haadaꞌi aana huniꞌomu uri ikire mo tohungei koni-konihe a God. Na maholo kire ko uure mwaaniꞌomu huni lae-lae aana ngaeta hanue, kire saetoꞌo aana uri omu ke uusu-uusu urine loꞌu hunie mwala aana hanue kire ko lae hunie ngeena. Taꞌe iꞌemeelu, melu kaꞌa saetoꞌo aana ike nga mei ola urine. 2?Mei ola urine huni taa? Aana mauringe iꞌomu oto domana uusu-uusu huni unu haadaꞌi aana uri iꞌemeelu mo tohungei koni-konihe a God. Ahutana mwala kire ko leesie uri tolahamiu e hai-oolisi diana oto, na i leune kire si lio saie asunge diana iꞌemeelu. 3Oto mauringe haalu iꞌomu ngeena domana uusu-uusu huni haataꞌinie asunge iꞌemeelu e toꞌohuu. Na e matapwa taane mola uri a Kraes ni e uusue uusu-uusu ngeena, aana a Kraes e kaꞌa uusue ike aani inki wa aani baero, taꞌe aana Liꞌoa Maaꞌi nge e uure mwaanie a God Mau-meuriꞌe. Na a Kraes e kaꞌa uusue ike mola i lengine mo rerepatai heu mala mo Haꞌatolanga nge a God e niiꞌi hunie a Mosis oto waite, taꞌe e uusue oto i laona saemiu.

4Melu hiiwalaimoli uri walu ola ienini e toꞌohuu oto, aena aana melu norutoꞌo mone aana God i tehulaꞌana a Kraes. 5Melu kaꞌa toꞌo aana ike nga mei ola tohumeelu hunie melu ke malisine asunge paine ngeena. A God mone e si da melu ke malisine asunge ngeena. 6Aana ingeie oto e da melu ke adona mei esunge mala mo koni-konihe ingeie huni tarohaꞌinie haiholotaꞌinge haalu e asuie peꞌikie mo iinoni. Na haiholotaꞌinge haalu ngeena e kaꞌa ola ike mola aana lulu i sulilana mo Haꞌatolanga, taꞌe aana lulu i sulilana a Liꞌoa Maaꞌi. I tehulaꞌana mo Haꞌatolanga a Mosis, a God kei leie ahutana mo iinoni hunie maenga, taꞌe i tehulaꞌana Liꞌoa Maaꞌi, mwala e sai oodoie maurihe huu.

7Mo Haꞌatolanga a Mosis nge uusuleni e lae i lengine e ro rerepatai heu, ko da mola maenga hunie mwala, taꞌe maꞌalana e urine, na mo Haꞌatolanga ngeena e lae mai peꞌie manikuluhaꞌana God, nge e raangie maana Mosis oto waite. Na maꞌalana rarangana maana a Mosis ko aehota huni eehutata oto maholo e siho mwaanie toloi henue ngeena, na hule aana mwala ni Israel kaꞌa sare toꞌomaaie ike raa-raa paine ngeena. 8Taꞌe nou saie uri asunge aana Liꞌoa Maaꞌi e manikuluꞌe oto loꞌu liutaa. 9?Aana mala uri mo Haꞌatolanga nge e toolea mai maenga e lae mai peꞌie manikuluhaꞌana God, nge manikuluhaꞌana haiholotaꞌinge haalu nge ko haꞌa-oodohie mwala peꞌie a God kei peine loꞌu uri taa eena? 10Iau, e toꞌohuu oto, aana manikuluhaꞌana iini lalahuꞌe ngeena kei lio mala nga mei ola mwaakule mola, aena aana manikuluhaꞌana iini haalu e tohungei peine loꞌu liutaa aana. 11Haiholotaꞌinge lalahuꞌe nge uusulana e lae i laona mo Haꞌatolanga a Mosis e lio manikuluꞌe taane, maꞌalana e saꞌa iiꞌo huu ike. Taꞌe haiholotaꞌinge haalu huni haꞌa-oodohie mwala peꞌie a God kei toꞌo aana manikuluꞌanga e tohungei peine loꞌu liutaa, aana kei iiꞌo huu.

12Oto melu kaꞌa maꞌu ike huni tarohaꞌinie Tataroha Diana, aena aana melu norutoꞌo mola aana uri manikuluhaꞌana haiholotaꞌinge haalu a God ngeena e saꞌa aiꞌaa ike. 13Melu kaꞌa mumunie ike nga mei ola i sulie haiholotaꞌinge a God mala a Mosis, aana a Mosis e haro aaluhie loꞌu maana, mwaanie uri mo Israel kire leesie uri raa-raa aana manikuluhaꞌana God ko eehutata mwaanie maana. 14Mo Israel kire kaꞌa sare saie ike, na saeda e hau mola. Na hule siꞌiri maꞌalana kire ko saa-saaie mo wala aana haiholotaꞌinge lalahuꞌe, taꞌe kire kaꞌa sai lio saiꞌi ike. E urihana mola mei sala a Mosis e aaluhie maana aana, e iiꞌo ue i maada. Na mei sala ngeena taꞌaasilana e sai lae mola hunie mo iini kire iiꞌo ruru peꞌie a Kraes. 15Maꞌalana siꞌiri, maholo kire ko saaie mo uusu-uusu a Mosis, mei olana e honoa ue maada na e ponosie mola ue saeda mwaanie kire lio saie. 16Taꞌe maholo nga iini ko eeliꞌu takoie a Aalaha, nge mei ola ngeena ko eiꞌaa oto mwaanie. 17Na a Aalaha na Liꞌoa Maaꞌi, ikire taꞌa-taꞌa iini mola. Na taꞌena nga iini Liꞌoa Maaꞌi a Aalaha ko iiꞌo i lalo aana, nge Liꞌoa ko luhesie iinine mwaanie nanamanga aana aaelanga. 18Oto ahutaka mo iini kie lado peꞌie a Kraes, a God e taꞌaasie oto mei sala ngeena mwaanie maaka hunie kie ke haataꞌinie manikuluhaꞌana Aalaha mala iiro-iiro ko wana-wana i laona sato. Na oto tarau Liꞌoa Maaꞌi a Aalaha ko esu i lalo aaka huni oolisikie hunie kie ke urihana oto ingeie maraana, na kie ke haataꞌinie manikuluhaꞌana oto liutaa.

Currently Selected:

2 Korinit 3: apbNT

Highlight

Copy

Compare