1 Tesalonaeka 5

Kie Ke Iiꞌo Aakau Loosie A Aalaha

1Oto maeni eesiku maaꞌi, leu i sulie tohungei hei dinge na maholo walu ola ienini kei reu, nga mei ola hunie melu ke uusu-uusu i sulie huniꞌomu haꞌike. 2Aena aana iꞌomu maraamiu omu sai diana aana oto uri a Aalaha ikie kei ooli loꞌu mola mai aana taꞌena nga dinge nge mwala kaꞌa loꞌo-loꞌongaꞌinie ike, mala iinoni peli-peli e sai lae mola mai aana taꞌena nga maholo i rodo. 3Maholo nge mwala ko loꞌongaꞌi uri kire iiꞌo sapemawa mola aana hanuelamanga, taꞌe kire ke si aparaꞌi mola aana aaelanga ko tolana toolera oto na ko suuheꞌinire oto. Kei urihana huꞌe nge ko aparaꞌi mola aana sapesalunge hunie toꞌo-mwelanga, na e aasa loꞌu hunie kei tehisie mei olana.

4Taꞌe iꞌomu, maeni eesiku maaꞌi, omu kaꞌa iiꞌo ike mone i laona rodohono. Oto aena ngeena, omu saꞌa papangataꞌi ike maholo hai dinge ngeena kei hulesie walumalau mala iinoni peli-peli nge ko lae mai i rodo aana maholo kire kaꞌa loꞌongaꞌinie ike. 5Aana iꞌomu, omu meni iiꞌo oto i laona matapwanga na omu meni neꞌi iinoni aana raa-raa. Na ikie nga mwala haꞌike loꞌu aana rodo wa nga mwala aana rodohono. 6Oto kie ke suꞌuri urihana mwala aana rodohono ni welumalau nge kire ko talei maꞌa-maꞌahu mola, taꞌe kie ke iiꞌo aakau mola tarau loosie a Aalaha mala mo iini kire ko lio-lio diana taraureꞌi na kire kaꞌa inu wei ni pweu ike. 7Maholo e rodo, mwala kire sai maꞌahu na nga mo iini ko inu wei ni pweunge hule aana kire ko mehiri oto. 8Taꞌe aana ikie mo iini oto aana aatowaa, e malisine uri kie ke iiꞌo aakau na kie ke lio-lio talaka aani haꞌahili-hilinge. Mala nga ramo ko deu aakau hunie oohotaa, nge ikie noꞌone kie ke dau aakau urine. Mo ramo kire sai hoꞌosie mo toꞌoni ni oohotaa huni kinetaꞌinie mamangoda, na urine loꞌu ikie noꞌone kie ke iiꞌo aakau aani hiiwalaimolinge aana Jisas na aani manata-diananga hunikie hailiu. Na mala nga ramo ko kinetaꞌinie pwaune aana ko hoꞌosie paraimaa ni oohotaa, nge urine ikie noꞌone kie ke kinetaꞌinie loꞌongaꞌinge ikie aani norutoꞌonga uri a Kraes kei haro haꞌa-uurikie taane. 9Aana a God e kaꞌa haꞌaholakie ike uri hunie ke haꞌamotaahikie aana dinge ni leinge. !Haꞌike! Taꞌe e haꞌaholakie hunie Aalaha ikie a Jisas Kraes, ke haꞌa-uurikie. 10A Jisas e mae honotaka uri hunie ke haꞌa-uurikie hunie uri kie ke lae iiꞌo ruru peꞌie aana maholo kei ooli loꞌu mei, maꞌalana uri kie ke mae oto wa kie ke mauri ue aana maholona. 11Aena urinena, omu ke ere haꞌasusuꞌomu heiliu na omu ke peꞌiꞌomu heiliu oto mala omu ko esuie ngeena.

Mo Haꞌananaunge Ooreta Na Mei Wala Ni Saediananga

12Oto melu ko eitanaiꞌomu, maeni eesiku maaꞌi, uri omu ke haꞌamaꞌu aana mo iini ko esu hiitoꞌo i matolamiu aana soihaadaꞌinge huni lio i suliꞌomu na huni haꞌa-uusuliꞌomu. 13Omu ke lio i suli diana aada peꞌi haꞌamaꞌunge na peꞌi manata-diananga hunire haahie mo esunge kire ko esuiꞌi ngeena. Na omu ke oꞌoꞌo ni henuelama mola i matolamiu maraamiu. 14Na melu ko eitanaiꞌomu, maeni eesiku, uri omu ke ere aana mo iini ko lalawasie asunge. Omu ke peꞌie mo iini nge kire sai meꞌu hunie saeda ke susu. Omu ke peꞌie mo iini nge loꞌongaꞌinge ikire e mamaelaꞌa, na omu ke haro kele ere hunie ahutana mwala. Na mwaanie saewasunge iꞌomu e lau-leu hunie taꞌena nga iini. 15Omu ke lio talamiu mwaanie nga iini e heꞌi suꞌue loꞌu tataꞌalanga hunie nga iini. !Haꞌike! Taꞌe omu ke diana mola huniꞌomu heiliu taraureꞌi na noꞌone hunie ahutana mwala.

16Omu ke oꞌoꞌo ni ilenimwaꞌenga mola taraureꞌi, 17na omu ke aarea God mola tarau. 18Na maꞌalana nga taa ke rau-reu loꞌu, taꞌe omu ke paalahea God mola tarau suli maholo. Aana a God e saetoꞌo aana omu ke asu urine aena aana omu lado oto peꞌie a Jisas Kraes.

19Omu ke suꞌuri deu honosie Liꞌoa Maaꞌi mwaanie maurihaꞌamiu, taꞌe omu ke tola i sulie nga taa e unue huniꞌomu. 20Na mwaanie omu mwaka aana mo wala a God ko niiꞌi mei hunie mo iinoni maaꞌi ingeie. 21Taꞌe omu ke holaꞌi lei diana aana kaꞌu ahutana mo haꞌa-uusulinge. Oto omu ke si lulu i sulie mo iini diana, 22na omu ke iiꞌo haꞌatau mwaanie taꞌena nga mei ola aaela.

23No ko aarea God nge ko nii-niie hanuelamanga hunikie uri ke da hunie omu ke iiꞌo maaꞌi taꞌingelu. Na no ko aarea hunie uri ke kinetaꞌiniꞌomu oto taꞌingelu, hunie loꞌongaꞌinge iꞌomu, na maurihaꞌamiu, na sapemiu ke mani iiꞌo sapemawa mwaanie taꞌena nga ola tataꞌala maholo Aalaha ikie a Jisas Kraes kei ooli loꞌu mei. 24Iini e soiꞌomu mei i saana e tohungei diana na omu sai norue, na ingeie ni kei esuie leune huniꞌomu.

25Maeni eesiku maaꞌi, omu ke aarengaꞌi noꞌone talameelu. 26Omu ke niie saediananga iꞌemeelu hunie ahutana mo iini kire hiiwalaimoli. 27No ko eitanaiꞌomu aana satana Aalaha ikie uri saailana uusu-uusu ienini ke lae oto nana ahutana mo iini kire hiiwalaimoli. 28No ko eitanaie uri hahuꞌana manata-diananga Aalaha ikie a Jisas Kraes ke iiꞌo peꞌiꞌomu.

Currently Selected:

1 Tesalonaeka 5: apbNT

Highlight

Copy

Compare