Apocalipsis 9

Ti nꞌóxin trompeta

1A̱ndá ti nꞌóxin ángel kꞌuánoa ti trompeta, mé kꞌuíkua̱n ijnko konotsé kꞌuánótje̱xi̱n nka̱jní la ikui chjasintajni, la kꞌuáyéhe̱ ti llave kuènté ti tòye̱ ni̱nka#9:1 tòye̱ ni̱nka abismo siín ncha̱kuén jínahña. 2#Gn. 19:28.*Ndá xitje̱he̱ ti tòye̱ ni̱nka la ntiha kꞌuaxrjexín ihnchi éxi ti ihnchi tꞌaxrjexín ijnko itja̱, landá ti ña̱o la ko ti nka̱jní mé kótié kixin ti ihnchi kꞌuaxrjexín ti tòye̱ a. 3#Ex. 10:12-15.*Ndá ti ihnchi mé kꞌuaxrjexín itsjé kochjoá sákjuí kuenté chjasintajni. La kꞌuáyéhe̱ kjuachaxin kixin jína siñehe chojni éxi ñehe ti konchi̱a̱ siín chjasintajni xi̱kaha. 4#Ez. 9:4.*La kꞌuítuehen kixin sincheníehña ti kayoa siín chjasintajni la ko ninkehó nkehe yoa la ko ninkehó ntayoa, jehó ti chojni chóntahya ti sello kuènté Díos ti totjín. 5Kjánchó kꞌuáyèhya kjuachaxin kixin tsꞌóñá ti chojni. Náhí. Jehó sinchekjasóte va chojni inꞌó nitjó; a̱ndá ti kjuatjoté mé yóhe̱ éxi tjotéxin ti niehe chojni ijnko konchi̱a̱. 6#Job 3:21; Jer. 8:3.*La ti ña̱o a, la itsjé chojni tsotjinkaon itsꞌen, kjánchó xitjahya itsꞌen sin. Kjónté tjinkaon sin la ti kjuachꞌén la tsinkéhe ti jehe sin.

7 # Jl. 2:4. *Ti kochjoá mé tsjehe éxi koka̱te̱ tjejóchóhen sátsji va guerra sátsjikjajo̱n va. Ti ikja mé chónta ijnko nkehe éxi ijnko corona tsíkꞌónaxín oro xi̱kaha, ndá ti nkayakon la éxi nkayakon chojni xi̱kaha. 8#Jl. 1:6.*Ti ka̱xi̱hí mé yóhe̱ éxi ka̱xi̱hi chojnichjin, a̱ndá ti ñeno la yóhe̱ éxi ñeno koxra̱. 9#Jl. 2:5.*Ti nto̱e va la chónta éxi ijnko nkehe tsíkꞌónaxín chika. A̱ndá ti ruido kuènté ti ka̱ñe̱ñe̱e va, la éxi ti ruido kuènté nchónhña carreta tinkánkákjen koka̱te̱ ti ó siín guerra. 10Chónta ntañé éxi ntañé konchi̱a̱ xi̱kaha la ko ichꞌié mé tíha ti sinchekjasótexín ti chojni inꞌó nitjó. 11La chónta va ijnko rey tꞌe̱tue̱hen va mé tíha la ti ángel kuènté ti tòye̱ ni̱nka. Mé ihni̱é ti ángel ti ngiva hebreo mé Abadón, ndá griego mé Apolión, la yóí mé tꞌaxrjexín kixin tíha mé sinchekꞌitjáña kaín nkehe.

12Mé xi̱kaha ti kjuachrakon xránkíxixín la ó kꞌuatsínka. Kjánchó na̱xa̱ tꞌitjáña í yaá kjuachrakon tíjie itsi.

13 # Ex. 30:1-3. *A̱ndá ti njonxi̱n ángel kꞌuánoa ti trompeta, la kui̱ha̱n itén ijnko nkexro kꞌuaxrjexín ti tjejó ti noó ntèé ti altar tsíkꞌónaxín oro itjen nkayakon ti itjen Díos. 14Mé ndáche ti njonxi̱n ángel chónta ti trompeta xi̱kihi:

―Tꞌoxinda̱nke̱héra ti noó ángel tjejóchroé chjinaxón ti nda̱río ijié itꞌin Éufrates.

15Ndá xi̱kaha xinda̱nke̱he noó ti sin ángel tjejóchóhen ti hora, ti ña̱o, ti nitjó la ko ti nánó, kixin sátsji tsꞌóñá níxin parte ti chojni siín chjasintajni. 16Ndá kui̱ha̱n ti número kuènté ti soldado tjejókjen koka̱te̱ mé yaá ciento millones sin.

17Mé xi̱kihi kꞌuíkua̱n ti koka̱te̱; ntakuin ti sin tjejókjen mé chónta chika kjátse, azul la ko siñe. Ndá ikja ti koka̱te̱ la éxi ikja koxra̱ xi̱kaha, la ti irꞌua va mé tꞌaxrjexín xrohi, ihnchi la ko azufre. 18Ndá níxin parte ti chojni mé kꞌuénxin ti ihnchi, ti xrohi la ko ti azufre kꞌuaxrjexín irꞌua ti koka̱te̱. 19Ti koka̱te̱ la chónta kjuachaxin ti irꞌua la ko ti ntañé kixin ti ntañé mé tsjehe éxi konche chónta ikja la tíha ncheníexín ti chojni.

20 # Sal. 115:4-7; 135:15-17; Dn. 5:23. *A̱ndá íso ti chojni kꞌuénxinhña ti ichin la kjónté kjuinkíhya sin ti nkehe tjenka̱yáxin sin la kuíto̱ehya sin ti tinkáchónki sin ti jínahña la ko ti nkehe tsíkjano̱ña tsíkꞌónaxín oro, plata, bronce, ixro̱ la ko inta, ti nkehe tꞌikonhña, tienhña la ko tjihya. 21Kuíto̱ehya sin ti nkehe jínahña ichꞌe sin éxi ti tꞌóñá kícho sin, nchekjiko kícho sin, chónta sin ókjé chojnichjin jehya ichjién sin la ko teé sin.

Currently Selected:

Apocalipsis 9: poeNTplus

Highlight

Copy