Apocalipsis 21

Nka̱jní ni̱xin la ko nonte ni̱xin

1 # Is. 65:17; 66:22; 2Pe. 3:13. *Ndá chrꞌéxi̱n kꞌuíkua̱n ijnko nka̱jní ni̱xin la ko ijnko nonte ni̱xin, kixin ti nka̱jní sa̱oxén la ko ti nonte sa̱oxén la kꞌuitjáña la ti nda̱ñao la í kohya. 2#Is. 52:1; Ap. 3:12; Is. 61:10.*Janhan, Juan, kꞌuíkua̱n ti chjasin ijié tjóá, ti Jerusalén ni̱xin, kꞌuínkaji̱nxi̱n nka̱jní kui̱xi̱n ti itjen Díos, la kuenté tsíkꞌitsá éxi ijnko chojnichjin tsíkꞌitsá kixin tso̱te̱he. 3#Ez. 37:27; Lv. 26:11, 12.*Ndá kui̱ha̱n ijnko itan itsen kui̱xi̱n nkaya nka̱jní ndáchro:

―Tihín, ijie la Díos itjen ntiha ti siín chojni, la tsꞌejóko sin ti jehe chꞌan, la jehe sin tsꞌóna sin chjasén chꞌan, la Díos mé tsꞌejóko sin ntiha la tsꞌóna Díos kuènté sin. 4#Is. 25:8; Is. 35:10; 65:19.*Díos mé tsꞌóní kaín nda̱kon sin la í tso̱kohya ti itsꞌen chojni, la tso̱kohya nkexro tsotsjánka la ko tsꞌává, tso̱kohya ti tsjasóte chojni kixin kaín ti nkehe kuékꞌíxin ósé la ó kjuixin kꞌuatsínka.

5A̱ndá ti nkexro tetja̱xi̱n ti trono mé ndáchro:

―Janhan si̱tꞌána ni̱xin kaín nkehe.

La kja̱xin ndáchro:

―Ikjian tíhi, kixin tíhi mé itan chaxín ndoa la ko jína tsitekaon chojni.

6 # Is. 55:1. *Ndá chrónka chꞌan:

―Ó kjuixin kóhen kaín nkehe. Janhan mé ti xránkíxixín la ko ti tsjixixín, éxi ti letra A hasta Z. Ti nkexro ikꞌuén ìnta̱ la janhan tsotjahá ti ìnta̱ tjajon kjuachón la ninkehó tsꞌixinkíehya sin. 7#2Sam. 7:14; Sal. 89:26, 27.*Ti nkexro tsjacha tsíto̱ehya ti janhan la tsꞌáyéhe̱ sin kaín tíhi. La janhan tsꞌóna Díos kuènté sin, la jehe sin tsꞌóna sin xja̱na. 8Kjánchó ti nkexro chrakon, ti nkexro titekakonhña, ti nkexro chji̱no̱xíhin, ti nkexro tꞌóñá kícho, ti nkexro tjasiko ijie̱ ókjé chojnichjin, ti nkexro nchexro̱a̱n, ti nkexro tinkáchónki nkehe tsíkjano̱ña la ko kaín ti nkexro xrichꞌia, mé sátsji ti siín xrohi la ko azufre kixin tsoche mé tíhi ti yaáxin itsꞌen chojni.

Ti Jerusalén ni̱xin

9Ndá kóchjina ijnko ti ya̱to̱xi̱n ángel chónta ti ya̱to̱xi̱n copa síkaón ti ya̱to̱xi̱n ichin tsjixixín tsjasótexín chojni. Mé ndáchro:

―Xrákia ntihi ndá tsjákohá ti tjachjin tso̱te̱he ti Kolélo.

10 # Ez. 40:2. *Ndá ti ángel sákjuíko ti janhan ijnko ijna̱ ijié la ko noi, ndá kjuako ti chjasin ijié, mé ti chjasin Jerusalén tjetꞌinkaji̱xi̱n nkaya nka̱jní ti itjen Díos. 11Ti chjasin a mé tjáki̱níxin ti kjuachaxin kuènté Díos. A̱ndá ti tjáki̱ni mé éxi ijnko ixro̱ imá náxrjón o̱ éxi ti ixro̱ jaspe tjáki̱ni éxi xro̱se̱nta̱ tsjehe. 12#Ez. 48:30-35.*Ndá nkonda̱tjen#21:12 nkonda̱tjen alrededor ti chjasin mé chónta ijnko tja̱tꞌo̱ noi la chónta teyó puerta, la tjejónta nkojnko ángel nkojnko ti puerta, la ko tjejónixín ihni̱é ti teyó ti sin tsíkꞌaxrjeníxin Israel nkojnko ti puerta. 13Tjejó iní puerta ti tji̱to̱xi̱n ña̱o, la iní nó norte, la iní ti tjiatóxin ña̱o, la iní puerta nó sur. 14Ti tja̱tꞌo̱ tsíka̱ntatjen ti chjasin a mé chónta teyó ixro̱ sóji̱xi̱n ti tja̱tꞌo̱ la sínixín ihni̱é ti teyó sin kꞌuájiko ti Kolélo.

15 # Ez. 40:3. *Ti ángel níxja̱na mé tjexraá ijnko inta vara tsíkꞌónaxín oro kixin tsoxracho̱axín ti chjasin, ti puerta kuènté ti chjasin la ko ti tja̱tꞌo̱ tsíka̱ntatjen. 16Ti chjasin mé cuadrado; la ti kjíji̱nxi̱n mé nkokón éxi ti tonxín. A̱ndá ti ángel la kjuacho̱a ti chjasin, la ti chjasin mé chónta yaá mil la ko yaá ciento kilómetro ti kjíji̱nxi̱n, a̱ndá ti nte̱toxín la ko ti tonxín la nkokón. 17Ndá chrꞌéxi̱n mé kjuacho̱a ti ángel ti tja̱tꞌo̱ tsíka̱ntatjen ti chjasin la chónta sesenta y cinco metro kixin ti ángel la kjuacho̱a éxi tjacho̱a chojni chjasintajni.

18 # Is. 54:11, 12. *Ti tja̱tꞌo̱ tsíka̱ntatjen mé tsíkꞌónaxín ixro̱ jaspe, a̱ndá ti chjasin la tsíkꞌónaxín jehó oro, éxi xro̱se̱nta̱ tjóá tsjehe. 19Ti ixro̱ tsíkꞌónaxín ti cimientoé ti tja̱tꞌo̱ la tsíkꞌónaxín itsjé ti ixro̱ na̱jni náxrjón tsjehe. Ti ixro̱ xránkíxixín la jaspe, ti ixro̱ yaáxin la zafiro, ti ixro̱ níxin la ágata, ti noóxin la esmeralda. 20Ti nꞌóxin la ixro̱ mármol, ti injonxi̱n la cornalina, ti ya̱to̱xi̱n la crisólito, ti jníxin la berilo, ti na̱xi̱n la topacio, la ti te̱xi̱n la crisoprasa. Ti tejnkoxi̱n la jacinto, landá ti teyóxin la ixro̱ amatista. 21A̱ndá ti teyó puerta, mé teyó perla; la nkojnko ti puerta mé tsíkꞌónaxín nkojnko perla. A̱ndá ti nti̱a ijié kuènté ti chjasin la tsíkꞌónaxín jehó oro éxi xro̱se̱nta̱ tsjehe.

22Ntiha la kꞌuíko̱nhña ninkehó ni̱nko, kixin Ìnchéni Díos chónta kaín kjuachaxin mé ti ni̱nko la ko ti Kolélo. 23#Is. 60:19, 20.*Ti chjasin a mé ticháxi̱nhña kixin ti ña̱o o̱ ti nitjó tsꞌinkaséñaxín, kixin ti kjuachaxin ijié kuènté Díos la ko ti Kolélo mé ti xrohi tꞌinkaséñaxín ntiha. 24#Is. 60:3.*La ti chojni kaín nación tsíkaá la tsjixín sin ti xrohi kuènté ti chjasin a, la ko ti sin rey kuènté chjasintajni la tsji̱ka̱o sin ti nkehe kꞌuéchónta sin. 25#Is. 60:11.*Ti puerta kuènté ti chjasin la tsꞌikjèhya ti ncha̱kotjin la ntiha mé tso̱kohya sítie. 26Ntiha tsjijiko sin kaín ti kjuasàya la ko ti nkehe tjete kꞌuéchónta sin chjasintajni. 27#Is. 52:1; Ez. 44:9.*Ntiha la tsꞌixenhña ninkehó nkehe kji̱ta̱, ninkehó chojni chji̱no̱xíhin o̱ chojni chꞌia. Jehó tsꞌixehen ntiha ti nkexro sínixín ihni̱é ti libro kuènté ti kjuachón chónta ti Kolélo.

Currently Selected:

Apocalipsis 21: poeNTplus

Highlight

Copy