Apocalipsis 14

Ti isón kuènté ti ciento cuarenta y cuatro mil chojni

1 # Ez. 9:4; Ap. 7:3. *Ndá tsjáha̱ la kꞌuíkua̱n kixin ti Kolélo la tjexín to̱té chritaón ti ijna̱ Jerusalén. Jehe chꞌan la ko ciento cuarenta y cuatro mil chojni tjejóko chꞌan chónta ihni̱é chꞌan la ko ihni̱é ti Itꞌé chꞌan ti totjín sin. 2Ndá chrꞌéxi̱n kui̱ha̱n ijnko itan nkaya nka̱jní, éxi ti ruido kuènté ti nda̱río ijié la ko éxi ti tjonta itsen. Ti itan kui̱ha̱n la éxi itsjé chojni itꞌin isón arpa. 3La itsje sin ijnko canto ni̱xin nkayakon ti trono la ko nkayakon ti noó sin tjejóchón la ko ti sin táda. La ninkexró xrokjuahya tꞌitja ti canto itsje sin; jehó ti ciento cuarenta y cuatro mil, ti sin kuaá tsikꞌaxrjekjaxín ti chojni siín chjasintajni. 4Ti sin i mé kóchóntahya sin chojnichjin ókjé, la tjóá tjejó sin, chréhe̱ sin ti Kolélo kjónté nketí sátji. Jehe sin mé kuakitsekjaxín Díos ti siín ijie̱; la jehe sin mé ti ofrenda sa̱oxín kꞌuáyéhe̱ Díos la ko ti Kolélo. 5#Sof. 3:13.*La kꞌuaxrjexínhña ninkehó kjuachꞌia ti irꞌua sin, la ninkehó ijie̱ chóntahya sin ti tjejó sin nkayakon ti trono kuènté Díos.

Ti nkehe chrónka ti iní ángel

6A̱ndá kꞌuíkua̱n íjnko ángel tjetjaká nko̱siñe nka̱jní chronka ti itan tsaáxini nkochríxín kixin tsihin ti chojni siín chjasintajni la ko kaín nación, chojni kaín nkexrín tsjehe, kaín ngiva la ko kaín chjasin. 7Ndá ti ángel mé itsen ndáchro:

―Tjíkosayehéra Díos la ko chje̱héra kjuasáya kixin ó kjuixraká ti ña̱o sinchekito̱exín chꞌan iji̱é kaín chojni. Tjikosayehéra ti nkexro kjuíchꞌéna nka̱jní la ko chjasintajni, nda̱ñao la ko ti sítꞌaxrje ìnta̱.

8 # Is. 21:9; Jer. 51:8; Ap. 18:2. *Ndá chréhe̱ ti yaáxin ángel, ndáchro:

―Ó kjuixin kꞌuitjáña, ó kjuixin kꞌuitjáña ti chjasin ijié, ti chjasin Babilonia. Ti chjasin kjua̱ko̱he̱ kaín ti iso chjasin tsjasin ijie̱ la ko tsinkáchónki ti nkehe tsíkjano̱ña.

9Ndá chrꞌéxi̱n chréhe̱ ti níxin ángel la itsen, ndáchro:

―Ti nkojín nkexro tsjikosáyehe ti iko ijié la ko ti nkehe tsíkjano̱ña kuènté o̱ tsochónta xro̱ye ti totjín o̱ ti itja chjina, 10#Is. 51:17; Gn. 19:24; Ez. 38:22.*la Díos imá tso̱nínkaon landá sinchekjasótexín chꞌan kaín sin ti xrohi la ko azufre, mé ti sin ángel la ko ti Kolélo la tsꞌikon nkexrín tsjasóte sin. 11#Is. 34:10.*Ti ihnchi kuènté ti xrohi tjasótexín sin mé tsochrìin nkochríxín la xrokjuahya tso̱kꞌéhe sin ncha̱kotjin la ko tie kixin kuinkáchónki sin ti iko ijié la ko ti nkehe tsíkjano̱ña kuènté la ko chónta sin ti xro̱ye kuènté ti ihni̱é. 12Méxra̱ ti nkexro tinkáchónki Díos la ko nchexiteyá ti nkehe tꞌe̱to̱an chꞌan la ko ti̱toéhya sin chréhe̱ sin chꞌin Jesús, la tsꞌo̱xrjéhya sin.

13Ndá kui̱ha̱n ijnko itan kui̱xi̱n nka̱jní ndáchro:

―Ikjian tíhi: “Náxrjón chéhe̱ ti nkexro itsꞌen tinkáchónki Ìnchéni ndesi ijie.” Jeén xi̱kaha, ichro Ncha̱kuén Díos. Jehe sin mé tso̱kꞌéhe sin kixin ó kjuíchꞌe sin ixra̱ la Díos tsje̱nke̱he ti jehe sin kaín ti ixra̱ jína kjuíchꞌe sin.

Ti nkehe tsíkꞌóna chjasintajni

14 # Dn. 7:13. *Ndá tsjáha̱ la kꞌuíkua̱n ijnko itji̱ tjóá la chritaón ti itji̱ la tetja̱xi̱n ijnko nkexro tsjehe éxi ti Xje̱en Díos kꞌóna Chojni, la tjenkáya ijnko corona tsíkꞌónaxín oro ti ikja chꞌan la ko tjexraá chꞌan ijnko chika hoz imá taté. 15#Jl. 3:13.*A̱ndá íjnko ángel kꞌuaxrjexín ni̱nko mé itsen nixje̱he̱ ti nkexro tetja̱xi̱n chritaón ti itji̱, ndáchro:

―Ichrꞌán ti hoz kuèntá la itja̱a ti nkehe kꞌóna kixin ó kjuixraká ti ña̱o, la ti nkehe tsíkꞌóna chjasintajni la ó tsícha.

16Ndá ti nkexro tetja̱xi̱n chritaón itji̱ mé ichrꞌán ti chika hoz kuenté chjasintajni la kjuejo ti nkehe tsíkꞌóna ntiha.

17Ndá chrꞌéxi̱n mé kꞌuaxrjexín íjnko ángel ti ni̱nko itjen nkaya nka̱jní la kja̱xin tjexraá ijnko chika hoz imá taté. 18Ndá kꞌuaxrjexín íjnko ángel ti altar la chónta kjuachaxin tsꞌe̱tue̱hen ti xrohi la itsen kꞌuéye̱he̱ ti nkexro tjexraá ti chika hoz imá taté ndáchro:

―Tjankíxian ichrꞌán ti chika hoz kuèntá, la itja̱a ti ito uva tsíkꞌóna chjasintajni kixin ti ito la ó tsíchjé.

19Ndá ti ángel kjuínchekꞌatsínka ti chika hoz chritaón ti chjasintajni la kꞌuijin ti ito uva ndá kꞌuènka chꞌan ti ito ijnko nkehe ijié tsꞌéña chꞌan. Tíha mé tꞌaxrjexín kixin Díos mé xi̱kaha sinchekjasóte kaín chojni. 20#Is. 63:3; Lm. 1:15; Ap. 19:15.*Ndá ti ito uva mé ndója chjasin kꞌuénxin chꞌan, la ntiha mé kꞌuaxrjexín ijni̱ la kuichjéhe éxi noixín ti freno kuènté koka̱te̱ la éxi iní ciento kilómetro xi̱kaha kuichjéhe.

Currently Selected:

Apocalipsis 14: poeNTplus

Highlight

Copy